നിലയ്‌ക്കില്ല ഈ ശബ്‌ദം; സംഗീതലോകത്ത്‌ സജീവമായി ശുഭ

ഒരിക്കൽ നിലച്ചുപോയെന്ന്‌ നിനച്ച ശബ്‌ദതാളങ്ങൾ. ദൃഢനിശ്‌ചയവും മനസ്സിന്റെ ആഗ്രഹവുംകൊണ്ട്‌ തിരികെ പിടിച്ചപ്പോൾ എല്ലാം ശുഭം. പന്തളം ശുഭ രഘുനാഥ്. നാടകപിന്നണി ഗാനങ്ങളുമായി ആസ്വാദക ഹൃദയങ്ങളിൽ ഇടംപിടിച്ച ഗായിക. ഏറെ നീണ്ട തന്റെ സംഗീത ജീവിതത്തിനിടയിൽ ഈ ഗായിക പാടിയ പാട്ടുകളാകട്ടെ എണ്ണമറ്റതും. ഗാനമേള, നാടകം, സിനിമ, സീരിയൽ, ആൽബം തുടങ്ങി സംഗീതത്തിന്റെ എല്ലാ മേഖലകളിലും തന്റെ ഗാനാലാപനംകൊണ്ട് ശ്രദ്ധേയയായ കലാകാരിയാണ്‌. പക്ഷാഘാതവും പിന്നീട്‌ കേൾവിശക്തിയെയും ബാധിച്ചപ്പോൾ അതെല്ലാം മറികടന്ന്‌ സംഗീതത്തെ അത്രമേൽ ഹൃദയത്തോട്‌ ചേർത്തുപിടിച്ച്‌ ശുഭ തന്റെ യാത്ര തുടർന്നു. മൂന്നു വർഷത്തെ അനാരോഗ്യത്തിനുശേഷം വീണ്ടും സംഗീതലോകത്ത്‌ സജീവമായിരിക്കുകയാണ്‌ ശുഭ.

സംഗീതം തൊട്ട്‌

സംഗീത കുടുംബത്തിലാണ് ശുഭയുടെ ജനനം. സ്‌കൂൾ കലോത്സവങ്ങളിലൂടെ ശുഭ സംഗീതലോകത്തേക്ക്‌ എത്തി. മൂന്നാം ക്ലാസിൽ പഠിക്കുമ്പോൾമുതൽ പരിപാടികൾ അവതരിപ്പിച്ചു തുടങ്ങി. വെൺമണി സുകുമാരൻ-, പന്തളം ജി പ്രദീപ് കുമാർ എന്നിവർ സംഗീതഗുരുക്കന്മാരാണ്. ഹൈസ്കൂളിൽ പഠിക്കുമ്പോൾ സംഗീത മത്സരങ്ങളിലൂടെ ജില്ലാ കലാതിലകമായി. പത്താം ക്ലാസ്‌ മുതൽ റെക്കോഡിങ് ഗാനരംഗത്തും ശ്രദ്ധ നേടി. അടൂർ ഭരതയുടെ ‘ചക്രവ്യൂഹം’ എന്ന നൃത്ത നാടകത്തിലൂടെയാണ്‌ അരങ്ങേറ്റം. അടൂർ സണ്ണിയാണ് റെക്കോഡിങ്ങിൽ ആദ്യ അവസരം നൽകിയതെന്ന് ശുഭ പറയുന്നു. ഇതിനിടയിൽ ഗാനമേളയിൽ തുടർച്ചയായി പാടി. തുടർന്നാണ്‌ നാടകഗാനങ്ങളിലേക്കുള്ള എത്തിപ്പെടൽ. പന്തളം ബാലനൊപ്പമായിരുന്നു തുടക്കം. പിന്നീട് പത്തു വർഷം പത്തനംതിട്ട സാരംഗിൽ. 1994ൽ സ്വാതി തിരുനാൾ സംഗീത കോളേജിൽനിന്ന്‌ ഗാനഭൂഷണം പാസായി. സംഗീത കോളേജിലും കലാതിലകമായിരുന്നു ശുഭ. കഴിഞ്ഞ 30 വർഷമായി പ്രൊഫഷണൽ നാടക ഗാനരംഗത്ത് സജീവ സാന്നിധ്യമായി പിന്നണി ഗായികയായി പ്രവർത്തിക്കുന്നു.

