4 പദ്ധതിയുടെ നിർവഹണം നിർത്തിവയ്‌ക്കാൻ സർക്കാർ നിർദേശം

തിരൂരങ്ങാടി

സ്വകാര്യ ഏജൻസിക്കുവേണ്ടി അക്രഡിറ്റഡ് ഏജൻസിയിൽനിന്ന് നിയമാനുസൃതമായി ലഭിച്ച ടെൻഡർ റദ്ദാക്കിയ തിരൂരങ്ങാടി നഗരസഭാ കൗൺസിലിന്റെ തീരുമാനം നടപ്പാക്കുന്നത് സർക്കാർ തടഞ്ഞു. നഗരസഭാ കൗൺസിൽ തീരുമാനത്തിനെതിരെയുള്ള വിയോജനക്കുറിപ്പ് നഗരസഭ സെക്രട്ടറി സർക്കാരിന് കൈമാറിയിരുന്നു. തുടർന്നാണ്‌ സർക്കാർ നടപടി.

വാർഷിക പദ്ധതിയിലെ ടെൻഡർ അംഗീകരിക്കുന്നതുമായി ബന്ധപ്പെട്ട് ആക്ഷേപം നിലനിൽക്കുന്ന നാല് പദ്ധതികൾ താൽക്കാലികമായി നിർത്തിവയ്‌ക്കാനാണ് സർക്കാർ നിർദേശം. തുടർ നടപടി പിന്നീട് അറിയിക്കുമെന്നും തദ്ദേശ സ്വയംഭരണ സെക്രട്ടറി മെയിൽ മുഖേന നഗരസഭ സെക്രട്ടറിയെ അറിയിച്ചു.

സർക്കാർ അക്രഡിറ്റഡ് ഏജൻസിക്ക് നിയമാനുസൃതമായി നൽകിയ നാല് ടെൻഡറുകൾ റദ്ദാക്കി ഓപ്പൺ ടെൻഡർ വിളിക്കണമെന്ന യുഡിഎഫ് ഭരണസമിതിയുടെ തീരുമാനത്തിൽ വിയോജിച്ചും ഇത് നിയമപ്രശ്നം വിളിച്ചുവരുത്തുമെന്ന്‌ കാണിച്ചുമാണ് തദ്ദേശ സ്വയംഭരണ സെക്രട്ടറിക്ക് കത്തയച്ചത്. എൽഡിഎഫ്‌ അംഗങ്ങളും സെക്രട്ടറിയുടെ വാദങ്ങളെ പിന്തുണച്ചിരുന്നു.

താലൂക്ക്‌ ആശുപത്രിയിൽ ജനറേറ്റർ സ്ഥാപിക്കൽ (50 ലക്ഷം), സോളാർ സ്ഥാപിക്കൽ (40 ലക്ഷം), വൈദ്യുതി ലോഡ് ക്രമപ്പെടുത്തൽ (20 ലക്ഷം), നഗരസഭാ ഓഫീസിൽ ഇൻവെർട്ടർ സ്ഥാപിക്കൽ (10 ലക്ഷം) എന്നീ പദ്ധതികളുടെ ടെൻഡറുകളിലാണ് ഭരണസമിതി നിയമവിരുദ്ധ ഇടപെടൽ നടത്തിയത്. കേരള ഇലക്‌ട്രിക്കൽ ആൻഡ്‌ അലൈഡ്‌ എൻജിനിയറിങ്‌ കമ്പനിക്കാണ്‌ (കെൽ) നിയമാനുസൃതമായി ടെൻഡർ ലഭിച്ചിരുന്നത്. ഇതാണ്‌ യുഡിഎഫ്‌ ഭരണസമിതി യോഗം റദ്ദാക്കാൻ തീരുമാനിച്ചത്‌. നഗരസഭയിൽ നാളുകളായി ഒരേ ഏജൻസിക്കാണ് ഇലക്ട്രിക്കൽ വർക്ക്, മെയിന്റനൻസ് നൽകിവരുന്നത്. നടപടിക്രമം പാലിക്കാതെയുള്ള ഈ പ്രവൃത്തികൾക്കെല്ലാം നിരവധി ഓഡിറ്റ് തടസ്സം നേരിടുന്നുണ്ട്‌. തുടർന്നാണ്‌ സെക്രട്ടറി വിഷയത്തിൽ ഇടപെട്ട്‌ പൊതുമേഖലാ സ്ഥാപനമായ കെല്ലിന്‌ ടെൻഡർ നൽകിയത്‌. നേരത്തെ സ്വകാര്യ ഏജൻസിക്ക്‌ നൽകിയിരുന്ന ടെൻഡറുകൾക്കുപിന്നിൽ നഗരസഭയിലെ ഭരണകക്ഷിയിൽപ്പെട്ട കൗൺസിലറുടെയും പഞ്ചായത്ത് മുൻ വൈസ് പ്രസിഡന്റിന്റെയും ഇടപെടലുണ്ടെന്നാണ് സൂചന. കഴിഞ്ഞ കാലങ്ങളിലെ നഗരസഭയിലെ പ്രവൃത്തികൾ സംബന്ധിച്ച് വിശദമായ പരിശോധന നടത്തുമെന്നും വിശദാംശങ്ങൾ പുറത്തുകൊണ്ടുവരുമെന്നും കൗൺസിലിൽ സെക്രട്ടറി വ്യക്തമാക്കിയിരുന്നു.