മോണലോവയ്ക്ക് താഴ് വീഴുമ്പോൾ

ഹവായിയിലെ പ്രശസ്തമായ മോണാലോവ (MonauLoa) അന്താരാഷ്‌ട്ര അന്തരീക്ഷ നിരീക്ഷണകേന്ദ്രം അടച്ചുപൂട്ടാൻ അമേരിക്കയിലെ ട്രംപ് ഭരണകൂടം നീക്കം ആരംഭിച്ചു. ആദ്യപടിയായി ഇതിനായുള്ള ഫണ്ട്‌ വെട്ടിക്കുറച്ചു. ശാസ്ത്രസമൂഹത്തിലും അന്താരാഷ്ട്ര കാലാവസ്ഥാ നിരീക്ഷണ സംവിധാനങ്ങളിലും വലിയ പ്രതിഫലനമുണ്ടാകുന്നതാണ്‌ ഈ തീരുമാനം.
ശാസ്ത്രത്തിന്റെ നിരീക്ഷണ കണ്ണാടി
1958 മുതൽ പ്രവർത്തനം ആരംഭിച്ച മോണാലോവ അന്തരീക്ഷ നിരീക്ഷണകേന്ദ്രം ഭൂമിയിലെ കാർബൺ ഡൈഓക്സൈഡിന്റെ അളവ് കൃത്യമായി നിരീക്ഷിച്ചു വരികയായിരുന്നു.  ഇത്തരത്തിൽ ലഭിക്കുന്ന നിരീക്ഷണ സ്ഥിതിവിവര കണക്കുകൾ ‘Keeling Curve’ എന്ന ഗ്രാഫിന്‌ വഴിയൊരുക്കി. കാലാവസ്ഥാ നിരീക്ഷണ പ്രക്രിയയിലെ മുന്നേറ്റത്തിന്റെ നാഴികക്കല്ലായി കീലിങ്‌ കർവ്  കണക്കാക്കുന്നു. ഇടതടവില്ലാതെ ഡാറ്റാശേഖരണമാണ്‌ മോണാലോവ കേന്ദ്രത്തിന്റെ  പ്രത്യേകത.  ഹരിതഗൃഹ വാതകങ്ങൾ ഉയർത്തുന്ന വെല്ലുവിളികൾ ഉൾപ്പെടെ കാലാവസ്ഥാ മാറ്റങ്ങളുടെ വിവരങ്ങൾ കൃത്യമായി നിരീക്ഷിക്കാൻ ഈ കേന്ദ്രം സഹായകമായി. ലോക രാജ്യങ്ങൾക്ക്‌ മുന്നറിയിപ്പായി ഈ വിവരങ്ങൾ.
ഭരണകൂട നടപടികളും ബജറ്റ്‌ വെട്ടിച്ചുരുക്കലും
2025–26 സാമ്പത്തികവർഷത്തെ നാഷണൽ ഓഷ്യാനിക്‌ ആൻഡ് അറ്റ്മോസ്ഫിയറിക് അഡ്മിനിസ്ട്രേഷന്റെ (NOAA) ബജറ്റിൽ കാലാവസ്ഥാ ഗവേഷണത്തിനുള്ള വിഹിതം ഒഴിവാക്കാനുള്ള തീരുമാനമാണ് ഇത്തരമൊരവസ്ഥയിലേക്ക്‌ എത്തിച്ചത്‌. മോണാലോവ നിരീക്ഷണത്തിന്‌ തുണയാകുന്ന ഹിലോ (Hilo) ലാബിന്റെ നടത്തിപ്പിനായുള്ള കരാർ പുതുക്കലും തടസ്സപ്പെടാനിടയുണ്ട്.  