ജലവ്യായാമ ചികിത്സയുമായി ഷീബ ഡോക്‌ടർ

എന്തിനുമേതിനും നീന്തലാണ്‌ പോംവഴിയെന്ന്‌ ഇതാ ഒരു ഡോക്‌ടർ പറയുന്നു. അമിതവണ്ണം, നടുവേദന, ജീവിതശൈലീ രോഗങ്ങൾ തുടങ്ങി എന്തുമാകട്ടെ, വരൂ, നീന്തൽ പരിശീലിക്കൂ, അതും സൗജന്യമായി. പെരിന്തൽമണ്ണ, എരവിമംഗലത്ത് ഡോ. ഷീബ കൃഷ്ണദാസിന്റെ അമൃതം പൊയ്ക എന്ന വിശാലമായ നീന്തൽക്കുളത്തിൽ പരിശീലനം നേടിയവർ നിരവധിയാണ്‌. സ്ത്രീകൾമാത്രം ആറായിരത്തിലധികം പേർ ഈ ആയുർവേദ ഡോക്‌ടറിൽനിന്ന്‌ നീന്തൽ പരിശീലനം നേടിയിട്ടുണ്ട്‌. ജല വ്യായാമമാണ്‌ -ഡോ. ഷീബയുടെ ഏറെ ശ്രദ്ധേയമായ ചികിത്സാ രീതി. മോട്ടോർ വാഹന അപകടത്തിൽപ്പെട്ടവർ, പുനരധിവാസ ചികിത്സ ആവശ്യമുള്ളവർക്കെല്ലാം ജല വ്യായാമം ഉത്തമമെന്ന്‌ തെളിയിക്കപ്പെട്ടിട്ടുണ്ട്‌. 20 വർഷത്തിലധികമായി ഡോ. ഷീബ നീന്തൽ പരിശീലനത്തിൽ സജീവമാണ്. ഇതിനിടയ്ക്ക് സന്നദ്ധ, സാമൂഹ്യ പ്രവർത്തനങ്ങളിലും പങ്കുകൊള്ളുന്നുണ്ട്‌. വർധിച്ചുവരുന്ന മുങ്ങിമരണങ്ങൾക്ക് പരിഹാരമെന്നോണമാണ്‌ അമൃതം പൊയ്ക എന്ന വിശാലമായ നീന്തൽക്കുളം സ്വന്തം സ്ഥലത്ത് നിർമിച്ചത്‌. രാവിലെ 7 മുതൽ 9 വരെയാണ്‌ പരീശീലനം.

സ്ത്രീ ചികിത്സാ മേഖലയിൽ വേറിട്ട വ്യക്തിത്വത്തിനുടമയായ ഷീബ 1982ൽ വൈദ്യരത്നം പി എസ് വാര്യർ കോട്ടക്കൽ ആയുർവേദ കോളേജിൽനിന്ന്‌ ബിഎഎംഎസ് പാസായി. ഡോ. സുരേന്ദ്രവാര്യരുടെ ചികിത്സാ സംഗ്രഹം ക്ലാസുകൾ, ഡോ. അഗ്നിവേശന്റെ മൂലസിദ്ധാന്തം എന്നിവയാണ് ഏറെ ഇഷ്ടപ്പെട്ടതെന്ന് ഡോ. ഷീബ കൃഷ്ണദാസ് പറയുന്നു.

ഡോ. അമൃതം കൃഷ്ണദാസാണ് ഭർത്താവ്. ഇദ്ദേഹം പ്രൈവറ്റ് ആയുർവേദ മെഡിക്കൽ പ്രാക്ടിഷണേഴ്‌സ് അസോസിയേഷൻ (പമ്പ) മുൻ സംസ്ഥാന പ്രസിഡന്റാണ്. പെരിന്തൽമണ്ണ മൗലാന ആശുപത്രിയിലെ ഗ്യാസ്ട്രോ എന്ററോളജിസ്റ്റ് ഡോ. സുശ്രുത് കൃഷ്ണദാസ്, ഡൽഹി ഡബ്ല്യൂഎച്ച്ഒടിബി പ്രോജക്റ്റിൽ ജോലി ചെയ്യുന്ന ഡോ. കശ്യപ് കൃഷ്ണദാസ് എന്നിവരാണ് മക്കൾ.