'കൊൽക്കത്ത ഡെർബി'യിൽ ഡ്യുറൻഡ്‌ കപ്പ്‌ തൂക്കി ഇ‍ൗസ്റ്റ്‌ ബംഗാൾ; മോഹൻ ബഗനെ ​ഗോളിൽ മുക്കി

കൊൽക്കത്ത: ചിരവൈരികളായ മോഹൻ ബഗനെ ​ഗോളിൽ മുക്കി, ഡ്യുറൻഡ്‌ കപ്പ്‌ ഫുട്‌ബോൾ കിരീടം ചൂടി ഇ‍ൗസ്റ്റ്‌ ബംഗാൾ. ഒന്നിനെതിരെ നാലു ​ഗോളുകൾക്കാണ് ജയം. 22 വർഷത്തിനുശേഷമാണ്‌ ഈസ്റ്റ് ബം​ഗാൾ കിരീടം നേടുന്നത്. 17 കിരീടവുമായി മോഹൻ ബാ​ഗാന്റെ റെക്കോർഡിനൊപ്പമെത്താൻ ടീമിനായി. ഹാട്രിക്ക് നേടിയ എഡ്‌മണ്ട്‌ ലാൽറിൻഡികയാണ് അനായാസ വിജയം ഈസ്റ്റ് ബം​ഗാളിന് സമ്മാനിച്ചത്.

കൊൽക്കത്തയിലെ സാൾട്ട്‌ലേക്ക്‌ സ്‌റ്റേഡിയത്തിൽ നടന്ന മത്സരത്തിൽ അഞ്ച് ​ഗോളും പിറന്നത് ആദ്യ പകുതിയിലാണ്. കളിയുടെ പത്താം മിനിറ്റിൽ ബിപിൻ സിങ്ങാണ് ​ഗോളടിച്ച് തുടങ്ങിയത്. പിന്നാലെ 12, 22, 44 മിനിറ്റുകളിലായി എഡ്‌മണ്ട്‌ ലാൽറിൻഡിക ഈസ്റ്റ് ബം​ഗാളിനായി വലകുലുക്കി. 33-ാം മിനിറ്റിൽ മൻവീർ സിങ്ങാണ്‌ ബഗാന്റെ ആശ്വസഗോൾ നേടിയത്.

ടൂർണമെന്റിലെ ആദ്യ മത്സരത്തിൽ ഇരുടീമുകളും നേർക്കുനേർ വന്നപ്പോൾ ബഗാൻ 1–0ന്‌ ജയിച്ചിരുന്നു.