മാരാംകോട്മലയിൽ ആദിവാസികൾ 
കുടിൽ കെട്ടി താമസം തുടങ്ങി

ചാലക്കുടി

സംസ്ഥാന സർക്കാർ അനുവദിച്ച ഭൂമിയിൽ തിരുവോണനാളിൽ ആദിവാസികൾ കുടിൽ കെട്ടി താമസം തുടങ്ങി. ഭൂമി ദാനം കൺകറന്റ്‌ ലിസ്റ്റിൽ പെട്ട വിഷയമായതു കൊണ്ട് കേന്ദ്ര ഗവർമെന്റിന്റെ അനുവാദം വേണമെന്ന ഡിഎഫ്ഒ തടസ്സം ഉന്നയിച്ചതിനു പിന്നാലെയാണ്‌ താമസം തുടങ്ങിയത്‌. വീരാൻ കുടിയിലെ 47 ആദിവാസി കുടുംബങ്ങളാണ് മാരാംകോട്മലയിൽ കുടിൽ കെട്ടിയത്. 2025 ഓഗസ്റ്റ് 15 ന് അവർ അവിടെ താമസം തുടങ്ങേണ്ടതായിരുന്നു. കേരള സർക്കാർ 47 കുടുംബങ്ങൾക്കും അവർ താമസിച്ചിരുന്ന നിലവിലെ അളവ് അനുസരിച്ച് ഭൂമി അനുവദിച്ച് ഉത്തരവിട്ടിരുന്നു. പുലിയും ആനയും മറ്റു വന്യജീവികൾക്കും പുറമെ ഉരുൾപ്പൊട്ടലുമുള്ള വീരാൻ കുടിയിൽ താമസിക്കാൻ കഴിയാതെ വന്നതിനാൽ ആദിവാസികൾ ആത്മരക്ഷാർഥം അനുവദിക്കപ്പെട്ട സ്ഥലത്ത് കുടിൽ കെട്ടുകയായിരുന്നു. കുടിൽ കെട്ടുന്നതിന് ഐക്യദാർഢ്യം പ്രഖ്യാപിച്ച് ഒത്തുകൂടിയ നാട്ടുകാരുടെ യോഗം സിപിഐ എം ചാലക്കുടി ഏരിയ സെക്രട്ടറി കെ എസ് അശോകൻ ഉദ്ഘാടനം ചെയ്തു. ആദിവാസി ക്ഷേമനിധി ജില്ലാ പ്രസിഡന്റ് വിജയലക്ഷ്മി അധ്യക്ഷയായി. മാരാംകോട് ഊരുമൂപ്പൻ സതീഷ്, വീരാൻ കുടി ഊര് മൂപ്പൻ വീരൻ, കെ വി ടോമി, തിലകമണി, വി .എം കരീം എന്നിവർ സംസാരിച്ചു.