കൃഷിയും കടകളും നശിപ്പിച്ച് കാട്ടാനകള്‍

മൂന്നാർ

എസ്റ്റേറ്റ് മേഖലകളിൽ കൃഷിയും കടകളും നശിപ്പിച്ച് കാട്ടാനകള്‍. ചൊവ്വ രാത്രിയോടെ കന്നിമല എസ്റ്റേറ്റ് ടോപ് ഡിവിഷനിൽ ഇറങ്ങിയ ഒറ്റയാൻ റോഡിലൂടെ നടന്ന് ലയങ്ങൾക്ക് സമീപമെത്തി. നാട്ടുകാർ ബഹളംവച്ച് ആനയെ വിരട്ടിയോടിച്ചു. ഇവിടെനിന്നും പോയ കാട്ടാന കന്നിമല എസ്റ്റേറ്റ് ഫാക്ടറിക്ക് സമീപത്തുള്ള കാളിസ്വാമിയുടെ കട അടിച്ചു തകർത്തു. കടയ്ക്കുള്ളിൽ ഉണ്ടായിരുന്ന ഭക്ഷണ പദാർഥങ്ങൾ നശിപ്പിച്ചു. മാട്ടുപ്പെട്ടി കുറ്റ്യാർവാലിയിൽ ഇറങ്ങിയ കാട്ടാനയും കുഞ്ഞും പരിഭ്രാന്തി പരത്തി. 
 കൃഷികൾ നശിപ്പിച്ച് കാട്ടിലേക്ക് മടങ്ങി. ഒമ്പതിന് പെരിയവരൈ പാലത്തിനു സമീപമെത്തിയ കാട്ടാനക്കൂട്ടം മൂന്ന് കടകൾ നശിപ്പിച്ചിരുന്നു.

10ന് വൈകിട്ട് കന്നിമല എസ്റ്റേറ്റിലെത്തി തെന്മല എസ്റ്റേറ്റിലൂടെ കന്നിമല ടോപ് ഡിവിഷനിൽ എത്തിപ്പെടുകയായിരുന്നു. കൂടുതലായി കാട്ടാനകളുടെ സാന്നിധ്യം കണ്ടുവരുന്നതിനാൽ തൊഴിലാളികൾ ഭയപ്പാടിലാണ്. കൂടുതൽ മേഖലകളിലേക്ക് ആർആർടി സംഘത്തിന്റെ പ്രവർത്തനം വ്യാപിപ്പിക്കണമെന്ന ആവശ്യം ശക്തമായി.