ഇനി നാടിന്‌ താങ്ങാവാൻ

മലപ്പുറം

ജീവിക്കാൻ ചുമടെടുക്കുന്നവരാണ്‌ ഇവർ നാലുപേർ. ജനാധിപത്യത്തിന്റെ പോരാട്ട വീഥിയിൽ പുതിയ ഉത്തരവാദിത്വമാണ്‌ നാട്‌ ഇവരെ ഏൽപ്പിക്കുന്നത്‌. തദ്ദേശ തെരഞ്ഞെടുപ്പിൽ ഇടതുപക്ഷ സ്ഥാനാർഥികളായി ജനവിധി തേടുകയാണ്‌ ഇ‍ൗ ചുമട്ടുതൊഴിലാളികൾ.

മഞ്ചേരി നഗരസഭയിലെ 34–-ാം വാർഡായ കോടതിപ്പടിയിൽനിന്നാണ് രാധാകൃഷ്ണൻ (കുഞ്ഞൂട്ടി) ജനവിധി തേടുന്നത്. 26 വർഷത്തെ ചുമട്ടുതൊഴിലാളി ജീവിതം. സിപിഐ എം, സിഐടിയു, പികെഎസ് പ്രസ്ഥാനങ്ങളിലെ സജീവ സാന്നിധ്യം. നിലവിൽ സിപിഐ എം കോവിലകംകുണ്ട് ബ്രാഞ്ച് സെക്രട്ടറി. സിഐടിയു ഏരിയാ കമ്മിറ്റി അംഗം, കെഎസ്‌കെടിയു വില്ലേജ് പ്രസിഡന്റ്, പികെഎസ് ലോക്കല്‍ സെക്രട്ടറി എന്നീ നിലകളിലും നിറസാന്നിധ്യം.

കൊണ്ടോട്ടി നഗരത്തിലെ ചുമട്ടുതൊഴിലാളികളായ രണ്ടുപേരാണ്‌ ജനവിധി തേടുന്നത്‌. കെ പി പ്രകാശൻ കൊണ്ടോട്ടി നഗരസഭ രണ്ടാം വാർഡ്‌ പനയംപറമ്പിലും സി കിഷോർകുമാർ മൊറയൂർ പഞ്ചായത്തിലെ പത്താം വാർഡിലും ജനവിധി തേടുന്നു. 23 വർഷമായി കൊണ്ടോട്ടിയിലെ ചുമട്ടുതൊഴിലാളികളാണ് രണ്ടുപേരും. തുറക്കൽ സ്വദേശിയായ പ്രകാശൻ മികച്ച സംഘാടകനും ജീവകാരുണ്യ പ്രവർത്തനങ്ങളിൽ സജീവവുമാണ്‌. ചുമട്ട് തൊഴിലാളി യൂണിയൻ (സിഐടിയു) കൊണ്ടോട്ടി ഏരിയാ കമ്മിറ്റി അംഗവും കൊണ്ടോട്ടി സെക്ടർ പ്രസിഡന്റുമാണ്. സിപിഐ എം തുറക്കൽ ബ്രാഞ്ച് അംഗം, പുരോഗമന കലാസാഹിത്യസംഘം പഞ്ചായത്ത് ട്രഷറർ, തുറക്കൽ അരങ്ങ് കലാ സാംസ്കാരിക വേദി വൈസ് പ്രസിഡന്റ്‌ എന്നീ നിലകളിലും പ്രവർത്തിക്കുന്നു.

ചുമട്ടുതൊഴിലാളി യൂണിയൻ (സിഐടിയു) കൊണ്ടോട്ടി യൂണിറ്റ് അംഗമാണ് അരിമ്പ്ര സ്വദേശിയായ കിഷോർകുമാർ. സിപിഐ എം മൊറയൂർ ലോക്കൽ കമ്മിറ്റി അംഗവും അരിമ്പ്ര സ്കൂൾപടി ബ്രാഞ്ച് സെക്രട്ടറിയുമാണ്. ഫുട്ബോൾ കളിക്കാരനായിരുന്ന കിഷോർ വിവിധ ക്ലബ്ബുകൾക്കായി ബൂട്ടണിഞ്ഞു. മൊറയൂരിൽ സാംസ്കാരിക രംഗത്തും സജീവം.

എടക്കര പഞ്ചായത്തിലെ വാർഡ് 15 പെരുങ്കുളത്തെ എൽഡിഎഫ് സ്ഥാനാർഥി സുലൈമാൻ ചേലക്കാടൻ 40 വർഷമായി ടിമ്പർ മേഖലയിലാണ്‌ പ്രവർത്തനം. ചുമട്ടുതൊഴിലാളി യൂണിയൻ (സിഐടിയു) എടക്കര ഏരിയാ കമ്മിറ്റി അംഗമായിരുന്നു.