വാഴക്കാടിന് മാറ്റംവേണം

കൊണ്ടോട്ടി

കാർഷിക മേഖലയ്ക്ക് പ്രാധാന്യമുള്ള പ്രദേശമാണ് വാഴക്കാട്. തുടർച്ചയായി യുഡിഎഫ് ജയിക്കുന്നതാണ് ഇവിടുത്തെ ജില്ലാ പഞ്ചായത്ത് ‍ഡിവിഷന്‍. വാഴക്കാട്, വാഴയൂർ പഞ്ചായത്തുകൾ പൂർണമായും ചെറുകാവ് പഞ്ചായത്തിലെ 21 വാർഡുകളും ചേലേമ്പ്ര, പുളിക്കൽ പഞ്ചായത്തുകളിലെ രണ്ടുവീതം വാർഡുകളും ഉൾപ്പെട്ടതാണ് ഡിവിഷൻ. ​യുഡിഎഫിന്റെ വികസനവിരുദ്ധ നിലപാടുകളാണ് പ്രദേശത്ത് തെരഞ്ഞെടുപ്പ് ചര്‍ച്ചാവിഷയം. ജില്ലാ പഞ്ചായത്ത് ഫണ്ടുകൾ ഡിവിഷനിൽ ആവശ്യത്തിന് വിനിയോഗിച്ചില്ല. ജില്ലാ പഞ്ചായത്ത് ഭരണസമിതിയുടെ അഴിമതിയും ജനങ്ങളില്‍ എതിര്‍പ്പുളവാക്കിയിട്ടുണ്ട്. സംസ്ഥാന സര്‍ക്കാരിന്റെ ക്ഷേമ, വികസന പ്രവര്‍ത്തനങ്ങള്‍ വോട്ടായി മാറുമെന്നാണ് എല്‍ഡിഎഫ് കരുതുന്നത്. മികച്ച സംഘാടകനും പ്രഭാഷകനും ഗ്രന്ഥകാരനുമായ എൻ പ്രമോദ് ദാസാണ് എൽഡിഎഫ് സ്ഥാനാര്‍ഥി. അരൂർ എഎംയുപി സ്കൂൾ അധ്യാപകനാണ്. സിപിഐ എം ജില്ലാ കമ്മിറ്റിയംഗം, കൊണ്ടോട്ടി ഏരിയാ സെക്രട്ടറി, ഡിവൈഎഫ്ഐ ബ്ലോക്ക് സെക്രട്ടറി, കർഷക സംഘം ഏരിയാ സെക്രട്ടറി, ലൈബ്രറി കൗൺസിൽ ജില്ലാ സെക്രട്ടറി എന്നീ നിലകളിലും പ്രവർത്തിച്ചു. കൊണ്ടോട്ടി ബ്ലോക്ക് പഞ്ചായത്ത് അംഗമായിരുന്നു. നിലവിൽ സിപിഐ എം കൊണ്ടോട്ടി ഏരിയാ കമ്മിറ്റി അംഗവും ലൈബ്രറി കൗൺസിൽ സംസ്ഥാന നിർവാഹക സമിതി അംഗവുമാണ്. വാഴക്കാട് മണ്ഡലം കോൺഗ്രസ് കമ്മിറ്റി പ്രസിഡന്റ് ജൈസൽ എളമരമാണ് യുഡിഎഫ് സ്ഥാനാർഥി. ബിജെപി സെൻട്രൽ ജില്ലാ സെക്രട്ടറി ഷിബു അനന്തായുരാണ് എന്‍ഡിഎ സ്ഥാനാർഥി.