വെടിക്കെട്ട് തീർത്ത് സഞ്ജു; കേരളത്തിന് തകർപ്പൻ ജയം

ലഖ്നൗ: ക്യാപ്റ്റൻ സഞ്ജു സാംസന്റെ വെടിക്കെട്ട് പ്രകടനത്തിന് പിന്നാലെ സയ്യിദ് മുഷ്താഖ് അലി ട്വൻ്റി 20 ക്രിക്കറ്റ് ടൂർണമെൻ്റിൽ കേരളത്തിന് തകർപ്പൻ ജയം. ഛത്തീസ്​ഗഢ് ഉയർത്തിയ 121 റൺസിന്റെ വിജയലക്ഷ്യം 10.4 ഓവറിൽ രണ്ട് വിക്കറ്റ് നഷ്ടത്തിൽ കേരളം മറികടന്നു. 15 പന്തിൽ 43 റൺസുമായി സഞ്ജു നൽകിയ തുടക്കമാണ് കേരളത്തിന് വമ്പൻ വിജയം സമ്മാനിച്ചത്. ഹാട്രിക് അടക്കം അഞ്ച് സിക്‌സറുകളാണ് സഞ്ജുനേടിയത്.

ആദ്യ മത്സരത്തിൽ സെഞ്ചുറി നേടിയ രോഹൻ കുന്നുമ്മൽ 17 പന്തിൽ 33 റൺസെടുത്തു. തുടർന്ന് വിഷ്ണു വിനോദും (22) സൽമാൻ നിസാറും (16) പുറത്താകാതെ 10.4 ഓവറിൽ കേരളത്തെ വിജയത്തിലെത്തിച്ചു. കേരളത്തിനായി ആദ്യമായി കളത്തിലിറങ്ങിയ വിഘ്നേഷ് പുത്തൂർ രണ്ട് വിക്കറ്റുകൾ നേടി. പേസർ കെ എം ആസിഫ് മൂന്നും അങ്കിത് ശർമ രണ്ടും ഷറഫുദ്ദീൻ, എം ഡി നിധീഷ്, ബാസിത് എന്നിവർ ഓരോ വിക്കറ്റും നേടി. കേരളത്തിന് വേണ്ടി മൂന്ന് വിക്കറ്റ് വീഴ്ത്തിയ കെ എം ആസിഫാണ് മികച്ചതാരം.

ടോസ് നേടിയ ക്യാപ്റ്റൻ സഞ്ജു ഛത്തീസ്​ഗഢിനെ ബാറ്റിങ്ങിന് അയക്കുകയായിരുന്നു. ടോസ് നഷ്ടപ്പെട്ട് ആദ്യം ബാറ്റിങ്ങിന് ഇറങ്ങിയ ഛത്തീസ്​ഗഢി ന് ആദ്യ പന്തിൽ തന്നെ വിക്കറ്റ് നഷ്ടമായി. ഷറഫുദ്ദീൻ്റെ പന്തിൽ വിഘ്നേഷ് പുത്തൂ‍ർ ക്യാച്ചെടുത്ത് ഓപ്പണ‍ർ ആയുഷ് പാണ്ഡെ മടങ്ങി. രണ്ടാം വിക്കറ്റിൽ ക്യാപ്റ്റൻ അമൻദീപ് ഖാരെയും ശശാങ്ക് ചന്ദ്രാകറും ചേ‍ർന്ന് 45 റൺസ് കൂട്ടിച്ചേർത്തു. എന്നാൽ തുടരെയുള്ള പന്തുകളിൽ രണ്ട് വിക്കറ്റുകൾ വീഴ്ത്തി കെ എം ആസിഫ് കളിയുടെ ​ഗതി കേരളത്തിന് അനുകൂലമാക്കി. ഏഴാം ഓവറിലെ രണ്ടാം പന്തിൽ ശശാങ്ക് ചന്ദ്രാകറിനെ റിട്ടേൺ ക്യാച്ചിലൂടെ പുറത്താക്കിയ ആസിഫ്, അടുത്ത പന്തിൽ ഐപിഎല്ലിലെ വെടിക്കെട്ട് താരം ശശാങ്ക് സിങ്ങിനെ എൽബിഡബ്ല്യുവിൽ കുടുക്കി.

നാലാം വിക്കറ്റിൽ അമൻദീപ് ഖാരെയും സഞ്ജീത് ദേശായിയും ചേ‍ർന്ന് 51 റൺസ് കൂട്ടിച്ചേ‍ർത്തു. എന്നാൽ 14-ാം ഓവറിൽ ഇരുവരെയും അങ്കിത് ശർമ്മ റിട്ടേൺ ക്യാച്ചുകളിലൂടെ പുറത്താക്കിയതോടെ ഛത്തീസ്​ഗഢ് ബാറ്റിങ് നിരയുടെ തകർച്ചയ്ക്ക് തുടക്കമായി. വെറും 22 റൺസ് കൂടി കൂട്ടിച്ചേ‍ർക്കുന്നതിനിടെ ശേഷിക്കുന്ന അഞ്ച് വിക്കറ്റുകൾ കൂടി നഷ്ടമായതോടെ ഛത്തീസ്​ഗഢ് 19.5 ഓവറിൽ 120 റൺസിന് ഓൾ ഔട്ടായി. അമൻദീപ് ഖാരെ 41ഉം സഞ്ജീത് ദേശായി 35ഉം റൺസെടുത്തു. കേരളത്തിന് വേണ്ടി കെ എം ആസിഫ് മൂന്ന് വിക്കറ്റും അങ്കിത് ശർമ്മയും വിഘ്നേഷ് പുത്തൂരും രണ്ട് വിക്കറ്റുകൾ വീതവും വീഴ്ത്തി.