മുന്നേറ്റം തുടരാൻ

ചിറ്റൂർ

പാതയ്‌ക്കപ്പുറം തമിഴ്‌നാടും ഇപ്പുറം കേരളവും അതിർത്തി പങ്കിടുന്ന ഡിവിഷൻ. കാർഷികമേഖല. കുത്തക ഭീമനായ കൊക്കക്കോളയെ കെട്ടുകെട്ടിച്ച പോരാട്ടഭൂമി. കൊഴിഞ്ഞാമ്പാറ, വണ്ണാമട, മീനാക്ഷിപുരം, വണ്ടിത്താവളം ബ്ലോക്ക് ഡിവിഷനുകളിൽ ഉൾപ്പെടുന്ന 45 വാർഡുകൾ. എല്ലാകാലത്തും ഇടതുപക്ഷത്തിനൊപ്പം നിൽക്കുന്ന ഡിവിഷൻ. ഡിവിഷനിലെ 80 ശതമാനം ആളുകളുടെയും ഉപജീവനം കൃഷിയാണ്‌. കഴിഞ്ഞതവണ എൽഡിഎഫിലെ മാധുരി പത്മനാഭൻ 5,323 വോട്ടിന്റെ ഭൂരിപക്ഷത്തിനാണ് വിജയിച്ചത്. കഴിഞ്ഞ അഞ്ചുവർഷം ജില്ലാപഞ്ചായത്ത് ഫണ്ട്‌ 10 കോടിയിലധികം വിനിയോഗിച്ച്‌ നിരവധി വികസനം നടപ്പാക്കി. നറണി ക്രിമിറ്റോറിയം(1.10 കോടി), മിനിമാസ്‌റ്റ്‌ ലൈറ്റുകൾ(45 ലക്ഷം), വിളയോടി ഖാദി യൂണിറ്റ്‌(28 ലക്ഷം), മണിയാട്ടുകുളന്പ്‌ കോളനി നവീകരണം(20 ലക്ഷം), സൂരിപ്പാറ മാലിന്യനിർമാർജനം(20 ലക്ഷം), അയ്യൻകുളം പുനരുദ്ധാരണം(30 ലക്ഷം), അലയാർ, പ്ലാച്ചിമട വയോപാർക്കുകൾ(10 ലക്ഷം വീതം), മീനാക്ഷിപുരം സ്‌കൂൾ നവീകരണം(42 ലക്ഷം), കന്നിമാരി ജിഎച്ച്‌എസ്‌എസ്‌ കെട്ടിടം , നവീകരണം (65 ലക്ഷം) എന്നിവയാണ്‌ പ്രധാന പദ്ധതികൾ. അഡ്വ. ടി മഹേഷാണ് എൽഡിഎഫ്‌ സ്ഥാനാർഥി. ചിറ്റൂർ കോടതിയിൽ പ്രാക്ടീസ് ചെയ്യുന്ന അഭിഭാഷകനാണ്. നിലവിൽ യുവജനതാദൾ (എസ്) സംസ്ഥാന പ്രസിഡന്റ്‌. സച്ചിദാനന്ദ ഗോപാലകൃഷ്ണൻ (യുഡിഎഫ്), എം ബാലകൃഷ്ണൻ (ബിജെപി) എന്നിവരാണ്‌ മറ്റ്‌ സ്ഥാനാർഥികൾ.