അരീക്കോടിനുമുണ്ട് വികസനസ്വപ്നം

അരീക്കോട്

കാൽപ്പന്ത് കളിക്ക് പേരുകേട്ട നാടാണ് അരീക്കോട്. ബ്ലോക്ക് പഞ്ചായത്തിലെ അരീക്കോട്, വെള്ളേരി, കുഴിമണ്ണ, കിഴിശേരി, ഓമാനൂർ, ചീക്കോട് ഡിവിഷനുകൾ ചേർന്നതാണ് ജില്ലാ പഞ്ചായത്ത്‌ അരീക്കോട് ഡിവിഷൻ. തുടർച്ചയായി യുഡിഎഫ് ജയിക്കുന്ന പ്രദേശമാണിത്. ജില്ലാ പഞ്ചായത്ത് യുഡിഎഫ് ഭരണസമിതിയുടെ അഴിമതിക്കഥകളാണ് നാട്ടിലെ ചര്‍ച്ചാവിഷയം. ജില്ലാ പഞ്ചായത്തിലേക്ക് വിജയിച്ച അംഗത്തെ നാട്ടില്‍ കാണാറില്ലെന്ന പരാതിയുമുണ്ട്. കുഴിമണ്ണ പഞ്ചായത്തിലെ എക്കാപറമ്പ് സ്വദേശി ഫസലുൽ ഹഖ് ചെമ്പൻ ആണ് എൽഡിഎഫ് സ്ഥാനാർഥി. ആർജെഡി ജില്ലാ കമ്മിറ്റിയംഗം, യുവ ജനതാദൾ ജില്ലാ പ്രസിഡന്റ്, മണ്ഡലം സെക്രട്ടറി, പ്രസിഡന്റ് എന്നീ നിലകളിലും പ്രവർത്തിച്ചു. ബികോം ബിരുദധാരിയാണ്. സംസ്ഥാന സര്‍ക്കാരിന്റെ വികസന പ്രവർത്തനങ്ങൾ വോട്ടായി മാറുമെന്ന പ്രതീക്ഷയാണ് എൽഡിഎഫിന്. വാഴക്കാട് എളമരം സ്വദേശി അബ്ദുള്‍ ജബ്ബാറാണ് യുഡിഎഫ് സ്ഥാനാർഥി. അരീക്കോട് സൗത്ത് പുത്തലം സ്വദേശി ഷാജുവാണ് ബിജെപി സ്ഥാനാർഥി.