മുരിക്കുംതൊട്ടിയിൽ പാതയോരത്ത്‌ ഭീഷണിയായി മരങ്ങൾ

രാജാക്കാട്‌

രാജാക്കാട്– പൂപ്പാറ റോഡിൽ മുരിക്കുംതൊട്ടിക്ക്‌ സമീപം പാതയോരത്ത് അപകടഭീഷണിയായി നിൽക്കുന്ന മരങ്ങൾ അടിയന്തരമായി മുറിച്ചുനീക്കണമെന്ന ആവശ്യം ഉയരുന്നു. നിരവധി മരങ്ങളാണ് റോഡിലേക്ക് ചാഞ്ഞും വൈദ്യുതി ലൈനിന് സമീപമായും അപകടകരമായ നിലയിലുള്ളത്‌. ​ വളവുള്ള ഭാഗത്തായതിനാൽ മരങ്ങൾ കൂടുതൽ അപകടഭീഷണി ഉയർത്തുന്നു. ഏത് സമയത്തും റോഡിലേക്ക് പതിക്കാൻ സാധ്യത ഏറെയാണെന്ന്‌ നാട്ടുകാർ പറയുന്നു. ചരക്കുവണ്ടി ഉൾപ്പെടെ ദിവസേന നൂറുകണക്കിന് വാഹനങ്ങളാണ് ഈ റോഡിലൂടെ പോകുന്നത്. എൻജിനിയറിങ്‌ കോളേജ്, ഗവൺമെന്റ് യുപി സ്കൂൾ, ഇന്റർനാഷണൽ സ്കൂൾ തുടങ്ങിയ വിദ്യാഭ്യാസ സ്ഥാപനങ്ങളിലെ വാഹനങ്ങളും ഇതുവഴിയാണ്‌ സഞ്ചരിക്കുന്നത്‌. ​വൈദ്യുതി ലൈനിനോട് ചേർന്ന് അപകടാവസ്ഥയിൽ നിൽക്കുന്ന മരങ്ങൾ വെട്ടിമാറ്റാൻ കെഎസ്ഇബി അധികൃതർ കൂട്ടാക്കുന്നില്ല. മഴയും ശക്തമായ കാറ്റുമുണ്ടാകുന്ന സാഹചര്യത്തിൽ വലിയ അപകടം സംഭവിക്കും മുമ്പ് ബന്ധപ്പെട്ട വകുപ്പുകൾ ചേർന്ന്‌ മരങ്ങൾ മുറിച്ചുനീക്കി യാത്രക്കാരുടെ സുരക്ഷ ഉറപ്പാക്കണമെന്നതാണ് നാട്ടുകാരുടെയും യാത്രക്കാരുടെയും ആവശ്യം.