പുറത്തൂർ സിഎച്ച്‌ സെന്റർ നിർമാണം പാതിവഴിയിൽ

തിരൂർ

ഗൾഫിൽനിന്നടക്കം വൻ ഫണ്ട് ശേഖരണം നടത്തി നിർമാണമാരംഭിച്ച പുറത്തൂർ സിഎച്ച് ഡയാലിസിസ് സെന്റർ പാതിവഴിയിൽ. പ്രവൃത്തി പൂർത്തിയാകാത്തതിൽ പുറത്തൂർ പഞ്ചായത്ത് മുസ്ലിംലീഗിൽ ചേരിപ്പോര്. പുറത്തൂർ ആശുപത്രിപ്പടിയിലാണ്‌ സിഎച്ചിന്റെ പേരിൽ ഡയാലിസിസ് സെന്റർ നിർമാണം തുടങ്ങിയത്‌. രണ്ട് വർഷത്തോളമായിട്ടും പൂർത്തിയാക്കാനായില്ല. കെഎംസിസിയുടേതടക്കം വ്യാപകമായ രീതിയിൽ സംഭാവന സമാഹരിച്ചാണ് കെട്ടിട നിർമാണം ആരംഭിച്ചത്. ഇതിന്റെ കണക്കുപോലും ഇതുവരെ അറിയിച്ചിട്ടില്ലെന്ന് ഒരുവിഭാഗം ലീഗ് പ്രവർത്തകർ ആരോപിക്കുന്നു. ഒരുവിഭാഗം പ്രവർത്തകർ ഇത്‌ ചോദ്യംചെയ്തെങ്കിലും തെരഞ്ഞെടുപ്പ് സമയമായതിനാൽ അവരെ അനുനയിപ്പിക്കാനുള്ള ശ്രമമാണ്‌ നടന്നത്‌.