ഗ്യാലറി നിറച്ചത് 
ബിനീഷിന്റെ ശബ്ദം

കണ്ണൂർ

നീണ്ടൊരു ഇടവേളയ്‌ക്കുശേഷം സൂപ്പർ ലീഗ് കേരളയിലൂടെ ജവഹർ സ്റ്റേഡിയത്തിലെ മൈതാനത്ത് വീണ്ടും പന്തുരുണ്ടപ്പോൾ മത്സരങ്ങളുടെ ആവേശം ഒട്ടും ചോരാതെ ഫുട്‌ബോൾ പ്രേമികളിലെത്തിച്ചത് മുൻ സന്തോഷ് ട്രോഫി താരം ബിനീഷ് കിരൺ. പരിചയസമ്പന്നനായ ബിനീഷിന്റെ കമന്ററി ആസ്വാദകർക്ക് പുത്തൻ അനുഭവമായി. നാല് തവണ സന്തോഷ് ട്രോഫി ഫൈനലിൽ കളിക്കുകയും രണ്ട് തവണ കേരളത്തിനായി കിരീടം നേടുകയും ചെയ്ത ഈ മുൻ താരം, യൂത്ത് ഇന്ത്യൻ ടീമിലും നാഷണൽ ഗെയിംസിൽ കേരള ടീമിന്റെ നായകനായും തിളങ്ങിയിട്ടുണ്ട്. എസ്ബിടി തിരുവനന്തപുരം, കെൽട്രോൺ കണ്ണൂർ, എഫ്‌സി കൊച്ചിൻ തുടങ്ങിയ പ്രമുഖ ക്ലബ്ബുകൾക്ക് വേണ്ടി ബൂട്ടണിഞ്ഞ ഇദ്ദേഹം, കേരള സബ് ജൂനിയർ, സന്തോഷ് ട്രോഫി ടീമുകളുടെ പരിശീലകനായും സേവനമനുഷ്ഠിച്ചിട്ടുണ്ട്. നിലവിൽ കെഎസ്ഇബി കണ്ണൂർ ആർഎഒ ഓഫീസിൽ സീനിയർ സൂപ്രണ്ടായി ജോലി ചെയ്യുന്നു. മലയാളം ചാനലുകളിൽ ഐഎസ്എൽ, ലോകകപ്പ്, യൂറോകപ്പ്, കോപ്പ അമേരിക്ക തുടങ്ങി നിരവധി പ്രധാന ടൂർണമെന്റുകൾക്ക് ശബ്ദം നൽകിയിട്ടുള്ള അദ്ദേഹം കഴിഞ്ഞ സീസണിലും ഈ സീസണിലും സൂപ്പർ ലീഗ് കേരളയുടെ എല്ലാ മത്സരങ്ങൾക്കും കമന്ററി നൽകുന്നുണ്ട്. പള്ളിക്കുളം ശ്രീവത്സം ഇന്ദിരാനഗറിലെ പരേതനായ എം രാമകൃഷ്ണന്റെയും കെ ലളിതയുടെയും മകനാണ് ബിനീഷ് കിരൺ. ഭാര്യ: നർത്തകിയായ ഷൈജ ബിനീഷ്. മക്കൾ: ആര്യൻ ബിനീഷ്, അർഷാവിൻ ബിനീഷ്, യാമിക ബിനീഷ്.