മലകയറാതെ വികസനം

മലപ്പുറം

കാലങ്ങളായി മുസ്ലിംലീഗ്‌ ഭരണത്തിലാണ് മലപ്പുറം നഗരസഭ. ജില്ലാ ആസ്ഥാനമുള്‍പ്പെടുന്ന പ്രദേശമാണെങ്കിലും വികസനകാര്യത്തില്‍ ഗ്രാമപ്രദേശങ്ങളേക്കാള്‍ പിറകിലാണ് നഗരം. അടിസ്ഥാനസൗകര്യ വികസനത്തില്‍ ഭരണസമിതി തുടരുന്ന അലംഭാവം സാധാരണക്കാരെ ഏറെക്കാലമായി ബുദ്ധിമുട്ടിക്കുകയാണ്.

1970ലാണ് നഗരസഭ നിലവില്‍വന്നത്. 1995മുതല്‍ രണ്ടരവര്‍ഷംമാത്രമാണ് എല്‍ഡിഎഫ് ഭരണസമിതിയുണ്ടായിരുന്നത്‌. ഇക്കാലത്താണ് നഗരത്തിന് അഭിമാനമായി കുന്നുമ്മലില്‍ വാരിയന്‍കുന്നത്ത് കുഞ്ഞഹമ്മദ് ഹാജി സ്മാരക ടൗണ്‍ ഹാള്‍ നിര്‍മിച്ചത്. കുന്നുമ്മല്‍ ടൗണിലെ കംഫര്‍ട് സ്റ്റേഷനും എല്‍ഡിഎഫ് ഭരണസമിതി സ്ഥാപിച്ചതാണ്. തുടര്‍ന്നിങ്ങോട്ട് യുഡിഎഫ് മാറിമാറി ഭരിച്ചിട്ടും നഗരത്തില്‍ എടുത്തുപറയത്തക്ക പദ്ധതികളുണ്ടായില്ല. വ‍ൃത്തിയുള്ള പുതിയ കംഫര്‍ട്ട്‌ സ്റ്റേഷന്‍ നിര്‍മിക്കാന്‍പോലും നഗരസഭയ്ക്ക് കഴിഞ്ഞില്ല. എന്നാൽ, വിവിധയിടങ്ങളില്‍‌ ചെയര്‍മാനെയും ഭരണസമിതിയെയും പുകഴ്‌ത്തുന്ന ഫ്ലക്സ് ബോര്‍ഡുകള്‍ ഉയരുന്നതിന്‌ കുറവില്ല.

കെടുകാര്യസ്ഥതയുടെ മികച്ച ഉദാഹരണമാണ് പുതിയ കോട്ടപ്പടി മാര്‍ക്കറ്റ് സമുച്ചയം. അപ്രായോഗിക പ്ലാന്‍ വരച്ച് നിര്‍മാണം ആരംഭിച്ചതാണ് കഴിവുകേടിന്റെ തുടക്കം. വര്‍ഷം അഞ്ച് കഴിഞ്ഞിട്ടും നിര്‍മാണം പൂര്‍ത്തിയാക്കാന്‍ നഗരസഭയ്ക്കായിട്ടില്ല. ഇതോടെ പഴയ മാര്‍ക്കറ്റില്‍നിന്ന് ഒഴിഞ്ഞുകൊടുത്ത കച്ചവടക്കാരും പ്രതിസന്ധിയിലായി.

ലക്ഷങ്ങള്‍ ചെലവിട്ട് കോട്ടപ്പടി നഗരസഭാ ബസ് സ്റ്റാന്‍ഡില്‍ സ്ഥാപിച്ച മലിനജല ശുദ്ധീകരണ പ്ലാന്റ് ഇതുവരെ പ്രവര്‍ത്തിച്ചിട്ടില്ല. കഴിഞ്ഞ ഭരണസമിതി ഉദ്ഘാടനംചെയ്ത പ്ലാന്റ് ഫലപ്രദമായി പ്രവര്‍ത്തിപ്പിക്കാന്‍ നിലവിലെ ഭരണസമിതിക്കായില്ല. ​

നഗരത്തിലെ തെരുവുവിളക്ക് പദ്ധതിയിലും അഴിമതിയാണ് തെളിഞ്ഞുനിന്നത്. കോടികള്‍ മുടക്കി ആരംഭിച്ച പദ്ധതിയിലൂടെ 7000 വിളക്ക്‌ സ്ഥാപിക്കുമെന്നായിരുന്നു വാഗ്ദാനം. മൂന്ന് വര്‍ഷം കഴിഞ്ഞിട്ടും 3000 വിളക്ക്‌ സ്ഥാപിച്ചിട്ടില്ല. തെരുവുവിളക്കുകളുടെ വാര്‍ഷിക അറ്റകുറ്റപ്പണി നടത്തേണ്ട കരാര്‍ കമ്പനികളുടെ നിസ്സഹകരണം അവസാനിപ്പിക്കാനും ഭരണസമിതിക്കായില്ല. ഇതോടെ പല വാര്‍ഡുകളും ഇരുട്ടിലായി.

മുണ്ടുപറമ്പ് വാതക ശ്മശാനം നവീകരിക്കണമെന്ന ആവശ്യവും നിറവേറിയില്ല. 19 കോടിയിലേറെ വകയിരുത്തിയ വലിയതോട് നവീകരണവും എങ്ങുമെത്തിയില്ല. സംസ്ഥാന സര്‍ക്കാര്‍ കെഎസ്ഡബ്ല്യുപി പദ്ധതിയില്‍ പണം അനുവദിച്ചാണ് പുളിയേറ്റുമ്മല്‍ ട്രഞ്ചിങ് ഗ്രൗണ്ടില്‍ വര്‍ഷങ്ങളായി കൂട്ടിയിട്ട മാലിന്യം നീക്കിയത്.

​

​

​കക്ഷിനില:

ആകെ സീറ്റ്: 40

മുസ്ലിംലീഗ്: 23

കോണ്‍ഗ്രസ്: 2

സിപിഐ എം: 13

സിപിഐ എം സ്വതന്ത്ര: 1

സിപിഐ: 1