ഡോളർ പിന്നോട്ടിറങ്ങി; രൂപയ്ക്ക് വീണ്ടും കരുത്ത്

മുംബൈ : ആഗോള വിപണിയിൽ ഡോളർ സൂചിക 15 മാസത്തെ ഏറ്റവും ഉയർന്ന നിരക്കിൽ നിന്ന് താഴേക്ക് ഇറങ്ങിയതോടെ ഇന്ത്യൻ രൂപയ്ക്ക് ആശ്വാസം. വെള്ളിയാഴ്ച വ്യാപാരം ആരംഭിച്ച ഘട്ടത്തിൽ യുഎസ് ഡോളറിനെതിരെ രൂപയുടെ മൂല്യം 19 പൈസ വർധിച്ച് 95.16 എന്ന നിലയിലെത്തി.

ഇന്റർബാങ്ക് വിദേശനാണ്യ വിനിമയ വിപണിയിൽ 95.20 എന്ന നിരക്കിൽ വ്യാപാരം ആരംഭിച്ച രൂപ, പിന്നീട് മുൻ ദിവസത്തെ ക്ലോസിംഗിൽ നിന്ന് നേട്ടമുണ്ടാക്കുകയായിരുന്നു. എന്നാൽ വ്യാഴാഴ്ച തുടക്കത്തിലുണ്ടായ നേട്ടങ്ങൾ നിലനിർത്താനാകാതെ രൂപയുടെ മൂല്യം 19 പൈസ ഇടിഞ്ഞ് ഡോളറിനെതിരെ 95.35 എന്ന നിരക്കിലാണ് വ്യാപാരം അവസാനിപ്പിച്ചത്.

ഡോളർ സൂചികയിലെ ഇടിവും ക്രൂഡ് ഓയിൽ വിലയും രൂപയ്ക്ക് അനുകൂലമാണെങ്കിലും ശക്തമായ ‍ഡോളർ ആവശ്യകത നിലനിൽക്കുന്നത് രൂപയ്ക്ക് മേൽ ഇപ്പോഴും സമ്മർദ്ദം ചെലുത്തുന്നുണ്ടെന്ന് ഫോറെക്സ് വ്യാപാരികൾ വിലയിരുത്തുന്നു.

കഴിഞ്ഞ ഫെബ്രുവരിയിലെ ഉയർന്ന നിരക്കായ 728.49 ബില്യൺ യുഎസ് ഡോളറിൽ നിന്നും രാജ്യത്തിന്റെ വിദേശനാണ്യ കരുതൽ ശേഖരം ഏകദേശം 672.6 ബില്യൺ ഡോളറായി കുറഞ്ഞിട്ടുണ്ട്. ഇത് വീണ്ടെടുക്കുന്നതിലാണ് ആർബിഐ ഇപ്പോൾ ശ്രദ്ധ കേന്ദ്രീകരിക്കുന്നത്. അതുകൊണ്ടുതന്നെ ആഗോള സാഹചര്യങ്ങൾ അനുകൂലമാകുമ്പോൾ പോലും രൂപയുടെ മൂല്യം സ്വതന്ത്രമായി ഉയരാൻ കേന്ദ്ര ബാങ്ക് വലിയ അനുവാദം നൽകില്ല.

പ്രമുഖ ആറ് കറൻസികൾക്കെതിരെയുള്ള യുഎസ് ഡോളറിന്റെ കരുത്ത് അളക്കുന്ന ഡോളർ സൂചിക അടുത്തിടെ രേഖപ്പെടുത്തിയ 15 മാസത്തെ ഉയർന്ന നിരക്കായ 101.6ൽ നിന്നും താഴ്ന്ന് 100.81 എന്ന നിരക്കിലാണ് വ്യാപാരം തുടരുന്നത്.

ഡോളറിന്റെ ഇടിവും ആഭ്യന്തര വിപണിയിലെ അനുകൂല തരംഗവും ഇന്ത്യൻ ഓഹരി വിപണിയെയും തുണച്ചു. വ്യാപാരം ആരംഭിച്ച ഘട്ടത്തിൽ സെൻസെക്സ് 545.89 പോയിന്റ് ഉയർന്ന് 78,048.01 എന്ന നിലയിലെത്തിയപ്പോൾ, നിഫ്റ്റി 173.85 പോയിന്റ് കുതിച്ചുയർന്ന് 24,346.90 എന്ന നിരക്കിലെത്തി.

എക്സ്ചേഞ്ച് വിവരങ്ങൾ പ്രകാരം വ്യാഴാഴ്ചയും വിദേശ നിക്ഷേപകർ ആകെ 311.82 കോടി രൂപയുടെ ഓഹരികൾ വിറ്റൊഴിഞ്ഞു. ജൂൺ മാസത്തിലും വിദേശ നിക്ഷേപകർ തങ്ങളുടെ വിൽപന പരമ്പര തുടരുകയാണെന്നാണ് കണക്കുകൾ സൂചിപ്പിക്കുന്നത്. ആഗോള വിപണിയിലെ അനിശ്ചിതത്വങ്ങൾ, ഉയർന്ന യുഎസ് ബോണ്ട് യീൽഡ്, ആഭ്യന്തര വിപണിയിലെ അമിത മൂല്യനിർണ്ണയം എന്നിവ കാരണം ജൂണിൽ മാത്രം ഇന്ത്യൻ ഓഹരി വിപണിയിൽ നിന്ന് 49,340 കോടി രൂപ പിൻവലിക്കപ്പെട്ടു.