കോട്ടത്തറ ഏരിയാ സമ്മേളനത്തിന്‌ ഉജ്വല തുടക്കം

എം ബാലഗോപാലൻ നഗർ (പടിഞ്ഞാറത്തറ)

സിപിഐ എം കോട്ടത്തറ ഏരിയാ കമ്മിറ്റിയുടെ പ്രഥമ സമ്മേളനത്തിന്  ഉജ്വല തുടക്കം. പടിഞ്ഞാറത്തറയിൽ ഒരുക്കിയ എം ബാലഗോപാലൻ നഗറിൽ സംസ്ഥാന കമ്മിറ്റി അംഗം സി കെ ശശീന്ദ്രൻ പ്രതിനിധി സമ്മേളനം ഉദ്‌ഘാടനംചെയ്‌തു. മുതിർന്ന ഏരിയാ കമ്മിറ്റി അംഗം യു വേണുഗോപാൽ പതാക ഉയർത്തി. സമ്മേളനത്തിന്‌ മുന്നോടിയായി പ്രകടനവും പുഷ്പാർച്ചനയും നടന്നു. 

വി എൻ ഉണ്ണികൃഷ്ണൻ അനുശോചനപ്രമേയം അവതരിപ്പിച്ചു. ഏരിയാ സെക്രട്ടറി എം മധു രക്തസാക്ഷി പ്രമേയവും പ്രവർത്തന റിപ്പോർട്ടും അവതരിപ്പിച്ചു. സംഘാടക സമിതി ചെയർമാൻ പി ഒ പ്രദീപൻ സ്വാഗതം പറഞ്ഞു. പി എം നാസർ (കൺവീനർ), സാന്ദ്ര രവീന്ദ്രൻ, പി സുരേഷ്, ഗീതാ വിജയൻ എന്നിവരടങ്ങിയ പ്രസീഡിയമാണ്‌ സമ്മേളനം നിയന്ത്രിക്കുന്നത്‌. സീതാ ബാലൻ കൺവീനറായി മിനുട്‌സ്‌, വി എൻ ഉണ്ണികൃഷ്‌ണൻ കൺവീനറായി പ്രമേയം, പി ജി സജേഷ്‌ കൺവീനറായി ക്രഡൻഷ്യൽ, കെ സി ജോസഫ്‌ കൺവീനറായി രജിസ്‌ട്രേഷൻ എന്നീ സബ്‌കമ്മിറ്റികൾ പ്രവർത്തിക്കുന്നു. 

 125 പ്രതിനിധികളും 16 ഏരിയാ കമ്മിറ്റി അംഗങ്ങളുമാണ്‌ സമ്മേളനത്തിൽ പങ്കെടുക്കുന്നത്‌. ജില്ലാ സെക്രട്ടറി പി ഗഗാറിൻ, ജില്ലാ സെക്രട്ടറിയറ്റ്‌ അംഗങ്ങളായ എ എൻ പ്രഭാകരൻ, പി കെ സുരേഷ്, റഫീഖ്, ജില്ലാ കമ്മിറ്റി അംഗങ്ങളായ കെ സുഗതൻ, വി ഹാരിസ് എന്നിവരും സമ്മേളനത്തിൽ പങ്കെടുക്കുന്നുണ്ട്‌. ഗ്രൂപ്പ്‌ ചർച്ചയും പൊതുചർച്ചയും പൂർത്തിയായി. ഞായറാഴ്ച ചർച്ചയുടെ മറുപടി പറഞ്ഞശേഷം പുതിയ കമ്മിറ്റിയെ തെരഞ്ഞെടുക്കും. സമ്മേളനത്തിന്‌ സമാപനം കുറിച്ച്‌ ഞായർ വൈകിട്ട്‌ നാലിന്‌ പടിഞ്ഞാറത്തറയിൽ ചുവപ്പുവളന്റിയർ മാർച്ചും ബഹുജന പ്രകടനവും നടക്കും. പൊതുസമ്മേളനം ബസ്‌ സ്റ്റാൻഡ്‌ പരിസരത്ത്‌ ഒരുക്കിയ പി എ മുഹമ്മദ് നഗറിൽ തൃശൂർ ജില്ലാ കമ്മിറ്റി അംഗം ടി ശശിധരൻ ഉദ്‌ഘാടനംചെയ്യും.