റയലിനെ തളച്ച് ജിറോണ; ലാ​ലീ​ഗയിൽ വീണ്ടും സമനില

മാഡ്രിഡ്: സ്‌പാനിഷ്‌ ഫുട്‌ബോൾ ലീഗിൽ കരുത്തരായ റയൽ മാഡ്രിഡിനെ സമനിലയിൽ തളച്ച് എഫ്സി ജിറോണ. ഒരു​ഗോളിന് പിന്നിൽ നിന്ന ശേഷം ലഭിച്ച പെനാൽറ്റി ​ഗോളാണ് റയലിന് രക്ഷയായത്. തുടർച്ചയായി മൂന്ന് മത്സരങ്ങൾ സമനിലയിൽ കലാശിച്ചതോടെ പോയിന്റ് പട്ടികയിൽ ബാഴ്സലോണയ്ക്ക് പിന്നിൽ റയൽ രണ്ടാമതായി തുടരും.

ചാമ്പ്യൻസ് ലീഗിൽ ഒളിമ്പ്യാക്കോസിനെ 4-3ന് തകർത്ത ആവേശത്തിൽ ജയപ്രതീക്ഷയോടെയാണ് റയൽ ലാലീ​ഗയിൽ പന്ത് തട്ടാനെത്തിയത്. എന്നാൽ ജിറോണ പ്രതിരോധം മറികടക്കാൻ റയൽ പാടുപെട്ടു. തുടക്കത്തിൽ ലഭിച്ച അവസരം ​ഗോളാക്കി മാറ്റാൻ കിലിയൻ എംബാപ്പെയ്ക്ക് കഴിയാതെ വന്നതും തിരിച്ചടിയായി. ആദ്യ പകുതിയുടെ അവസാന നിമിഷം ജിറോണ ആദ്യ ഗോൾ നേടി ലീഡ് എടുത്തു. 45-ാം മിനിറ്റിലാണ് അസെദ്ദീൻ ഒനാഹി ടീമിനായി ​ഗോൾ നേടിയത്.

രണ്ടാം പകുതിയുടെ തുടക്കത്തിൽ ജിറോണയ്ക്ക് ലീഡ് രണ്ടാക്കാൻ അവസരം ലഭിച്ചെങ്കിലും, റയൽ ​ഗോളിയുടെ മികവ് ടീമിന് രക്ഷയായി. പിന്നാലെ വിനീഷ്യസ് ജൂനിയർ ​ഗോൾ നേടിയെങ്കിലും ഓഫ് സൈഡ് റയലിന് തിരിച്ചടിയായി. തുടർന്നും ആക്രമണം അഴിച്ചു വിട്ട റയൽ കളിയിലേക്ക് തിരിച്ചുവരുകയായിരുന്നു. 67-ാം മിനിറ്റിൽ ലഭിച്ച പെനാറ്റിൽ എംബാപ്പെ ​ഗോളാക്കി മാറ്റി. നിരന്തരം ആക്രമിച്ച് കളിച്ചെങ്കിലും വിജയ​ഗോൾ കണ്ടെത്താൻ റയലിന് കഴിയാതെ പോയി.