പുരസ്‌കാരപ്പെരുമ

മികച്ച ഗായികയ്‌ക്കുള്ള കേരള സംഗീത നാടക അക്കാദമിയുടെ പുരസ്‌കാരം അഞ്ചുതവണ ശുഭയ്‌ക്ക്‌ ലഭിച്ചിട്ടുണ്ട്‌. കൊല്ലം കാളിദാസ കലാകേന്ദ്രത്തിന്റെ ‘രമണൻ’ നാടകത്തിൽ മികച്ച ഗായികയ്‌ക്കുള്ള പുരസ്‌കാരം ലഭിച്ചു. 2016ൽ കോഴിക്കോട്‌ രംഗഭാഷയുടെ ‘ കുടുംബനാഥന്റെ ശ്രദ്ധയ്‌ക്ക്‌’, 2017ൽ കൊല്ലം കാളിദാസ കലാകേന്ദ്രത്തിന്റെ ‘കരുണ’, ഓച്ചിറ സരിഗയുടെ ‘ ‘രാമേട്ടൻ’ എന്ന നാടകങ്ങൾക്കും അവാർഡ്‌ ലഭിച്ചു. 2018ൽ ഓച്ചിറ നാടകരംഗത്തിന്റെ ‘ ഇവൻ നായിക’ എന്ന നാടകത്തിലെ ‘രാമായണം കൊത്തിയ വളകളിട്ട്‌ ’ എന്നു തുടങ്ങുന്ന ഗാനത്തിനും പുരസ്‌കാരം ലഭിച്ചു. അഞ്ചൽ ഉദയകുമാറിന്റെ സംഗീത സംവിധാനത്തിൽ രമേശ്‌ കാവിലിന്റേതാണ്‌ രചന. 2023ൽ കൊല്ലം കാളിദാസ കലാകേന്ദ്രത്തിന്റെ ‘ചന്ദ്രികയ്‌ക്കുമുണ്ടൊരു കഥ’ , കൊച്ചിൻ ചൈത്രതാരയുടെ ‘ഞാൻ’ എന്നീ നാടകങ്ങൾക്കും കേരള സംഗീത നാടക അക്കാദമിയുടെ മികച്ച ഗായികയ്‌ക്കുള്ള പുരസ്‌കാരം ലഭിച്ചു.

ആലപ്പി വിവേകാനന്ദന്റെ സംഗീതത്തിൽ രമേശ്‌ കാവിൽ എഴുതിയ ‘രാമേട്ടൻ’ നാടകത്തിൽ "കൊണ്ടുവന്നു നിനക്ക്‌ തരുവാൻ’ എന്ന ഗാനം ഏറെ ശ്രദ്ധേയമായിരുന്നു. കൈപ്പട്ടൂർ അച്യുതൻ, കുമരകം രാജപ്പൻ, വൈപ്പിൻ സുരേന്ദ്രൻ, ആലപ്പി വിവേകാനന്ദൻ, അഞ്ചൽ വേണു, ബിജു അനന്തകൃഷ്ണൻ, കരുനാഗപ്പള്ളി ബാലമുരളി, അഞ്ചൽ ഉദയകുമാർ, കൊട്ടാരക്കര ഷാജി തുടങ്ങി ഒട്ടേറെ സംഗീത സംവിധായകർക്കൊപ്പം പ്രവർത്തിച്ചു. 2016ൽ കോഴിക്കോട് രംഗഭാഷയുടെ ‘കുടുംബനാഥന്റെ ശ്രദ്ധയ്ക്ക് ’ എന്ന നാടകത്തിലെ താരാട്ടുപാട്ട് ആസ്വാദകർ ഇന്നും ഓർമിക്കുന്നു.

