സുപ്രീംകോടതി വിധിയെ ചാന്‍സലര്‍ ഇഷ്ടത്തിന് വ്യാഖ്യാനിക്കുന്നു : മന്ത്രി ആര്‍ ബിന്ദു

തിരുവനന്തപുരം > സാങ്കേതിക സർവകലാശാല വൈസ് ചാൻസലർ നിയമനത്തിലെ സുപ്രീംകോടതി ​വിധിയെ ചാൻസലർ ഇഷ്ടത്തിന് വ്യാഖ്യാനിക്കുന്നത് നിർഭാ​ഗ്യകരമാണെന്ന് മന്ത്രി ആർ ബിന്ദു. സർവകലാശാല വിസി നിയമനത്തിൽ ചട്ടങ്ങളെ മറിക്കടക്കുക മാത്രമല്ല സർക്കാരും ചാൻസലറായ ​ഗവർണറും തമ്മിൽ ഭരണഘടന നിർവചിച്ചിട്ടുള്ള കടമകൾ വേണ്ടായെന്നുള്ള സമീപനമാണ് ​ഗവർണർ സ്വീകരിക്കുന്നത്. സർ‌വകലാശാല ചട്ടങ്ങൾക്കും ഹൈക്കോടതി നിരീക്ഷണങ്ങൾക്കും പരാമർശങ്ങൾക്കും വിരുദ്ധമായുള്ള ​ഗവർണറുടെ നിലപാടുകൾ സാമാന്യ മര്യാദയ്ക്ക് നിലക്കാത്തതാണ്. കേരളത്തിലെ പൊതുസർവകലാശാലകളുടെ മേൽനോട്ടം നിക്ഷിപ്തമായിരിക്കുന്നത് സർക്കാരിലാണ്. ​ഗുണഭോക്താക്കൾ സംസ്ഥാനത്തെ വി​ദ്യാർഥിസമൂഹമാണ്. എന്നാൽ, സംസ്ഥാനത്തിന്റെ താത്പര്യത്തിന് തുരങ്കം വയ്ക്കുന്ന തീരുമാനങ്ങളും നടപടികളും ​ഗവർണർ സ്വീകരിക്കുന്നത് അതന്ത്യം പ്രതിഷേധാർഹമാണെന്ന് മന്ത്രി പറഞ്ഞു.

കണ്ണൂർ സർവകലാശാലയിൽ കെ റീപ്പ് സോഫ്റ്റ്-വെയറിൽ അപാകതയുണ്ടെന്ന വാദം ഒരു പ്രത്യേക സംഘടനയുടെ രാഷ്ട്രീയ നിലപാടിന്റെ ഭാ​ഗമാണെന്ന് മാധ്യമങ്ങളോട് മന്ത്രി പറഞ്ഞു. തദ്ദേശവകുപ്പിൽ സ്ഥിര ജോലിവേണമെന്ന ആവശ്യപ്പെട്ടുള്ള അപൂർവരോ​ഗ ബാധിതയായ കോട്ടയം സ്വദേശിയുടെ അപേക്ഷയിൽ നടപടികൾ കൈക്കൊള്ളാൻ തദ്ദേശവകുപ്പിലേക്ക് കൈമാറിയിട്ടുണ്ട്. യൂണിവേഴ്സിറ്റി കോളേജിലെ ഭിന്നശേഷി വിദ്യാർഥിയെ മർദ്ദിച്ചുവെന്ന വിഷയത്തിൽ പരാതി ലഭിച്ചിട്ടില്ല. സംഭവത്തിൽ വസ്തുനിഷ്ഠമായി കാര്യങ്ങൾ പരിശോധിച്ച് നടപടിയെടുക്കുമെന്ന് മന്ത്രി ആർ ബിന്ദു പറഞ്ഞു.