അങ്ങനെവന്നാൽ, ആഗസ്ത്‌ 31നുശേഷം ഹിലോയുടെ പ്രവർത്തനം പൂർണമായി നിർത്തിയേക്കും. ഭരണനിർവഹണം, ഉപകരണങ്ങളുടെ നിർമാണം, ഡാറ്റാവിശകലനം എന്നിവ നടത്തുന്നത്‌ ഹിലോ ലാബാണ്. മോണാലോവ നിരീക്ഷണാലയത്തിന്റെ ഒഴിവാക്കാനാകാത്ത ഭാഗമാണ്‌  ഹിലോ. അമേരിക്കൻ ശാസ്ത്രജ്ഞരടക്കം അന്താരാഷ്ട്ര വിദഗ്‌ധർക്കിടയിൽ വലിയ ആശങ്കയാണ്‌ തീരുമാനം സൃഷ്ടിച്ചിരിക്കുന്നത്‌. ലോകത്ത് കാലാവസ്ഥാ വിവരങ്ങൾ പുനർനിർമിക്കാനാകില്ല. ഏതാനും മാസങ്ങളുടെപോലും ഡാറ്റ നഷ്ടപ്പെട്ടാൽ വലിയ പ്രതിസന്ധികൾ സൃഷ്ടിക്കും.സ്ഥിതിവിവരക്കണക്കുകളുടെ തുടർച്ച അനിവാര്യമാണ്‌. ഹരിതഗൃഹ വാതകങ്ങൾ സൃഷ്ടിക്കുന്നതിലും അതിന്‌ അനുകൂലമായ നയങ്ങൾ സ്വീകരിക്കുന്നതിലും അമേരിക്കയടക്കമുള്ള രാജ്യങ്ങൾ പ്രതിക്കൂട്ടിൽ നിൽക്കുമ്പോഴാണ്‌ മോണാലോവ കേന്ദ്രത്തിനെതിരായ നീക്കങ്ങൾ എന്നതും പ്രത്യേകം എടുത്തുപറയണം.
ചാൾസ് ഡേവിഡ് കീലിങ്‌
അന്തരീക്ഷത്തിലെ കാർബൺ ഡൈഓക്സൈഡിന്റെ തോതിന്‌ ഭൗമാന്തരീക്ഷ താപനിലയെ സ്വാധീനിക്കാനാകുമെന്നും  അത് കാലാവസ്ഥാ മാറ്റത്തിന് കാരണമാകും എന്നും വ്യക്തമാക്കി  ആദ്യത്തെ ശാസ്ത്ര പ്രബന്ധം 1896 ലാണ് പ്രസിദ്ധീകരിച്ചത്‌. എന്നാൽ, ഭൗമാന്തരീക്ഷത്തിൽ മനുഷ്യന്റെ ഇടപെടലുകൾ കാലാവസ്ഥയിൽ സൃഷ്ടിക്കുന്ന ആഘാതങ്ങൾ 1950കൾവരെ കൃത്യമായി നിരീക്ഷണ  വിധേയമാക്കാൻ കഴിഞ്ഞിരുന്നില്ല. ശാസ്ത്രജ്ഞനായ ചാൾസ് ഡേവിഡ് കീലിങ്‌ 1956ൽ ഹവായ്  ദ്വീപിലെ മോണാലോവയിൽ അന്തരീക്ഷത്തിലെ കാർബൺ ഡൈഓക്സൈഡിന്റെ അളവ്‌ നിരീക്ഷിക്കാൻ കേന്ദ്രം സ്ഥാപിച്ചു.   പസഫിക് സമുദ്ര മധ്യത്തിൽ ജനവാസകേന്ദ്രങ്ങളിൽനിന്നും ഒഴിഞ്ഞ ശാന്തമായ ഒരു പ്രദേശത്താണിത്‌. മോണാലോവ അഗ്നിപർവതത്തിന്റെ വടക്കേചെരുവിൽ സമുദ്രനിരപ്പിൽനിന്ന് 11,135 അടി ഉയരത്തിൽ സ്ഥിതിചെയ്യുന്ന ഈ പർവതപ്രദേശം, മലിനീകരണ വിമുക്തവും നിരീക്ഷണകേന്ദ്രം സ്ഥാപിക്കാൻ അനുയോജ്യവുമായിരുന്നു.  അന്നുമുതൽ മോണാലോവയിൽനിന്നും ശേഖരിച്ച കാർബൺ ഡൈഓക്‌സൈഡിന്റെ സ്ഥിതിവിവരക്കണക്കുകൾ പരിശോധിച്ചാൽ കാലാവസ്ഥാ വ്യതിയാനത്തിന്റെ തെളിവുകൾ വ്യക്തമാണ്‌.
