ജില്ലയില്‍ 385 എച്ച്ഐവി ബാധിതര്‍

സ്വന്തം ലേഖകന്‍

മലപ്പുറം

ആരോഗ്യവകുപ്പിന്റെ കണക്കനുസരിച്ച് ജില്ലയില്‍ എച്ച്ഐവി ബാധിതരായവരില്‍ കൂടുതലും യുവാക്കള്‍. എച്ച്ഐവി പ്രതിരോധ ചികിത്സയെടുക്കുന്ന 385 പേരില്‍ 193 പേരും 16നും 44നും ഇടയില്‍ പ്രായമുള്ളവരാണ്. 16മുതല്‍ 24 വയസുവരെയുള്ള 26 പേര്‍ക്കും 25മുതല്‍ 44വരെയുള്ള 167 പേര്‍ക്കുമാണ് രോഗം സ്ഥിരീകരിച്ചത്. 45മുതല്‍ 60വരെയുള്ള 163 പേരും 60ന് മുകളിലുള്ള 27 പേരും ചികിത്സയിലുണ്ട്. അഞ്ചുമുതല്‍ 15 വയസുവരെയുള്ള രണ്ട് കുട്ടികള്‍ക്കും രോഗബാധയുണ്ട്. മഞ്ചേരി ഗവ. മെഡിക്കല്‍ കോളേജ് ആശുപത്രിയിലാണ് എച്ച്ഐവി പ്രതിരോധത്തിനുള്ള ആന്റി റിട്രോ വൈറല്‍ (എആര്‍ടി) ചികിത്സ ലഭിക്കുന്നത്. ജില്ലയില്‍ എച്ച്ഐവി ബാധിതരായ എല്ലാവരെയും കണ്ടെത്താന്‍ കഴിഞ്ഞിട്ടില്ലെന്നാണ് ആരോഗ്യവകുപ്പിന്റെ വിലയിരുത്തല്‍. രോഗലക്ഷണം പ്രകടമാക്കാന്‍ വര്‍ഷങ്ങളെടുക്കുമെന്നതിനാലാണിത്. പ്രതീക്ഷിത കണക്കിന്റെ 60 ശതമാനം എച്ച്ഐവി ബാധിതരെയാണ് ജില്ലയില്‍ കണ്ടെത്തിയത്. ഇതില്‍ 95 ശതമാനത്തിലേറെ പേര്‍ക്ക് എആര്‍ടി ചികിത്സ നല്‍കുന്നു. ചികിത്സ ലഭിച്ച 99 ശതമാനം പേരിലും വൈറസിന്റെ അളവ് കുറയ്ക്കാനായി. ​ദിനാചരണം നാളെ ജില്ലാ ആരോഗ്യവിഭാഗം നേതൃത്വത്തില്‍ തിങ്കളാഴ്ച ലോക എയ്ഡ്സ് ദിനാചരണം നടത്തുമെന്ന് അധികൃതര്‍ വാര്‍ത്താ സമ്മേളനത്തില്‍‌ അറിയിച്ചു. ജില്ലാതല ഉദ്ഘാടനം കുറ്റിപ്പുറം എംഇഎസ് എന്‍ജിനിയറിങ് കോളേജ് ഓഡിറ്റോറിയത്തില്‍ രാവിലെ 10ന് തിരൂര്‍ സബ്കലക്ടര്‍ ദിലീപ് കൈനിക്കര നിർവഹിക്കും. സന്ദേശറാലി, ഫ്ലാഷ്‌മോബ്, മൂകാഭിനയം എന്നിവയുമുണ്ടാകും. ജില്ലാ മെഡിക്കല്‍ ഓഫീസര്‍ ടി കെ ജയന്തി, ജില്ലാ എയ്ഡ്സ് നിയന്ത്രണ ഓഫീസര്‍ ‍ഡോ. കെ എം നൂന മര്‍ജ, കേരള എയ്ഡ്സ് നിയന്ത്രണ സൊസൈറ്റി ക്ലസ്റ്റര്‍ പ്രോഗ്രാം മാനേജര്‍ എസ് സുനില്‍ കുമാര്‍, കെ പി സാദിഖ് അലി എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.