റിബലിൽ വലഞ്ഞ്‌ 
യുഡിഎഫ്‌

മലപ്പുറം

നാമനിർദേശ പത്രിക സമർപ്പിക്കാനുള്ള സമയം പിന്നിട്ടിട്ടും അടിതീരാതെ യുഡിഎഫ്‌. പല തദ്ദേശ സ്ഥാപനങ്ങളിലും മത്സരത്തിന് വിമതരുമുണ്ട്‌. മുന്നണി സംവിധാനം താറുമാറായതോടെ ഒരേ സീറ്റിലേക്ക്‌ കോൺഗ്രസും ലീഗും പത്രിക നൽകിയിട്ടുണ്ട്‌.

തിരൂരങ്ങാടിയിൽ ലീഗ് സംസ്ഥാന ജനറൽ സെക്രട്ടറി അഡ്വ. പി എം എ സലാമിന്റെ വാർഡിൽ നഗരസഭാ വൈസ് ചെയർപേഴ്സണും വനിതാ ലീഗ്‌ നേതാവുമായ സുലൈഖ കാലൊടി വിമതയായി മത്സരിക്കുന്നുണ്ട്‌. നഗരസഭയിൽ മറ്റൊരിടത്തും റിബലുണ്ട്‌.

നിലമ്പൂർ നഗരസഭയിൽ മൂന്നിടത്താണ് ലീഗ്‌ വിമതർ. താനൂർ, വളാഞ്ചേരി നഗരസഭകളിൽ ലീഗിന്‌ വിമതരുണ്ട്‌. വളാഞ്ചേരിയില്‍ കെഎംസിസി നേതാവ്‌ ജാഫർ നീറ്റുകാട്ടിലാണ്‌ ലീഗ്‌ വിമതൻ. താനൂർ നഗരസഭ 36–-ാം ഡിവിഷൻ ചെള്ളിക്കാട് നിലവിലെ കൗൺസിലർ ഷാഹിദ സ്വതന്ത്രയായി മത്സരിക്കുന്നു. പെരുവള്ളൂരിലെ കൊല്ലംചിന, പറമ്പിൽപീടിക ബ്ലോക്ക് ഡിവിഷനുകളിലെ ലീഗ് സ്ഥാനാർഥികൾക്കെതിരെ യൂത്ത് ലീഗ് നേതാക്കൾ വിമതരായി പത്രിക നൽകി.

പലയിടത്തും കോൺഗ്രസ്‌ സീറ്റുകളിൽ ലീഗ്‌ സ്ഥാനാർഥികൾ സ്വതന്ത്രരായി മത്സരിക്കുന്നുണ്ട്‌. കൊണ്ടോട്ടി നഗരസഭ രണ്ടാം വാർഡ് പനയംപറമ്പിൽ യുഡിഎഫിന്റെ ഔദ്യോഗിക സ്ഥാനാർഥിയെ വെട്ടിലാക്കി ലീഗ്‌ വിമതൻ രംഗത്തെത്തി. ലീഗ് നേതൃത്വത്തിന്റെ മൗനാനുവാദത്തോടെയാണ് നിലവിലെ ക‍ൗൺസിലർ ഖാലിദ് മത്സരത്തിന്‌ ഇറങ്ങുന്നത്‌. കോൺഗ്രസിൽ പലയിടത്തും കലാപാന്തരീക്ഷമാണ്‌. എടക്കരയിൽ വനിതാ നേതാവിനെ പത്രിക നൽകാൻ അനുവദിക്കാതെ കോൺഗ്രസ് പ്രവർത്തകർ തടഞ്ഞിരുന്നു. ഇവിടെ പേയ്‌മെന്റ്‌ സീറ്റിൽ മറ്റൊരാളെ പ്രസിഡന്റാക്കാനാണ്‌ നീക്കമെന്നാണ്‌ ആക്ഷേപം. നന്നമ്പ്രയിൽ യുഡിഎഫിൽ വിമതശല്യം രൂക്ഷമാണ്‌. കോൺഗ്രസിനും ലീഗിനും വിമതനുണ്ട്‌.

മലപ്പുറം ബ്ലോക്ക്‌ പഞ്ചായത്തിൽ വലിയാട്‌ ഡിവിഷനിൽ കോൺഗ്രസും ലീഗും പത്രിക നൽകി. കോൺഗ്രസിന്റെ ഒ‍ൗദ്യോഗിക സീറ്റിൽ ലീഗ്‌ ക‍ൗൺസിലറാണ്‌ വിമതനായി പത്രിക നൽകിയത്‌. പ്രാദേശിക ലീഗ്‌ നേതാക്കൾക്കൊപ്പമെത്തിയാണ്‌ പത്രിക നല്‍കിയത്‌.

നന്നമ്പ്രയിൽ റിബലൊഴുക്ക്‌

താനൂർ

നന്നമ്പ്ര പഞ്ചായത്തിൽ യുഡിഎഫിൽ റിബൽ പ്രളയം. കോൺഗ്രസ് സീറ്റിൽ ലീഗും ലീഗ് സീറ്റിൽ കോൺഗ്രസും സ്ഥാനാർഥികളെ നിർത്തി. തിരൂരങ്ങാടി ബ്ലോക്ക് നന്നമ്പ്ര ഡിവിഷനിൽ കോൺഗ്രസ്, ലീഗ് നേതാക്കൾ മത്സരിക്കുന്നുണ്ട്. ഈ സീറ്റ് കോണ്‍ഗ്രസിന് നല്‍കാനായിരുന്നു മുന്നണി ധാരണ. സ്ഥാനാര്‍ഥി തര്‍ക്കം രൂക്ഷമായതോടെയാണ് റിബലുകളും പത്രിക നല്‍കിയത്. നിലവിലെ നന്നമ്പ്ര പഞ്ചായത്ത് വൈസ് പ്രസിഡന്റ്, കോൺഗ്രസ് മണ്ഡലം പ്രസിഡന്റ്, മുൻ പഞ്ചായത്ത് വൈസ് പ്രസിഡന്റ്, ബ്ലോക്ക് കോൺഗ്രസ് സെക്രട്ടറി എന്നിവർ കോൺഗ്രസിൽനിന്നും മുൻ സ്ഥിരംസമിതി അധ്യക്ഷൻ ലീഗിൽനിന്നും മത്സരിക്കുന്നു.

നന്നമ്പ്ര പഞ്ചായത്തിൽ വിവിധ വാർഡുകളിലേക്കും വിമതർ പത്രിക നൽകി. കോൺഗ്രസിന് നൽകിയ 19, 22 വാർഡുകളിൽ ലീഗ്, വെൽഫെയർ പാർടി സ്ഥാനാർഥികൾ മത്സരിക്കും. ഒമ്പതാം വാർഡിൽ രണ്ട് ലീഗ് നേതാക്കൾ കൂടാതെ കോൺഗ്രസ് നേതാവും റിബൽ സ്ഥാനാർഥിയായുണ്ട്. ലീഗ് വെൽഫെയർ പാർടിക്ക് നൽകിയ 20-ാം വാർഡിൽ വനിതാ ലീഗ് പഞ്ചായത്ത് പ്രസിഡന്റ് സ്ഥാനം രാജിവച്ചയാളും മത്സരിക്കുന്നു.