വേങ്ങരയ്‌ക്കും വളരണം

വേങ്ങര

ബ്ലോക്ക് പഞ്ചായത്തിലെ പുകയൂർ, കക്കാടംപുറം, എടയാട്ടുപറമ്പ്, കച്ചേരിപ്പടി, വേങ്ങര, കുറ്റൂർ, വി കെ പടി എന്നീ ഡിവിഷനുകൾ ഉൾപ്പെട്ടതാണ് ജില്ലാ പഞ്ചായത്ത് വേങ്ങര ഡിവിഷൻ. മുസ്ലിംലീഗ് പ്രതിനിധിയാണ് ഇവിടെ ഇതുവരെ തെരഞ്ഞെടുക്കപ്പെട്ടിട്ടുള്ളത്. എന്നാൽ, ഡിവിഷനിലേക്ക്‌ വികസനമെത്തിക്കുന്നതിൽ ഇവർ പരാജയമാണെന്നാണ് ആക്ഷേപം. എല്ലാവർക്കും കുടിവെള്ളം എത്തിക്കുന്നതിനുള്ള വിവിധ പദ്ധതികൾ പൂർണമായി നടപ്പാക്കാനായിട്ടില്ല. ജലസ്രോതസ്സായി കടലുണ്ടിപ്പുഴയുണ്ടെങ്കിലും കാർഷികമേഖലയെ പുഷ്ടിപ്പെടുത്താനുമായില്ല. കായികാഭിവൃദ്ധിക്കുള്ള പദ്ധതികളുമില്ല. സംസ്ഥാന സർക്കാർ ഡിവിഷനിൽ നടപ്പാക്കിയ പദ്ധതികൾ നിരവധിയുണ്ട്. വേങ്ങര, കുറുക, കൊളപ്പുറം ഹൈസ്കൂൾ കെട്ടിടങ്ങൾ, അഗ്നിരക്ഷാനിലയത്തിനായി ഭൂമി ഏറ്റെടുക്കൽ, വേങ്ങര‌മുതൽ കൂരിയാട് വരെ റോഡ് പുനരുദ്ധാരണം, കാര്യാട് –അച്ചനമ്പലം റോഡ് പുനരുദ്ധാരണം, ടൗണിലെ ഗതാഗതക്കുരുക്കിന് പരിഹാരമായ മേൽപ്പാലം നടപടികൾ എന്നിവ ഇവയില്‍ ചിലതാണ്. ഇ‍ൗ വികസനപ്രവർത്തനങ്ങൾ വോട്ടായി മാറുമെന്ന പ്രതീക്ഷയിലാണ്‌ എൽഡിഎഫ്‌. സിപിഐ മണ്ഡലം കമ്മിറ്റി അംഗവും എഐവൈഎഫ് മണ്ഡലം സെക്രട്ടറിയുമായ പി കെ അബ്ദുള്‍ റഷീദാണ് എൽഡിഎഫ് സ്ഥാനാർഥി. എ ആർ നഗർ കൊടക്കല്ല് സ്വദേശിയാണ്‌. ലീഗ് മണ്ഡലം പ്രസിഡന്റ്‌ പി കെ അസ്‌ലുവാണ് യുഡിഎഫ്‌ സ്ഥാനാർഥി. ബിജെപി വേങ്ങര മണ്ഡലം പ്രസിഡന്റ്‌ വി എൻ ജയകൃഷ്ണനാണ് എൻഡിഎ സ്ഥാനാർഥി.