‘ഹരിതവിദ്യാലയം 4.0’
റിയാലിറ്റി ഷോയില്‍ തിളങ്ങി ജില്ലയിലെ 16 സ്‌കൂള്‍
മലപ്പുറം
കേരള ഇന്‍ഫ്രാസ്ട്രക്ചര്‍ ആൻഡ്‌ ടെക്‌നോളജി ഫോര്‍ എഡ്യൂക്കേഷന്‍ (കൈറ്റ്) നടത്തിയ ‘ഹരിത വിദ്യാലയം' വിദ്യാഭ്യാസ റിയാലിറ്റി ഷോയുടെ നാലാം എഡിഷന്റെ പ്രാഥമിക പട്ടികയില്‍ ജില്ലയിലെ 16 സ്‌കൂള്‍ ഇടംപിടിച്ചു. എച്ച്എംവൈഎച്ച്എസ് മഞ്ചേരി, എകെഎംഎച്ച്എസ്എസ് കോട്ടൂര്‍, ജിഎച്ച്എസ് അഞ്ചച്ചവടി, ഐഒഎച്ച്എസ് എടവണ്ണ, ഇഎംഇഎഎച്ച്എസ് കൊണ്ടോട്ടി, ജിഎച്ച്എസ് വാഴക്കാട്, ബഡ്‌സ് സ്‌കൂള്‍ ഫോര്‍ ഹിയറിങ് ഇംപയേര്‍ഡ്, ഒയുപിഎസ് പടിഞ്ഞാറ്റുമ്മുറി, ജിയുപിഎസ് മൂര്‍ക്കനാട്, ജിയുപിഎസ് കൂട്ടിലങ്ങാടി, എഎല്‍പിഎസ് എലംപുലശ്ശേരി, എഎംഎല്‍പിഎസ് വില്ലൂര്‍, ജിഎംഎല്‍പിഎസ് പാണ്ടിക്കാട്, ജിഎല്‍പിഎസ് ക്ലാരി, എഎംഎല്‍പിഎസ് പടിഞ്ഞാറെക്കര, ജിഎല്‍പിഎസ് കരുവാരക്കുണ്ട് എന്നീ വിദ്യാലയങ്ങളാണ് തെരഞ്ഞെടുത്തത്. സ്‌കൂളുകള്‍ നടത്തുന്ന ക്രിയാത്മകവും മാതൃകാപരവുമായ പ്രവര്‍ത്തനങ്ങളെ മറ്റ്‌ വിദ്യാലയങ്ങള്‍ക്കുകൂടി പങ്കുവച്ച് പൊതുവിദ്യാഭ്യാസ നിലവാരം ഉയര്‍ത്തുകയാണ് റിയാലിറ്റി ഷോയുടെ ലക്ഷ്യം. പരിപാടിയുടെ ഫ്ലോര്‍ ഷൂട്ട് തിരുവനന്തപുരം കൈറ്റ് സ്റ്റുഡിയോയില്‍ ഡിസംബര്‍ 26ന്‌ ആരംഭിക്കും. കൈറ്റ് വിക്ടേഴ്‌സില്‍ 2026 ജനുവരി ആദ്യംമുതല്‍ ഷോ സംപ്രേഷണംചെയ്യും. തെരഞ്ഞെടുത്ത വിദ്യാലയങ്ങളുമായി ഓണ്‍ലൈൻ മീറ്റിങ്ങിലൂടെ കൈറ്റ് സിഇഒ കെ അന്‍വർ സാദത്ത് സംസാരിച്ചു. കൈറ്റ് ജില്ലാ കോ–-ഓര്‍ഡിനേറ്റര്‍ കെ മുഹമ്മദ് ഷെരീഫ് പങ്കെടുത്തു.
Tags
0 comments