ചരിത്രം ഇഴ ചേർത്ത് തുന്നിയ ചിത്രങ്ങൾ

എഴുപതുകളുടെ ചുറുചുറുക്കുമായി ഉമാറാണി ഷണ്മുഖം സൂചിയിൽ കോർക്കുന്നത് വെറും നൂലുകളല്ല, ജീവിതസമരങ്ങളും കാലവും അതിജീവനവും ഒരു നാടിന്റെ ഇഴമുറിയാതെ കണ്ണിചേരുന്ന ചരിത്രവുമാണ്. ​കൊല്ലം ആശ്രാമം ഏയ്റ്റ് പോയിന്റ് ആർട്ട് കഫേയിൽ ടികെഎം ആർട്‌സ് ആൻഡ് സയൻസ് കോളേജിലെ മുൻ അധ്യാപിക ശാന്ത ടീച്ചറോടൊപ്പം ‘അ' എന്ന പേരിൽ സംഘടിപ്പിച്ച ചിത്രത്തുന്നൽ പെയിന്റിങ് പ്രദർശനം നിരൂപകപ്രശംസയും ജനശ്രദ്ധയും നേടിയതിന്റെ വലിയ സന്തോഷത്തിലാണ്.

​വിവിധ ഭാഷകളിലായി ഭരണഘടനാ ആമുഖം കൈകൊണ്ട്‌ തുന്നിയെടുത്തതും വിവിധ പാറ്റേണുകളിലെ ചിത്രത്തുന്നലുകളുമാണ് ഉമാറാണി ഷണ്മുഖത്തിന്റെ പ്രദർശനത്തിനുള്ളത്.

​അതിജീവനം

​പഴയ തിരുവിതാംകൂറിന്റെ ഭാഗമായിരുന്ന നാഗർകോവിലിലായിരുന്നു ഉമ ടീച്ചറുടെ ജനനം. സാമ്പത്തികമായും സാമൂഹികമായും പിന്നാക്കമായിരുന്ന തീരദേശത്തെ ജനതയെ കൈപിടിച്ചുയർത്താൻ മിഷണറിമാരും പാതിരിമാരും പരിശ്രമിക്കുന്ന കാലഘട്ടം. ദാരിദ്ര്യവും തൊഴിലില്ലായ്‌മയുംകൊണ്ട്‌ പൊറുതിമുട്ടിയ ജീവിതങ്ങളായിരുന്നു കാഴ്ച. പുരുഷന്മാരുടെ മദ്യപാനവും പട്ടിണിയുംകൊണ്ട് അതിജീവനം അസാധ്യമായി മാറി ഇരുളിലാണ്ടുപോകുന്ന സ്ത്രീകൾക്ക് വരുമാനമാർഗം എന്ന രീതിയിലാണ് മിഷണറിമാരുടെ നേതൃത്വത്തിൽ സ്ത്രീകളെ കരകൗശല ചിത്രപ്പണികൾ പഠിപ്പിക്കാൻ ആരംഭിച്ചത്‌. ഉമാറാണി പഠിച്ചിരുന്ന നാഗർകോവിൽ സെന്റ് ജോസഫ് കോൺവന്റിലെ ബൽജിയത്തിൽനിന്ന്‌ വന്ന കന്യാസ്ത്രീകൾ എംബ്രോയ്‌ഡറി, ക്രോസ്‌സ്റ്റിച്ച്, റേന്ത, ലേസ് വർക്കുകൾ, കെയിൻ വർക്കുകൾ, പ്ലാസ്റ്റിക് ബാഗ് വർക്കുകൾ തുടങ്ങിയവ പെൺകുട്ടികളെ പഠിപ്പിക്കാൻ ആരംഭിച്ചു. വീടുകളിൽ സ്വന്തമായി ചെയ്യുന്ന കരകൗശലവസ്തുക്കൾക്ക് വിദേശത്ത്‌ ഉൾപ്പെടെ മാർക്കറ്റ് കണ്ടെത്താനും മിഷണറിമാർ സഹായിച്ചു.

ശാന്ത ടീച്ചറും ഉമാറാണി ഷണ്മുഖവും

അവിടെനിന്ന്‌ വിവാഹം കഴിച്ച്‌ കൊല്ലം, തിരുവനന്തപുരം, പത്തനംതിട്ട, കോട്ടയം ജില്ലകളിലേക്ക് വന്ന പെൺകുട്ടികൾ അവർ പഠിച്ച കൈത്തൊഴിലുകൾക്ക്‌ അവരെത്തിയ സ്ഥലങ്ങളിലും പ്രചാരം നൽകി. കൊല്ലം ജില്ലയിൽ ഇരവിപുരത്തെ തീരപ്രദേശത്ത്‌ വൈവാഹികബന്ധംവഴി എത്തിയ ധാരാളംപേർ ഇരവിപുരം റേന്ത എന്ന പേരിൽ ലോകപ്രശസ്തമായ ലേസ് വർക്കുകൾ ആരംഭിച്ചു. അതൊരു സഹകരണമുന്നേറ്റമാവുകയും ചെയ്തു. അവരുടെ ഉൽപ്പന്നങ്ങൾ കടൽ കടന്നു.

