ചാമ്പ്യൻസ് ലീഗിൽ വമ്പൻമാർക്ക് ജയം: സിറ്റി വിജയവഴിയിൽ; ഡോർട്മുണ്ടും അഴ്‌സണലും മുന്നേറി

ലണ്ടൻ: യുവേഫ ചാംപ്യൻസ് ലീഗ് ഫുട്ബോളിൽ ​വമ്പൻമാർക്കെല്ലാം ജയം. മാഞ്ചസ്റ്റർ സിറ്റി 3-2ന് ആര്‍ബി ലെയ്പ്സിഗിനെ വീഴ്ത്തി വിജയവഴിയിൽ തിരിച്ചെത്തി. ബൊറൂസിയ ഡോർട്മുണ്ട് 2-1ന് റയൽ ബെറ്റിസിനെയും അഴ്‌സണൽ 2-1ന് സ്ലാവിയ പ്രാഗിനെയും പോർട്ടോ 4-1 നാപോളിയയെും ക്ലബ് ബ്രൂഗ് 2-1ന് പിഎസ്‍വിയെ വീഴ്ത്തി.

​ഗോൾവേട്ട തുടരുന്ന എർലിങ് ഹാലൻഡാണ് സിറ്റിക്ക് വിജയം സമ്മാനിച്ചത്. ​മത്സരത്തിന്റെ 37-ാം മിനിറ്റിൽ ലുകേബയുടെ സെൽഫ് ഗോളിലൂടെയാണ് സിറ്റി ആദ്യ ലീഡ് നേടിയത്. രണ്ടാം പകുതിയിൽ 49-ാം മിനിറ്റിൽ ബാക്കു ലൈപ്സിഗിനായി സമനില കണ്ടെത്തി. എൻസോ ഫെർണാണ്ടസിലൂടെ (58) സിറ്റി വീണ്ടും മുന്നിലെത്തിയെങ്കിലും 61-ാം മിനിറ്റിൽ നൂസയിലൂടെ ലൈപ്സിഗ് വീണ്ടും ഒപ്പമെത്തി. 78-ാം മിനിറ്റിൽ എർലിങ് ഹാലൻഡ് നേടിയ തകർപ്പൻ ഗോൾ സിറ്റിക്ക് വിജയം സമ്മാനിക്കുകയായിരുന്നു.

ചാമ്പ്യൻസ് ലീ​ഗിൽ തുടർച്ചയായ മൂന്ന് തോൽവിക്ക് ശേഷമാണ് പോർട്ടോ വിജയം സ്വന്തമാക്കിയത്. തുടക്കം മുതൽ ആക്രമിച്ച കളിച്ച ടീം രണ്ടാം പകുതിയിൽ മൂന്ന് ഗോളുകൾ അടിച്ചാണ് നാപ്പോളിയെ കീഴടക്കിയത്. ചാമ്പ്യൻസ് ലീ​ഗിൽ തങ്ങളുടെ തോൽവി അറിയാത്ത കുതിപ്പ് തുടരാൻ അഴ്സണലിനായി. സ്ലാവിയ പ്രാഗിന്റെ രണ്ടാം പകുതിയിലെ ശക്തമായ തിരിച്ചുവരവിനെ പ്രതിരോധിച്ചാണ് ടീം 2-1ന്റെ വിജയം നേടയത്.

ആവേശകരമായ മത്സരത്തിൽ റയൽ ബെറ്റിസിനെതിരെ വീഴ്ത്തിയാണ് ബൊറൂസിയ ഡോർട്മുണ്ട് നിർണായക വിജയം സ്വന്തമാക്കി. 49-ാം മിനിറ്റിൽ ഫാബിയോ സിൽവ ഡോർട്ട്മുണ്ടിനെ മുന്നിലെത്തിച്ചു. 67-ാം മിനിറ്റിൽ പകരക്കാരനായി ഇറങ്ങിയ ഐറ്റർ റൂയിബാൽ സ്പാനിഷ് ടീമിനായി സമനില പിടിച്ചു. തൊട്ടുപിന്നാലെ, പരിക്കേറ്റ പകരക്കാരനായി കളത്തിലിറങ്ങിയ കോൺസ്റ്റാന്റിനോസ് കരേട്സാസ് ടീമിനായി വിജയ​ഗോൾ നേടുകയായിരുന്നു.