കാളിദാസ കലാകേന്ദ്രത്തിന്റെ "എന്തിനീ ചിലങ്കകൾ', ‘സമയമായില്ലാ പോലും' എന്നീ ഗാനങ്ങളും ഓച്ചിറ സരിഗയുടെ ‘രാമേട്ടൻ’ നാടകത്തിലെ "കൊണ്ടുവന്നു നിനക്ക് തരുവാൻ രണ്ടു മധുരമിഠായികൾ’ എന്നീ ഗാനങ്ങളും ശുഭയിലെ ഗായികയെ മിഴിവുറ്റതാക്കി. അനിൽ വി നാഗേന്ദ്രൻ സംവിധാനം ചെയ്‌ത ‘വസന്തത്തിന്റെ കനൽ വഴികൾ, തീ എന്നീ സിനിമകളിലും പാടിയിട്ടുണ്ട്‌. തീ എന്ന സിനിമയിലെ ‘നീലക്കുറിഞ്ഞിക്ക്‌ കന്നിനിലാവിന്റെ' പ്രേംനസീർ ചലച്ചിത്ര പുരസ്‌കാരം നേടി.

സ്ത്രീജന്മം, സ്വാമി അയ്യപ്പൻ, ദയ തുടങ്ങി ഒട്ടേറെ പ്രമുഖ സീരിയലുകളുടെയും ടൈറ്റിൽ സോങ്ങുകളിലൂടെയും ശുഭ പ്രേക്ഷകർക്ക് പ്രിയങ്കരിയായി. കെ എസ് ചിത്ര, അരുന്ധതി, കല്ലറ ഗോപൻ, ശ്രീറാം, കാവാലം ശ്രീകുമാർ തുടങ്ങി നിരവധി പ്രമുഖർക്കൊപ്പവും വേദികൾ പങ്കിട്ടു.

വെഞ്ഞാറമൂട് രാമചന്ദ്രൻ അവാർഡ് ആറ്‌ വർഷവും നേടാനായി. മറ്റ്‌ നിരവധി പുരസ്‌കാരങ്ങളും ശുഭയെ തേടിയെത്തി.

വെൺമണി സുകുമാരൻ, പന്തളം ജി പ്രദീപ്‌ കുമാർ എന്നിവരുടെ അടുത്താണ്‌ സംഗീതം പഠിച്ചിരുന്നത്‌. സംഗീത വഴികളിൽ കൈപിടിച്ച എല്ലാ ഗുരുക്കന്മാരെയും നന്ദിയോടെ ഓർമിക്കുന്നതായി ശുഭ പറയുന്നു.

എന്നും നന്ദി

ഹംസധ്വനി സ്‌കൂൾ ഓഫ്‌ മ്യൂസിക്‌ എന്ന സ്ഥാപനം നടത്തുന്നു. ബാൻഡ്‌ ദ്രുത എന്ന പേരിൽ മ്യൂസിക്‌ ഷോസും നടത്തുന്നു. അസുഖബാധിതയായി പാടാനാകാതിരുന്ന ആ നാളുകളെക്കുറിച്ച്‌ പറയുമ്പോൾ ഇന്നും ശുഭയുടെ വാക്കുകൾ മുറിയുന്നു. പ്രതിസന്ധി ഘട്ടത്തിൽ കൂടെനിന്ന, സംഗീതത്തിലേക്കുള്ള തിരിച്ചുവരവ് സാധ്യമാക്കിയ കലാകാര സുഹൃത്തുകൾ, കലാകാര സംഘടനയായ സാ (സിങ്ങിങ്‌ ആർട്ടിസ്റ്റ് അസോസിയേഷൻ കേരള), കാഫ് (കേരള ആർട്ടിസ്‌റ്റ്സ് ഫ്രെട്ടേണിറ്റി), പിന്നണി ഗായകരുടെ സംഘടന സമം, പ്രശസ്ത പിന്നണിഗായകനും സമം പ്രസിഡന്റുമായ സുദീപ് കുമാർ എന്നിവരോടും ശുഭ പ്രത്യേകം നന്ദി പറയുന്നു.

ഭർത്താവ്‌ രഘുനാഥും മകൻ ദേവദർശനും അടങ്ങുന്നതാണ്‌ കുടുംബം. ബിരുദ വിദ്യാർഥിയായ ദേവദർശനും ഗായകനാണ്‌. കരുനാഗപ്പള്ളി ഇടക്കുളങ്ങരയിൽ ‘ദേവവിലാസ’ത്തിൽ താമസം.