യുവാവിനെ തട്ടിക്കൊണ്ടുപോയി 
കൊല്ലാൻ ശ്രമം: 2 പേർകൂടി പിടിയിൽ

വാടാനപ്പിള്ളി

നടുവിൽക്കര സ്വദേശി മുഹമ്മദ്​ രജബിനെ (19) തട്ടിക്കൊണ്ടുപോയി കൊലപ്പെടുത്താൻ ശ്രമിച്ച കേസിൽ ഒളിവിൽ കഴിഞ്ഞ 2 പേരെ കൂടി വാടാനപ്പിള്ളി പൊലീസ് അറസ്റ്റ് ചെയ്തു. ശാന്തി റോഡ് വടക്കൻ വീട്ടിൽ അഭിഷേക് (22), വാടാനപ്പള്ളി പടിയത്ത് വീട്ടിൽ സഞ്ജയ് (22) എന്നിവരാണ് പിടിയിലായത്​. കഴിഞ്ഞ 18ന്​ രാത്രിയാണ്​ മുഹമ്മദ്​ രജബിനെ വീട്ടിൽനിന്ന്​ നടുവിൽക്കരയിൽ ദേശീയപാത നിർമാണ സ്ഥലത്തേക്ക് വിളിച്ചുവരുത്തി അവിടെ നിന്ന്​ വാടാനപ്പള്ളി ബീച്ച് ശാന്തി റോഡിന് സമീപമുള്ള ആളൊഴിഞ്ഞ പറമ്പിൽ എത്തിച്ച് ആക്രമിച്ച് പരിക്കേൽപ്പിച്ചത്​. കേസിൽ ഗുണ്ടാ നേതാവായ ബിൻഷാദ് ഉൾപ്പടെ എട്ട് പ്രതികളെ കഴിഞ്ഞദിവസം അറസ്റ്റ് ചെയ്തിരുന്നു. ഇപ്പോൾ പിടിയിലായ അഭിഷേക് അന്തിക്കാട് സ്റ്റേഷനിൽ മയക്കുമരുന്ന് കേസിലെ പ്രതിയാണെന്ന് പൊലീസ് പറഞ്ഞു. കൊടുങ്ങല്ലൂർ ഡിവൈഎസ്​പി വി കെ രാജു, വാടാനപ്പള്ളി ഇൻസ്പെക്ടർ എൻ ബി ഷൈജു, എസ്ഐ സനദ് എൻ പ്രദീപ്, എസ്​സിപിഒ രാജ്കുമാർ, സിപിഒ അമൽ, മഹേഷ്, നിബിൻ എന്നിവർ ചേർന്നാണ് പ്രതികളെ അറസ്റ്റ് ചെയ്തത്.