കേന്ദ്രം പ്രവർത്തനം ആരംഭിച്ച് ആദ്യവർഷം പുറത്തുവിട്ട വിവരങ്ങൾപോലും ആശങ്കാജനകമായിരുന്നു. ഓരോവർഷവും അന്തരീക്ഷ കാർബൺ ഡൈഓക്സൈഡ് നില നിരന്തരം ഉയർന്നുകൊണ്ടേയിരിക്കുകയാണ്. കാർബൺ ആഗിരണവും കാർബൺ ബഹിർഗമനവും സാധാരണഗതിയിൽ നടക്കുന്നുണ്ടെങ്കിലും അന്തരീക്ഷ കാർബൺ നിലയിൽ കുത്തനെയുള്ള വർധനയാണ് പ്രകടം. മനുഷ്യ പ്രേരിതകാരണങ്ങളാൽ അന്തരീക്ഷത്തിൽ എത്തുന്ന കാർബൺ ഡൈഓക്‌സൈഡിന്റെ ദൂരിഭാഗവും സമുദ്രങ്ങളും വനങ്ങളും ആഗിരണം ചെയ്യുന്നു. എന്നാൽ, ഇപ്രകാരം ആഗിരണംചെയ്യപ്പെടാതെ അവശേഷിക്കുന്ന കാർബൺ അന്തരീക്ഷത്തിൽ തന്നെ നിലനിൽക്കുന്നു.   ഫോസ്സിൽ ഇന്ധനങ്ങളുടെ ജ്വലനം മുഖേനയാണ്‌ അന്തരീക്ഷത്തിൽ അധികതോതിൽ  കാർബൺ എത്തുന്നതെന്ന്‌  സ്ഥിരീകരിക്കപ്പെട്ടിട്ടുണ്ട്.  മോണാലോവ നിരീക്ഷണാലയത്തിന്റെ പക്കൽ 65 ഓളം വർഷങ്ങളുടെ സ്ഥിതിവിവരക്കണക്കുണ്ട്.      
ഒരുപരിധിയോളം ജീവന്റെ നിലനിൽപ്പിന് ഹരിതഗൃഹപ്രഭാവം ആവശ്യമാണ്.  എന്നാൽ, ഹരിതവാതകങ്ങൾ അളവിൽ അധികമായാൽ ഭൂമി ഒരു തീച്ചൂളയ്‌ക്ക് സമാനമാകും.  ഇപ്പോൾ സംഭവിച്ചുകൊണ്ടിരിക്കുന്നതും ഏതാണ്ട് അങ്ങനെതന്നെയാണ്.  
കാലാവസ്ഥാ പ്രവചനം പ്രതിസന്ധിയിലാകും
മോണാലോവപോലുള്ള ആഗോള നിരീക്ഷണാലയത്തിലെ വിവരക്കണക്കുകൾ ലഭ്യമാകാതിരിക്കുകയെന്നത് കാലാവസ്ഥാ ശാസ്ത്രമേഖലയ്‌ക്ക്‌ ആഘാതമാകും. തുടർച്ചയായ സ്ഥിതിവിവരക്കണക്കുകളുടെ അഭാവത്തിൽ കൃത്യമായ കാലാവസ്ഥാ പ്രവചനങ്ങൾ തടസ്സപ്പെടുമെന്നതാണ്‌ പ്രധാനം. ലോക കാലാവസ്ഥാ കരാറുകൾ നിലവാരമുള്ള നിരീക്ഷണ ഡാറ്റ ഇല്ലാതെ ദുർബലമാകുന്ന അവസ്ഥയുണ്ടാകും. പ്രളയം, വരൾച്ച, ചുഴലിക്കാറ്റുകൾ, താപ- ശൈത്യ തരംഗങ്ങൾ തുടങ്ങിയവ മുൻകൂട്ടി പ്രവചിക്കാൻ കഴിയാത്ത സാഹചര്യം സംജാതമാകും. പ്രത്യേകിച്ച്‌ കാലാവസ്ഥാ വ്യതിയാനം സൃഷ്ടിക്കുന്ന പ്രതിസന്ധികൾ രൂക്ഷമായിരിക്കുന്ന അവസ്ഥയിൽ. കാലാവസ്ഥാ വ്യതിയാന പ്രത്യാഘാതങ്ങളെ നേരിടുവാനുള്ള ശ്രമങ്ങൾക്കുനേരെയുള്ള ഒരു വെല്ലുവിളിയാണിത്.