മൂന്നാറിൽ ഉയരും ആറുകോടിയുടെ കൺവൻഷൻ സെന്റർ

മൂന്നാർ

മൂന്നാറിൽ ആധുനിക സൗകര്യങ്ങളോടു കൂടിയ കൺവൻഷൻ സെന്റർ നിർമിക്കുമെന്ന് അഡ്വ. എ രാജ എംഎൽഎ. ഇതിനായി ആറ്‌ കോടി രൂപയുടെ ഭരണാനുമതി ലഭിച്ചു. നവകേരള സദസ്സിന്‌ മുന്പാകെ ലഭിച്ച നിവേദനം പരിഗണിച്ചാണ് പഴയ മൂന്നാറിൽ കൺവൻഷൻ സെന്റർ നിർമിക്കാൻ അനുമതി ലഭിച്ചത്. ദേവികുളം ഗവ. എൽപി സ്കൂളിന് ഓപ്പൺ എയർ ഓഡിറ്റോറിയം നിർമാണത്തിന് 20 ലക്ഷം രൂപയും അനുവദിച്ചു.

കുണ്ടളയിൽ ജനുവരിയിൽ 
പട്ടയം വിതരണം

കുണ്ടള, സാന്റോസ് നഗർ തുടങ്ങിയ പ്രദേശങ്ങളിൽ താമസിക്കുന്നവർക്ക്‌ പട്ടയം നൽകുന്നതിനുള്ള നടപടികൾ അന്തിമഘട്ടത്തിലാണെന്ന്‌ അഡ്വ. എ രാജ എംഎൽഎ പറഞ്ഞു. നടപടി ക്രമങ്ങൾ പൂർത്തീകരിക്കുന്നതിന് കലക്ടറെ ചുമതലപ്പെടുത്തിയിട്ടുണ്ട്. ജനുവരിയിൽ പട്ടയം വിതരണം ചെയ്യും. ഇടുക്കിയിൽ നടന്ന പട്ടയമേളയിൽ ദേവികുളം മണ്ഡലത്തിൽ 122 പട്ടയം വിതരണം ചെയ്തിരുന്നു. ഇതിൽ 56 എണ്ണം കുറ്റ്യാർവാലിയിലും ബാക്കിയുള്ള 166 പട്ടയങ്ങൾ എട്ട്‌ ഉന്നതിയിലുള്ളവർക്കും വിതരണം ചെയ്തു. കുറ്റ്യാർവാലിയിൽ അസൈൻമെന്റ് ഓർഡർ കൈവശം വച്ചിരിക്കുന്നവർക്ക് സമയ ബന്ധിതമായി പട്ടയം നൽകും. മൂന്നാർ പഞ്ചായത്തിൽ ജിഎച്ച് റോഡ് പുനരുദ്ധാരണം(20 ലക്ഷം), ലക്ഷ്മി ഫാക്ടറി - മിഡിൽ ഡിവിഷൻ റോഡ്(24 ലക്ഷം), കല്ലാർ പുതുക്കാട് റോഡ് ടാറിങ്(20 ലക്ഷം), 2018 ൽ പ്രളയത്തിൽ തകർന്ന പഴയ മൂന്നാറിലെ തൂക്കുപാലം നിർമാണത്തിന് 1.15 കോടി രൂപ അനുവദിച്ചു. ദേവികുളം പഞ്ചായത്തിൽ മാട്ടുപ്പെട്ടി ടോപ് സ്റ്റേഷൻ റോഡ് ടാറിങ്(25 ലക്ഷം), ചെണ്ടുവര ടോപ് ഡി വിഷൻ റോഡ്(25 ലക്ഷം), നെറ്റിക്കുടി ടോപ് ഡിവിഷൻ റോഡ് ടാറിങ്(24 ലക്ഷം) നിർമാണ പ്രവർത്തനങ്ങൾക്കായുള്ള ടെൻഡർ നടപടികൾ പൂർത്തിയായതായി അഡ്വ. എ രാജ എംഎൽഎ പറഞ്ഞു.