.അനിശ്ചിതകാല പണിമുടക്ക്

മൂന്നാർ

വിവിധ ആവശ്യങ്ങൾ ഉന്നയിച്ച്‌ കേരള ഹൈഡൽ ടൂറിസം വർക്കേഴ്സ്അസോസിയേഷൻ (സിഐടിയു) നേതൃത്വത്തിൽ ഞായർ മുതൽ അനിശ്ചിതകാല പണിമുടക്ക് നടത്തും. ഹൈഡൽ ടൂറിസത്തിലെ മുഴുവൻ ജീവനക്കാർക്കും ഒരു മാസത്തെ ശമ്പളം ബോണസായി അനുവദിക്കുക, തൊഴിലാളികളുടെ ഇൻക്രിമെന്റ്‌ നിശ്ചയിച്ച് കുടിശ്ശിക സഹിതം അനുവദിക്കുക, അർഹതപ്പെട്ട തൊഴിലാളികൾക്ക് പ്രൊമോഷനും ഗ്രേഡും നൽകുക, അന്യായമായി പിരിച്ചുവിട്ട തൊഴിലാളികളെ തിരിച്ചെടുക്കുക, ദേശസാൽകൃത ബാങ്കുകളിൽനിന്ന്‌ ലോൺ ലഭിക്കുന്നതിന് സാലറി സർട്ടിഫിക്കറ്റ് അനുവദിച്ചു നൽകുക, ഹൈഡൽ ടൂറിസം നേരിട്ടു നടത്തുന്ന പ്രവർത്തനങ്ങൾ സ്വകാര്യവൽക്കരിക്കുന്ന നടപടികൾ പിൻവലിക്കുക, ആനയിറങ്കൽ യൂണിറ്റ് തുറന്നു പ്രവർത്തിക്കുന്നതിനുള്ള നടപടികൾ സ്വീകരിക്കുക തുടങ്ങിയ ആവശ്യങ്ങൾ ഉന്നയിച്ചാണ് സമരം.

ജീവനക്കാരുടെ ന്യായമായ ആവശ്യങ്ങൾ അംഗീകരിക്കണമെന്നാവശ്യപ്പെട്ട് സെപ്തംബർ 16ന് അസോസിയേഷൻ നേതാക്കൾ ഹൈഡൽ ടൂറിസം ഡയറക്ടറുമായി നടത്തിയ ചർച്ചയിൽ ഗവേണിങ് ബോഡി യോഗം ചേർന്ന് ജീവനക്കാരുടെ ആവശ്യങ്ങൾ പരിഹരിക്കാമെന്ന് സമ്മതിച്ചിരുന്നു. എന്നാൽ ഡയറക്ടറുടെ ഭാഗത്തുനിന്ന്‌ നടപടിയുണ്ടാകാത്ത സാഹചര്യത്തിലാണ് സമരവുമായി മുന്നോട്ട് പോകാൻ തീരുമാനിച്ചതെന്ന് അസോസിയേഷൻ പ്രസിഡന്റ് കെ കെ വിജയൻ, സെക്രട്ടറി എസ് ലോറൻസ് എന്നിവർ പറഞ്ഞു.