ഒറിജിനൽ സ്ഥാനാർഥിയാര്‌... ഉത്തരംമുട്ടി നേതാക്കൾ

എടക്കര

നിലമ്പൂർ ബ്ലോക്ക്‌ പഞ്ചായത്തിലേക്ക്‌ യുഡിഎഫ്‌ സ്ഥാനാർഥിയെന്ന്‌ അവകാശപ്പെട്ട്‌ നിരവധി കോൺഗ്രസ്‌ നേതാക്കൾ രംഗത്ത്‌. പോസ്‌റ്ററും ബാനറും സ്ഥാപിച്ച്‌ പ്രചാരണം തുടങ്ങിയതോടെ യഥാർഥ സ്ഥാനാർഥി ആരെന്ന ചോദ്യത്തിനുമുന്നിൽ ഉത്തരംമുട്ടി യുഡിഎഫ് നേതൃത്വം. എടക്കര ഡിവിഷനിൽനിന്ന്‌ മത്സരിക്കുന്ന ഒ ടി ജെയിംസിനെതിരെ വിമതൻ രംഗത്തെത്തി.

ബ്ലോക്ക് കോൺഗ്രസ് വൈസ് പ്രസിഡന്റ് ഷാഹുൽ ഹമീദാണ്‌ പത്രിക സമർപ്പിച്ച് പ്രചാരണം തുടങ്ങിയത്. വഴിക്കടവ് പഞ്ചായത്ത് വൈസ് പ്രസിഡന്റ് റെജി കണ്ടത്തിലും ബോബി സി മാമ്പ്രയും യുഡിഎഫ് സ്ഥാനാർഥികളായി ബ്ലോക്ക്‌ പഞ്ചായത്ത്‌ മണിമൂളി ഡിവിഷനിലേക്ക്‌ പത്രിക സമർപ്പിച്ച് പ്രചാരണം തുടങ്ങി. രണ്ടു പേരും ബോർഡുകൾ സ്ഥാപിച്ച് പ്രചാരണം തുടങ്ങിയതോടെ യുഡിഎഫ് വോട്ടർമാർ അങ്കലാപ്പിലാണ്. ഇതേ ഡിവിഷനിൽ ജാഫർ പുലിയോടനും യുഡിഎഫ് സ്ഥാനർഥിയായി പ്രചാരണം തുടങ്ങിയിരുന്നു. എന്നാൽ, നേതൃത്വം ഇടപെട്ട് പത്രിക സമർപ്പണം തടഞ്ഞു. ആര്യാടൻ ഷൗക്കത്ത്, വി എസ് ജോയി പക്ഷം ചേരിപ്പോര് രൂക്ഷമായ പ്രദേശമാണ് വഴിക്കടവ്, എടക്കര പഞ്ചായത്തുകൾ. വഴിക്കടവ് ബാങ്ക് തെരഞ്ഞെടുപ്പും ചേരിതിരിഞ്ഞാണ് നടന്നത്. നേതൃത്വത്തിന് പരിഹരിക്കാൻ കഴിയാത്തവിധം പൊട്ടിത്തെറിയിലേക്ക് നീങ്ങുകയാണ് കോൺഗ്രസിലെ സ്ഥാനാർഥി നിർണയം. സ്ഥിരമായി മത്സരിക്കുന്നവർ പിൻമാറാൻ തയ്യാറാവാത്തതാണ് പ്രതിഷേധം രൂക്ഷമാക്കിയത്. എടക്കരയിൽ കഴിഞ്ഞ ദിവസം ബ്ലോക്ക് പഞ്ചായത്ത് പ്രസിഡന്റ് പി പുഷ്പവല്ലിയെ കോൺഗ്രസ് ഓഫീസിൽ തടയാൻ നേതൃത്വം നൽകിയ ഷാഹുൽ ഹമീദാണ്‌ റിബലായി പത്രിക സമർപ്പിച്ചത്. പാർടി നടപടി സ്വീകരിച്ചാൽ ചെറുപ്പക്കാർ ഒന്നടങ്കം കോൺഗ്രസിൽനിന്ന് പുറത്തുപോകുമെന്നും ഭീഷണിയുണ്ട്‌.