പ്രീമിയർ ലീഗിൽ ലിവർ പൂളിന് ജയം; തോൽവി തുടർന്ന് യുണൈറ്റഡ്

മാഞ്ചസ്റ്റർ: ഇംഗ്ലീഷ്‌ പ്രീമിയർ ലീഗ്‌ ഫുട്‌ബോൾ മുൻ ചാമ്പ്യൻമാരായ മാഞ്ചസ്‌റ്റർ യുണൈറ്റഡിന് വീണ്ടും നാണംകെട്ട തോൽവി. സ്വന്തം തട്ടകത്തിൽ ബോൺമൗത്തിനോട് മറുപടിയില്ലാത്ത മൂന്ന് (3-0) ​ഗോളിനാണ് യുണൈറ്റഡ് തോറ്റത്. മറ്റൊരു മത്സരത്തിൽ നിലവിലെ ചാമ്പ്യന്മാരായ ലിവർപൂൾ 2-0ന് ബ്രൈറ്റണെ തകർത്തു. ന്യൂകാസിൽ യുണൈറ്റഡ് എഫ്സി 2-0ന് ക്രിസ്റ്റൽ പാലസിനെ വീഴ്ത്തിയപ്പോൾ ഹൾ സിറ്റിയും ബ്രെൻഡ്ഫോർഡും 1-1 സമനിലയിൽ പിരിഞ്ഞു.

ചാമ്പ്യൻസ്‌ ലീഗ്‌ ഫുട്‌ബോളിലെ ദയനീയ തോൽവിക്കുശേഷം വീണ്ടും കളത്തിലെത്തിയ യുണൈറ്റഡ് ആരാധകരെ വീണ്ടും നിരാശരാക്കി. ഇറ്റാലിയൻ ക്ലബായ കോമോയോട്‌ 4–1ന് തോറ്റ് ചരിത്രത്തിലെ തന്നെ എക്കാലത്തെയും വലിയ തിരിച്ചടി നേരിട്ട ടീം പ്രീമിയർ ലീ​ഗിലും തകർന്നടിയുകയായിരുന്നു. ബോൺമൗത്തിനെതിരെ മൈക്കേൽ കാരിക്കിന്റെ സംഘത്തിന് നിലംതൊടാനായില്ല. അവസാന എട്ട് മത്സരത്തിലും ടീമിന് ജയമില്ല. കളിയുടെ 38-ാം മിനിറ്റിൽ റയാനിലൂടെയാണ് ബോൺമൗത്ത് ലീഡ് നേടിയത്. അഞ്ച് മിനിറ്റിനുള്ളിൽ ടീം ലീഡ് രണ്ടായി ഉയർത്തി. മാർക്കസ് ടവേർനിയർ (43) ആണ് ഇത്തവണ ലക്ഷ്യം കണ്ടത്. 71-ാം മിനിറ്റിൽ ഇവാനിൽസൺ കൂടി ലക്ഷ്യം കണ്ടതോടെ യൂണൈറ്റഡ് തകർന്നു. തുടർച്ചയായ തോൽവികളും മോശം പ്രകടനവും കാരണം യുണൈറ്റഡ് ക്യാമ്പിൽ വലിയ പ്രശ്നങ്ങളാണ് പുകയുന്നത്.

അതേസമയം ആൻഫീൽഡിലെ സ്വന്തം ആരാധകർക്ക് മുന്നിൽ അനായാസ ജയമാണ് ലിവർപൂൾ സ്വന്തമാക്കിയത്. 17-ാം മിനിറ്റിൽ ബ്രൈറ്റൺ താരം പാസ്കൽ ഗ്രോസ് വഴങ്ങിയ സെൽഫ് ഗോളിലൂടെ ലിവർപൂൾ മുന്നിലെത്തിയത്. പിന്നാലെ 22-ാം മിനിറ്റിൽ അലക്‌സാണ്ടർ ഇസാക്‌ ടീമിന്റെ ലീ​ഡ് രണ്ടായി ഉയർത്തി.