അഹമ്മദാബാദ് നഗര മാതൃക തിരുവനന്തപുരത്ത് അടിച്ചേൽപ്പിക്കാൻ അനുവദിക്കില്ല: വി ശിവൻകുട്ടി

v sivankutty
തിരുവനന്തപുരം: അഹമ്മദാബാദ് നഗര മാതൃക തിരുവനന്തപുരം നഗരസഭയിൽ അടിച്ചേൽപ്പിക്കാൻ അനുവദിക്കില്ലെന്ന് സിപിഐ എം സംസ്ഥാന സെക്രട്ടറിയറ്റ് അംഗം വി ശിവൻകുട്ടി. തിരുവനന്തപുരം നഗരസഭയുടെ ഭരണവും മറ്റ് സൗകര്യങ്ങളും അഹമ്മദാബാദ് നഗരത്തെപ്പോലെയാക്കാൻ ശ്രമിക്കുന്നത് അംഗീകരിക്കാനാവില്ലെന്ന് അദ്ദേഹം വ്യക്തമാക്കി.
അഹമ്മദാബാദ് മാതൃകയിലുള്ള വികസന പ്രവർത്തനങ്ങൾ തിരുവനന്തപുരം നഗരത്തിൽ അടിച്ചേൽപ്പിക്കാൻ അനുവദിക്കില്ല. വികസന - സാംസ്കാരിക സൂചികകളിൽ ഗുജറാത്തിനേക്കാൾ ഏറെ മുകളിൽ ആണ് കേരളവും തിരുവനന്തപുരവും. വികസനത്തിനായി അഹമ്മദാബാദ് നഗരത്തെ കണ്ടെത്തേണ്ട ഒരു ഗതികേടും തിരുവനന്തപുരം നഗരസഭയ്ക്കില്ല. ജനസംഖ്യാശാസ്ത്രപരമായും സാംസ്കാരികമായും ഭക്ഷണരീതികളിലും ജീവിതശൈലിയിലും സാമൂഹിക-സാമ്പത്തിക സാഹചര്യങ്ങളിലും ഈ രണ്ട് നഗരങ്ങളും തമ്മിൽ വലിയ വ്യത്യാസങ്ങളുണ്ട്. തിരുവനന്തപുരം നഗരസഭ ഭരണസിരാകേന്ദ്രവും ഇടത്തരക്കാരുടെയും സർക്കാർ സർവീസ് മേഖലയിലെ ജീവനക്കാരുടെയും നഗരമാണ്. വിദേശ പ്രതിനിധികൾ സന്ദർശിക്കുമ്പോൾ അഹമ്മദാബാദിലെ അവികസിത ചേരികൾ തുണികൾ കൊണ്ട് മറയ്ക്കുന്ന കാഴ്ച നാം കണ്ടതാണ്. ജനതയെ വിവിധ തട്ടുകളായി വിഭജിക്കുന്ന വികസനം അല്ല തിരുവനന്തപുരത്തിന് വേണ്ടത്.
തിരുവനന്തപുരം നഗരസഭയിൽ നടക്കാൻ സാധ്യമല്ലാത്ത തിരുമാനങ്ങൾ അടിച്ചേൽപ്പിച്ച് വികസനത്തിനോ അടിസ്ഥാന സൗകര്യങ്ങൾക്കോ സാങ്കേതിക വിദ്യയ്ക്കോ യാതൊരു നേട്ടവും ലഭിക്കുന്നില്ല. നടക്കാത്ത കാര്യങ്ങൾ അടിച്ചേൽപ്പിക്കാൻ നോക്കുന്നതിന് പകരം, നിലവിലുള്ള സംവിധാനങ്ങൾ മെച്ചപ്പെടുത്തുകയും ജനങ്ങൾക്ക് മികച്ചസേവനങ്ങൾ ഉറപ്പാക്കുകയുമാണ് വേണ്ടത്. ബിജെപി സംസ്ഥാന നേതൃത്വം വികസനത്തിന്റെ ഈ തലതിരിഞ്ഞ മാതൃകയെ സംബന്ധിച്ച് അവരുടെ നിലപാട് വ്യക്തമാക്കണം. ഈ വിഷയത്തിൽ തിരുവനന്തപുരം നഗരത്തിലെ ജനങ്ങളുടെ താൽപ്പര്യങ്ങൾ സംരക്ഷിക്കുന്നതിനായി ശക്തമായ പ്രതിരോധം തീർക്കുമെന്ന് വി ശിവൻകുട്ടി പറഞ്ഞു.









0 comments