തിരിച്ചുവരും ഏലംകുളം
പെരിന്തൽമണ്ണ
തൂതപ്പുഴ അതിരിട്ടൊഴുകുന്ന കാർഷിക മേഖലയാണ്‌ ഏലംകുളം. കുന്നക്കാവ്, അരക്കുപറമ്പ്, ഏലംകുളം, താഴേക്കോട്, ആനമങ്ങാട്, ആലിപ്പറമ്പ്, തൂത എന്നീ ബ്ലോക്ക്‌ ഡിവിഷനുകൾ ഉൾപ്പെടുന്നതാണ്‌ ജില്ലാ പഞ്ചായത്ത് ഏലംകുളം ഡിവിഷന്‍. 2020ല്‍ 2426 വോട്ടിനാണ്‌ യുഡിഎഫ് സ്ഥാനാര്‍ഥി ഇവിടെ വിജയിച്ചത്‌. അഞ്ച് വര്‍ഷം ജില്ലാ പഞ്ചായത്തിന്റെ തികഞ്ഞ അവഗണനയാണ്‌ ഡിവിഷൻ നേരിട്ടത്‌. എടുത്തുപറയത്തക്ക വികസനനേട്ടങ്ങളില്ല. സംസ്ഥാന സർക്കാർ കിഫ്‌ബിയിലൂടെ നടപ്പാക്കിയ 92.5 കോടിയുടെ രാമഞ്ചാടി കുടിവെള്ള പദ്ധതി, കുന്നക്കാവ് ഗവ. ഹയർ സെക്കൻഡറി സ്കൂളിനും കുന്നക്കാവ് ഗവ. എൽപി സ്കൂളിനും നിര്‍മിച്ച പുതിയ കെട്ടിടങ്ങള്‍ എന്നിവയാണ് യുഡിഎഫ് ഭരണസമിതിയുടെ അവഗണനയിലും പ്രദേശത്തിന് ആശ്വാസമായത്. താഴേക്കോട് പഞ്ചായത്തിലെ ബഡ്സ് സ്കൂൾ, ഏലംകുളം, താഴേക്കോട്, ആലിപ്പറമ്പ് കുടുംബാരോഗ്യ കേന്ദ്രങ്ങളുടെ കെട്ടിടങ്ങൾ എന്നിവയും സംസ്ഥാന സർക്കാർ നടപ്പാക്കിയതാണ്. പെരിന്തൽമണ്ണ –ചെർപ്പുളശേരി സംസ്ഥാന പാതയിൽ തൂതപ്പുഴയ്ക്ക് കുറുകെയുള്ള തൂതപ്പാലം പുതുക്കിപ്പണിയുന്നതിന്‌ നടപടികളും കൈക്കൊണ്ടു. സംസ്ഥാന സര്‍ക്കാരിന്റെ വികസനപ്രവര്‍ത്തനങ്ങളാണ് ഡിവിഷനില്‍ എല്‍ഡിഎഫ് പ്രചാരണായുധമാക്കുന്നത്‌. സിപിഐ ആനമങ്ങാട് ലോക്കൽ കമ്മിറ്റി അംഗവും അഭിഭാഷകയുമായ പി അഞ്ജനയാണ് എൽഡിഎഫ് സ്ഥാനാർഥി. മുസ്ലിംലീഗിലെ എ ടി സാജിത യുഡിഎഫ് സ്ഥാനാർഥിയും രചന സജീവ് എന്‍ഡ‍ിഎ സ്ഥാനാര്‍ഥിയുമാണ്.
0 comments