ക്രിക്കറ്റിലെ 'സ്നിക്കോ' ഇനി ഫുട്ബോളിലും; സ്വീഡന്റെ വിവാദ ഗോളിന് പിന്നിലെ അദൃശ്യമായ ആ മൈക്രോചിപ്പ് രഹസ്യം

ലണ്ടൻ: ലോകകപ്പിൽ ഞായറാഴ്ച രാത്രി നടന്ന മത്സരത്തിൽ ട്യുണീഷ്യക്കെതിരെ സ്വീഡൻ നേടിയ നാലാം ഗോൾ അനുവദിച്ചത് ക്രിക്കറ്റിൽ ഉപയോഗിക്കാറുള്ള 'സ്നിക്കോമീറ്റർ' സാങ്കേതികവിദ്യയുടെ സഹായത്തോടെ.

മത്സരത്തിൽ ഒന്നിനെതിരെ അഞ്ച് ഗോളുകൾക്കാണ് സ്വീഡൻ വിജയിച്ചത്. രണ്ടാം പകുതിയിൽ പകരക്കാരനായി ഇറങ്ങി വെറും 18 സെക്കൻഡുകൾക്കകം യാസിൻ അയാരിയുടെ ഫ്രീ കിക്ക് വലയിലെത്തിച്ച് മാറ്റിയാസ് സ്വാൻബെർഗ് ആണ് സ്വീഡനായി ഗോൾ നേടിയത്.

യൂറോപ്യൻ താരം ഇസാക്കിന്റെ 'മാന്ത്രിക സ്പർശം'; ഓഫ്‌സൈഡ് വിധി മാറി

ഫ്രീ കിക്ക് ഉയർന്നു വരുമ്പോൾ സ്വാൻബെർഗ് ഓഫ്‌സൈഡ് പൊസിഷനിലായിരുന്നു എന്ന കാരണത്താൽ റഫറി ആദ്യം ഗോൾ അനുവദിച്ചിരുന്നില്ല. ഇതിനെതിരെ സ്വീഡിഷ് കളിക്കാരും പരിശീലകരും പ്രതിഷേധിച്ചതോടെയാണ് വിഎആർ പരിശോധന നടത്തിയത്.

ക്രിക്കറ്റിലെ സ്നിക്കോമീറ്ററിന് സമാനമായ 'വേവ്ഫോം' സാങ്കേതികവിദ്യ പരിശോധിച്ചപ്പോൾ, ഫ്രീ കിക്ക് വന്നതിന് പിന്നാലെ സ്വീഡന്റെയും ലിവർപൂളിന്റെയും സ്ട്രൈക്കറായ അലക്സാണ്ടർ ഇസാക്കിന്റെ ബൂട്ടിന്റെ പുറംഭാഗം പന്തിൽ നേരിയ രീതിയിൽ തട്ടിയതായി കണ്ടെത്തി.

ഇസാക്കിന്റെ ബൂട്ടിൽ പന്ത് തട്ടുന്ന കൃത്യമായ ആ നിമിഷത്തിൽ സ്വാൻബെർഗ് ഓഫ്‌സൈഡിൽ നിന്നും മാറി ഓൺസൈഡ് പൊസിഷനിലേക്ക് എത്തിയിരുന്നു. ഇതോടെ റഫറി സ്വീഡന് അനുകൂലമായി ഗോൾ അനുവദിക്കുകയായിരുന്നു.

നഗ്നനേത്രങ്ങൾ കൊണ്ട് നോക്കിയാൽ പന്തിൽ ഇസാക്കിന്റെ സ്പർശനം ഉണ്ടായതായി തോന്നില്ലെന്നും, കൃത്യമായ വിധി പുറപ്പെടുവിച്ച വിഎആറിനെയും റഫറിയെയും അഭിനന്ദിക്കുന്നതായും മുൻ റിപ്പബ്ലിക് ഓഫ് അയർലൻഡ് താരം ക്ലിന്റൺ മോറിസൺ പ്രതികരിച്ചു.

എങ്ങനെയാണ് ഫുട്ബോളിൽ ഈ സാങ്കേതികവിദ്യ പ്രവർത്തിക്കുന്നത്?

ക്രിക്കറ്റിലാണ് 'സ്നിക്കോ' സാധാരണയായി ഉപയോഗിക്കാറുള്ളതെങ്കിലും സമീപകാലത്തായി ഫുട്ബോളും ഈ സാങ്കേതികവിദ്യ സ്വീകരിച്ചിട്ടുണ്ട്. ഈ വർഷത്തെ ലോകകപ്പിനായി അഡിഡാസ് നിർമ്മിച്ച 'ട്രിയോണ്ട' മാച്ച് ബോളുകളിൽ ഒരു പ്രത്യേക മൈക്രോചിപ്പ് ഘടിപ്പിച്ചിട്ടുണ്ട്. അഡിഡാസിന്റെ 'കണക്റ്റഡ് ബോൾ ടെക്നോളജി'യുടെ ഭാഗമാണിത്.

