print edition ആലപ്പുഴയിലെ വയോധികന്റെ കൊലപാതകം; സിനിമാക്കഥ പോലെയെന്ന്‌ പൊലീസ്‌

ആലപ്പുഴ/ഹരിപ്പാട്‌ : കരുവാറ്റയിലെ വയോധികന്റെ കൊലപാതകം നടത്തിയത്‌ സിനിമകളിൽ കാണുന്നതുപോലെ പ്രൊഫഷണൽ രീതിയിലെന്ന്‌ പൊലീസ്‌. ഐഫോണും ബൈക്കും വാങ്ങാൻ ആസൂത്രണം ചെയ്ത ‘കൊലപാതകം’ ​പെൺകുട്ടി വീഡിയോ കോളിൽ കണ്ടുവെന്ന്​ ജില്ലാ പൊലീസ്​ മേധാവി ടി കെ വിഷ്​ണുപ്രദീപ്​ മാധ്യമ​പ്രവർത്തകരോട്​ പറഞ്ഞു.

പെൺകുട്ടി പ്രേരിപ്പിച്ചത്‌ അനുസരിച്ച്‌ സ്വർണവും പണവും അപഹരിക്കാൻവേണ്ടിയാണ്​ ആൺസുഹൃത്തും കൂട്ടുകാരും എത്തിയത്​. വീടിന്റെ പിന്നിലെ ​​വെന്റിലേറ്ററിലൂടെ അകത്തുകടന്ന പ്രതികൾ പൊലീസിനെ കബളിപ്പിക്കാൻ കൈയുറ ധരിച്ചിരുന്നു. സ്ഥലത്ത്‌ മുളകുപൊടി വിതറാനും മറന്നില്ല. മോഷണമാണ്​ ഇതിന്​ പിന്നി​ലെന്ന്​ വരുത്തിതീർക്കുകയായിരുന്നു ലക്ഷ്യം.

പെൺകുട്ടിയുടെ സഹായത്തോടെയാണ്​ വീട്ടിലുണ്ടായിരുന്ന നാലരപവൻ സ്വർണാഭരണം അപഹരിച്ചതത്രെ. സിനിമയുടെ സ്വാധീനവും കുടുംബപ്രശ്നങ്ങളും സംഭവത്തിന്‌ പിന്നിലുണ്ട്‌. അച്ഛനമ്മമാരിൽനിന്ന്​ വേണ്ടത്ര സ്​നേഹംകിട്ടാത്തതും പ്രശ്നമായിട്ടുണ്ടെന്ന്‌​ ചോദ്യംചെയ്യലിൽ ​ പെൺകുട്ടി പറഞ്ഞെന്നും ജില്ലാ പൊലീസ്‌ മേധാവി പറഞ്ഞു. കൊല്ലപ്പെട്ടയാൾ ഉപദ്രവിച്ചുവെന്ന്‌ ആൺസുഹൃത്തിനോട്‌ പറഞ്ഞിരുന്നു. മൃതദേഹത്തിന്റെ കൈയും കാലും തുണികൾകൊണ്ട്​ ബന്ധിച്ച നിലയിലായിരുന്നു.

അടുത്ത ബന്ധുക്കളെയും പുറത്തുനിന്നുള്ളവരെയുമാണ്‌ ആദ്യം സംശയിച്ചത്‌. പെൺകുട്ടിയുടെ മൊഴിയിലെ വൈരുധ്യത്തിലാണ്​ പെൺകുട്ടിയുടെ കാമുകനും അവരുടെ സുഹൃത്തുക്കളും ചേർന്നാണ്​ കൊലപാതകം നടത്തി​യതെന്ന്​ ബോധ്യമായത്‌. പെൺകുട്ടി ഫോൺ ഉപയോഗത്തിന്റെ പേരിൽ നേരത്തെയും പ്രശ്നങ്ങളുണ്ടാക്കിയിട്ടുണ്ടെന്ന്‌ പൊലീസ്‌ അറിയിച്ചു.