നാടിന്റെ ഹൃദയത്തിലേറി

അടിമാലി

നാടിന്റെ ഹൃദയം തൊട്ടറിഞ്ഞ് പണിയിടങ്ങളിൽ വോട്ടഭ്യർഥിച്ചെത്തിയ ജില്ലാ പഞ്ചായത്ത് അടിമാലി ഡിവിഷൻ എൽഡിഎഫ് സ്ഥാനാർഥി അഡ്വ. എം എം മാത്യുവിന് തൊഴിലാളികളുടെ ആഹ്ലാദ വരവേല്‍പ്പ്‌. വിശേഷം പറഞ്ഞും തോഴില്‍പരമായ കാര്യങ്ങള്‍ പങ്കുവച്ചും അവരിലൊരാളായി എം എം മാത്യു. നാല് പതിറ്റാണ്ടത്തെ പൊതു പ്രവര്‍ത്തനം കൊണ്ട് നേടിയ സ്വീകാര്യതയുള്ളതിനാല്‍ ആര്‍ക്കും അപരിചിതനല്ലായിരുന്നു സ്ഥാനാര്‍ഥി. കൈ കൊടുത്ത് സ്നേഹാന്വേഷണം നടത്തി സ്ഥാനാര്‍ഥിയും വിജയാശംസകള്‍ നേര്‍ന്ന് വിവിധ വിഭാഗം ജനങ്ങളും. അവരുടെ ഹൃദയങ്ങളില്‍ എം എം മാത്യു ഇതിനകം ഇടം നേടിക്കഴിഞ്ഞെന്ന് തെളിയിക്കുന്നതായി പര്യടന സ്ഥലങ്ങളിലെ ആവേശം. തൊഴിലുറപ്പ് കേന്ദ്രങ്ങളിലും പണിശാലകളിലും നേരിട്ടെത്തി തൊഴിലാളികളെയും മറ്റുള്ളവരെയും കണ്ടു. തൊഴിലുറപ്പ് തൊഴിലാളികളുടെ ആശങ്കകള്‍ കേട്ടു, പോംവഴികള്‍ പറഞ്ഞുനല്‍കി, അടിമാലി ഡിവിഷനിലെ വികസന മുരടിപ്പും ജനങ്ങളുമായി പങ്കുവച്ചായിരുന്നു തൊട്ടടുത്ത കേന്ദ്രങ്ങളിലേക്കുള്ള പര്യടനം.