കളിക്കാരുടെ ബൂട്ടോ കൈയോ പന്തിൽ തട്ടുന്നുണ്ടോ എന്ന കാര്യം ഈ ചിപ്പ് വഴി വിഎആർ റൂമിലേക്ക് തത്സമയം കൃത്യമായി ലഭിക്കും. പന്തിൽ സ്പർശനമില്ലാത്ത സമയങ്ങളിൽ സ്ക്രീനിൽ ഒരു നേർരേഖ മാത്രമാകും കാണിക്കുക.

എന്നാൽ പന്ത് ഇസാക്കിന്റെ ബൂട്ടിനരികിലൂടെ കടന്നുപോയപ്പോൾ സ്ക്രീനിലെ രേഖ പെട്ടെന്ന് മുകളിലേക്ക് ഉയരുകയും പന്തിൽ സ്പർശനം ഉണ്ടായതായി ഉറപ്പിക്കുകയും ചെയ്തു. മത്സരത്തിനിടയിലെ കടുത്ത തീരുമാനങ്ങൾ വേഗത്തിലും കൃത്യമായും എടുക്കാൻ ഈ സാങ്കേതികവിദ്യ സഹായിക്കുമെന്ന് അഡിഡാസ് വ്യക്തമാക്കുന്നു.

മുൻപ് 2022 ലോകകപ്പിലും 2024 യൂറോ കപ്പിലും സമാനമായ സാങ്കേതികവിദ്യ ഉപയോഗിച്ചിട്ടുണ്ട്. ഖത്തർ ലോകകപ്പിൽ യുറുഗ്വായ്ക്കെതിരായ മത്സരത്തിൽ ക്രിസ്റ്റ്യാനോ റൊണാൾഡോ ഹെഡ്ഡറിലൂടെ ഗോൾ നേടിയെന്ന് അവകാശപ്പെട്ടെങ്കിലും, പന്ത് റൊണാൾഡോയുടെ തലയിൽ തട്ടിയിട്ടില്ലെന്നും ബ്രൂണോ ഫെർണാണ്ടസ് ആണ് ഗോൾ നേടിയതെന്നും തെളിയിച്ചത് ഈ സാങ്കേതികവിദ്യയായിരുന്നു.

യൂറോ 2024-ൽ സ്ലൊവാക്യക്കെതിരെ ബെൽജിയത്തിന്റെ റൊമേലു ലുക്കാക്കു നേടിയ ഗോൾ ഹാൻഡ്‌ബോൾ ആണെന്ന് കണ്ടെത്തി റദ്ദാക്കിയതും ഇതേ സ്നിക്കോ പരിശോധനയിലൂടെയാണ്.

ക്രിക്കറ്റിൽ നിന്നും ഫുട്ബോളിലേക്ക്; എന്താണ് ചരിത്രം?

ക്രിക്കറ്റിൽ ബാറ്റിൽ പന്ത് തട്ടിയിട്ടുണ്ടോ എന്ന് പരിശോധിക്കാനാണ് സ്നിക്കോമീറ്റർ ഉപയോഗിക്കുന്നത്. ദൃശ്യങ്ങൾ ഫ്രെയിം ബൈ ഫ്രെയിം ആയി കാണിച്ച്, പന്ത് ബാറ്റിൽ തട്ടുമ്പോൾ സ്ക്രീനിൽ തരംഗരൂപത്തിലുള്ള ഗ്രാഫ് തെളിയുന്നതാണ് ഇതിന്റെ രീതി. 1990-കളുടെ മധ്യത്തിൽ ഇംഗ്ലീഷ് കമ്പ്യൂട്ടർ ശാസ്ത്രജ്ഞനായ അലൻ പ്ലാസ്‌കറ്റ് ആണ് ഇത് കണ്ടുപിടിച്ചത്.

ഇംഗ്ലണ്ടിലെ ടെസ്റ്റ് മത്സരങ്ങളിൽ ഇപ്പോൾ ഇത് ഉപയോഗിക്കാറില്ലെങ്കിലും ഓസ്‌ട്രേലിയ, ന്യൂസിലൻഡ് എന്നീ രാജ്യങ്ങളിൽ ഇപ്പോഴും ഇത് തുടരുന്നുണ്ട്. 2025-26 ആഷസ് പരമ്പരയിലെ മൂന്നാം ടെസ്റ്റിൽ ഓസ്‌ട്രേലിയൻ ബാറ്റർ അലക്സ് കാരി പുറത്തായെങ്കിലും ഓപ്പറേറ്റർമാരുടെ പിഴവ് മൂലം 'നോട്ട് ഔട്ട്' വിധി നൽകിയത് വലിയ വിവാദമായിരുന്നു.

അൾട്രാ എഡ്ജ് പോലെയുള്ള കൂടുതൽ അത്യാധുനിക സാങ്കേതികവിദ്യകൾ വന്നതോടെ ക്രിക്കറ്റിൽ സ്നിക്കോമീറ്ററിന്റെ ഉപയോഗം കുറഞ്ഞുവരികയാണ്. അഡിഡാസിന്റെ ബോൾ സാങ്കേതികവിദ്യയേക്കാൾ കുറഞ്ഞ വേഗതയിലാണ് (സെക്കൻഡിൽ 340 ഫ്രെയിമുകൾ) ക്രിക്കറ്റിലെ സ്നിക്കോ പ്രവർത്തിക്കുന്നത്.