മൂന്നാറിൽ പൊലീസ്‌ നൈറ്റ് പട്രോൾ വാട്സാപ് ഗ്രൂപ്പ്

മൂന്നാർ

വിനോദസഞ്ചാര കേന്ദ്രമായ മൂന്നാറിൽ സൗഹൃദ അന്തരീക്ഷം സൃഷ്ടിക്കുന്നതിനും കവർച്ച ഉൾപ്പെടെയുള്ള സാമൂഹ്യ തിന്മകൾ ഇല്ലായ്മ ചെയ്യുന്നതിനുമായി നൈറ്റ് പട്രോൾ വാട്സാപ് ഗ്രൂപ്പ് രൂപീകരിച്ച്‌ മൂന്നാർ പൊലീസ്‌. മോഷണവും സമൂഹ വിരുദ്ധ പ്രവർത്തനങ്ങളും ഉൾപ്പെടെയുള്ളവ തടയുകയാണ്‌ ലക്ഷ്യം. എല്ലാവരുടെയും പിന്തുണയും പ്രതീക്ഷിക്കുന്നതായി മൂന്നാർ ഡിവൈഎസ്‌പി എസ് ചന്ദ്രകുമാർ പറഞ്ഞു. 
 മൂന്നാർ സബ് ഡിവിഷനു കീഴിൽ വരുന്ന മറയൂർ, ദേവികുളം, ശാന്തൻപാറ, രാജാക്കാട് സ്റ്റേഷൻ പരിധികളിലാണ് വാട്സാപ് രൂപീകരിച്ചത്. രാത്രി 11 മുതൽ പുലർച്ചെ അഞ്ച് വരെ സന്ദേശങ്ങൾ കൈമാറും. മൂന്ന് പേർ അടങ്ങുന്ന സംഘമാണ് പട്രോളിങ് നടത്തുന്നത്. വിവരങ്ങൾ ഡിവൈഎസ്‌പി ക്ക് ലഭിക്കുന്ന വിധത്തിലുള്ള സംവിധാനമാണ് ഏർപ്പെടുത്തിയിട്ടുള്ളത്. പ്രധാനമായും ആരാധനാലയങ്ങൾ, ധനകാര്യ സ്ഥാപനങ്ങൾ, ബാങ്കുകൾ, എടിഎം കൗണ്ടറുകൾ തുടങ്ങിയ സ്ഥലങ്ങൾ കേന്ദ്രീകരിച്ചാവും സംഘം ശ്രദ്ധ കേന്ദ്രീകരിക്കുന്നത്. അടുത്തയിടെ വാഗവര എസ്റ്റേറ്റിൽ കാളിയമ്മൻ ക്ഷേത്രത്തിൽ പഞ്ചലോഹ വിഗ്രഹം മോഷണം നടത്തിയ തമിഴ്നാട് സ്വദേശികളായ രണ്ട് പ്രതികളെ ദിവസങ്ങൾക്കകം തന്നെ പൊലീസ് അറസ്റ്റ് ചെയ്തിരുന്നു. ഇതിന്റെ പശ്ചാത്തലത്തിലാണ് മുൻകരുതൽ എന്ന നിലയ്ക്ക് പുതിയ വാട്സാപ് ഗ്രൂപ്പ് രൂപീകരിച്ചിട്ടുള്ളത്.