യുഡിഎഫ് അവഗണിച്ചു; തൃണമൂലിൽ കൂട്ടരാജി

നിലമ്പൂർ

ചുങ്കത്തറയില്‍ തൃണമൂല്‍ കോണ്‍ഗ്രസില്‍നിന്ന്‌ രാജിവച്ചതായി ഭാരവാഹികള്‍ വാര്‍ത്താ സമ്മേളനത്തില്‍ പറഞ്ഞു. യുഡിഎഫുമായി സഹകരിക്കാന്‍ സംസ്ഥാനതലത്തില്‍ തീരുമാനമെടുത്തിട്ടും ചുങ്കത്തറയില്‍ തദ്ദേശ തെരഞ്ഞെടുപ്പില്‍ തൃണമൂല്‍ കോണ്‍ഗ്രസിന് പരിഗണന ലഭിക്കാത്തതിനെ തുടര്‍ന്നാണ് രാജിവയ്ക്കുന്നതെന്നും നേതാക്കള്‍ പറഞ്ഞു.

തൃണമൂല്‍ കോണ്‍ഗ്രസിന്റെ ഇടപെടലില്‍ ഭരണമാറ്റം നടന്ന പഞ്ചായത്താണ് ചുങ്കത്തറ. കണ്‍വന്‍ഷനിലും പത്രികാ സമര്‍പ്പണത്തിലും തൃണമൂല്‍ കോണ്‍ഗ്രസിനെ പാടേ അവഗണിക്കുന്ന നിലപാടാണ് യുഡിഎഫ് എടുത്തത്. ഈ സാഹചര്യത്തില്‍ ചുങ്കത്തറയില്‍ യുഡിഎഫിനെ പിന്തുണക്കാന്‍ തയ്യാറല്ലെന്നും ഇവരെ പരാജയപ്പെടുത്താന്‍ ഇടതുമുന്നണിയുമായി സഹകരിക്കുമെന്നും നേതാക്കള്‍ പറഞ്ഞു. യുഡിഎഫും ബിജെപിയും തമ്മിൽ അവിശുദ്ധ രാഷ്ട്രീയ ബന്ധം സ്ഥാപിക്കുന്നതായും ഇവര്‍ ആരോപിച്ചു. ഇക്കാരണത്താല്‍ ഇടതുപക്ഷവുമായി സഹകരിക്കാന്‍ തീരുമാനിച്ചതായും തൃണമൂല്‍ കോണ്‍ഗ്രസ് ഭാരവാഹിത്വങ്ങളും അംഗത്വവും രാജിവയ്ക്കുകയാണെന്നും മണ്ഡലം പ്രസിഡന്റ് മുഹമ്മദ് കാപ്പാട്, സെക്രട്ടറി സാബു പൊന്‍വേലില്‍, നാണി പുലിമുണ്ട, സുനീര്‍ പൂക്കോട്ടുമണ്ണ എന്നിവര്‍ പറഞ്ഞു.

കഴിഞ്ഞ ദിവസം തൃണമൂൽ ചുങ്കത്തറ കോഡിനേറ്റർ പിബി സുഭാഷും രാജിവെച്ച് സിപിഐ എമ്മുമായി സഹകരിക്കാൻ തീരുമാനിച്ചിരുന്നു.