​ഭരണഘടനയിൽ വിരൽ തൊടുമ്പോൾ

​പത്താംക്ലാസ് പൂർത്തിയാക്കുന്നതിനുമുമ്പ് കല്യാണം കഴിഞ്ഞ് കൊല്ലം ജില്ലയിലേക്ക് ഉമാറാണി എത്തി. ​കൊല്ലം ജില്ലയിലെ ആദ്യ സ്റ്റുഡിയോ ആയ ഷണ്മുഖം സ്റ്റുഡിയോ നടത്തിയിരുന്ന സുന്ദരൻ മുതലാളിയുടെ എട്ടു മക്കളിൽ രണ്ടാമനും കൊല്ലം എസ്എൻ കോളേജിലെ ആദ്യകാല കൊമേഴ്സ് പോസ്റ്റ് ഗ്രാജ്വേറ്റുമായിരുന്ന രവി സുന്ദരമാണ് നാഗർകോവിലിൽനിന്ന്‌ ഉമാറാണിയെ കൈപിടിച്ച് കൊല്ലത്തേക്ക് കൊണ്ടുവന്നത്. ചിത്രത്തുന്നൽ പരിശീലിക്കാനോ അതിനുവേണ്ടി സമയം കണ്ടെത്താനോ സാധിക്കാത്തവിധം കുടുംബജീവിതത്തിന്റെ തിരക്കുകളിൽ സ്വയമലിഞ്ഞുപോയപ്പോൾ പഴയ കൈവഴക്കവും കൈമോശം വന്നു. ഒടുവിൽ കോവിഡ് സമയത്താണ് വീണ്ടും സൂചിയും നൂലും കൈയിലേക്കെടുക്കുന്നത്. മക്കളും ചെറുമക്കളുമൊക്കെ ആയശേഷം പഴയ ചിത്രത്തുന്നൽ ഗൗരവമായി കണ്ടു.

ഉമ ടീച്ചറുടെ പേരക്കുട്ടികളായ ഗവ. ലോ കോളേജ് യൂണിയൻ ജനറൽ സെക്രട്ടറി സായിറാമിന്റെയും പട്ടത്താനം ഗവ. എസ്എൻഡിപി യുപിഎസിലെ ആറാംക്ലാസ് വിദ്യാർഥി സായിനാഥിന്റെയും ഭരണഘടനാചർച്ചകളാണ് ഭരണഘടനയുടെ ആമുഖം കൈകൊണ്ട്‌ തുന്നിയെടുക്കാൻ പ്രചോദനം. അധ്യാപകനും ദേശാഭിമാനി മുൻ ഫോട്ടോഗ്രാഫറുമായിരുന്ന കണ്ണൻ ഉൾപ്പെടെയുള്ള മക്കളുടെ പൂർണപിന്തുണ ഇപ്പോൾ ഉമാറാണിക്കുണ്ട്. പ്രതികൂല ജീവിതസാഹചര്യങ്ങളിൽനിന്ന്‌ സ്വായത്തമാക്കിയ കല ഇന്ന് അതിന്റെ ഉന്നതികളിൽ അടയാളപ്പെടുത്തുകയാണ്.

​നാലാംക്ലാസുകാരി സഹപാഠി

​പേരക്കുട്ടിയുടെ പ്രചോദനത്തിൽ വീണ്ടും ബ്രഷും ചായക്കൂട്ടുകളും കൈയിലെടുത്ത് 73–ാം വയസ്സിൽ എക്സിബിഷനിൽ പങ്കാളിയായിരിക്കുകയാണ് ടികെഎം ആർട്‌സ് കോളേജിലെ അധ്യാപിക ശാന്ത ടീച്ചർ. ​ ജീവിതത്തിരക്കിനിടയിൽ എങ്ങോ എന്നോ മറന്നുപോയ ചായങ്ങൾ പൊടിതട്ടി എടുക്കാൻ കാരണം പേരക്കുട്ടി നേഹയാണ്. വാർധക്യം രണ്ടാംബാല്യമാണെന്ന്‌ പറഞ്ഞാണ് ടീച്ചർക്ക്‌ തിരുവനന്തപുരം പട്ടത്തുള്ള കലാഗ്രാമത്തിൽ ചിത്രരചനാ കോഴ്സിന് അഡ്മിഷനെടുത്ത്‌ നൽകിയത്.

​മൂന്നുവയസ്സുമുതലുള്ള കുട്ടികളാണ് ക്ലാസിൽ ടീച്ചറുടെ സഹപാഠികൾ. ഒരേ ബെഞ്ചിൽ ഒരു നാലാംവയസ്സുകാരിക്കൊപ്പമാണ് ടീച്ചറുടെ ചിത്രരചനാ പഠനം. പഠനത്തിനിടയിൽ കലാഗ്രാമം ഡയറക്ടറായ രാജീവ് കൃഷ്ണന്റെ പിന്തുണയിലാണ് പ്രദർശനത്തിൽ പങ്കാളിയായത്.

ഒന്നുമുതൽ മൂന്നുമാസംവരെ സമയമെടുത്തു. അക്രിലിക് കളറുകൾ ഉപയോഗിച്ച് ക്യാൻവാസിൽ വരച്ച 24 ചിത്രങ്ങളാണ് പ്രദർശനത്തിനുള്ളത്. അടിയന്തരാവസ്ഥക്കാലത്ത്‌ സിൻഡിക്കറ്റ് സ്ഥാനാർഥിയും എസ്എൻ കോളേജിലെ എസ്എഫ്ഐയുടെ ആദ്യകാല ആർട്‌സ് ക്ലബ് സെക്രട്ടറിയുമായിരുന്ന ഭർത്താവ്‌ ഡോ. രസലുദീൻ പൂർണപിന്തുണയുമായി ടീച്ചർക്കൊപ്പമുണ്ട്.