കുരുന്നുകളുടെ സ്‌മരണ പുതുക്കാൻ അവരെത്തും

മൂന്നാർ

മുതിരപ്പുഴയാറിൽ മുങ്ങിമരിച്ച കുട്ടികളെ അനുസ്മരിക്കാൻ സഹപാഠികളും ബന്ധുക്കളും ഇത്തവണയും എത്തും. 41 വർഷം മുമ്പ് ഹെലികോപ്ടർ നേരിൽ കാണാനുള്ള ആവേശത്തിൽ കേറിയ തൂക്കുപാലം തകർന്ന് മൂന്നാര്‍ ഗവ.ഹൈസ്കൂളിലെ 14 കുട്ടികളാണ് പുഴയിൽ മുങ്ങിമരിച്ചത്. 1984 നവംബര്‍ ഏഴിനാണ് ദാരുണസംഭവമുണ്ടായത്. അന്ന് മൂന്നാര്‍ ഹൈറേഞ്ച് ക്ലബ്‌ മൈതാനിയിലാണ് ‍ഹെലികോപ്ടര്‍ ഇറങ്ങിയത്. ശബ്ദം കേട്ട് കാണാനുള്ള ആവേശത്തിലെത്തിയ കുട്ടികളാണ് തണുത്ത് മരവിച്ച മുതിരപ്പുഴയാറിൽ മുങ്ങിമരിച്ചത്.

അന്ന്​ തകർന്ന തൂക്കുപാലം പുതുക്കി പണിതുവെങ്കിലും 2018ലെ പ്രളയം ആ​ പാലത്തെ അപ്പാടെ തൂത്തെടുത്തു. എ രാമലക്ഷ്​മി,എസ്​ ജയലക്ഷ്​മി, എം വിജയ, എൻ മാരിയമ്മാൾ, ആർ തങ്കമല, പി സരസ്വതി, ആർ കല്യാണകുമാർ, സി സുന്ദരി, പി റാബിയ, ടി ജെൻസി, ടി ഷിബു, പി മുത്തുമാരി, എസ് കലയമ്മാൾ, സി രാജേന്ദ്രൻ എന്നിവരാണ്‌​ മരിച്ചത്. മൂന്നാർ ജിവി എച്ച്എസ്എസിന്റെയും പൂർവ വിദ്യാർഥി സംഘടനയുടെയും നേതൃത്വത്തിൽ ഏഴിന്‌ പകൽ 10.30ന് വിദ്യാർഥി സ്മാരകത്തിൽ പുഷ്പാർച്ചനയും അനുസ്മരണവും നടത്തും.