പെരുവള്ളൂരിൽ ലീഗിനെതിരെ യൂത്ത് ലീഗ് വിമതർ

പെരുവള്ളൂർ

പെരുവള്ളൂർ പഞ്ചായത്തിലെ ബ്ലോക്ക് ഡിവിഷനുകളിൽ യൂത്ത് ലീഗ് നേതാക്കൾ വിമതരായി പത്രിക നൽകി. കൊല്ലംചിന, പറമ്പിൽപീടിക ബ്ലോക്ക് പഞ്ചായത്ത് ഡിവിഷനുകളിലാണ് മുസ്ലിംലീഗിന്റെ ഔദ്യോഗിക സ്ഥാനാർഥികൾക്കെതിരെ യൂത്ത് ലീഗ് സ്ഥാനാർഥികൾ രംഗത്തെത്തിയത്.

മൂന്ന് തവണ ജനപ്രതിനിധിയായ പഞ്ചായത്ത് മുസ്ലിംലീഗ് സെക്രട്ടറി ഇസ്മായിൽ കാവുങ്ങലണ് കൊല്ലംചിനയിൽ ഔദ്യോഗിക സ്ഥാനാർഥി. പഞ്ചായത്ത് പ്രസിഡന്റ്‌ സി സി അമീർ അലിയെ പറമ്പിൽപീടികയിലും സ്ഥാനാർഥിയാക്കി. ഇതോടെയാണ് പഞ്ചായത്ത് ലീഗ് നേതൃത്വത്തിനെതിരെ യൂത്ത് ലീഗ് രംഗത്തെത്തിയത്. യൂത്ത് ലീഗ് വള്ളിക്കുന്ന് മണ്ഡലം പ്രസിഡന്റ്‌ സി എ ബഷീർ‍, വൈറ്റ് ഗാർഡ് മണ്ഡലം വൈസ് ക്യാപ്റ്റൻ യു പി അമീർ എന്നിവരാണ് വിമത സ്ഥാനാർഥികളായി പത്രിക നൽകിയത്. കൊല്ലംചിന, പറമ്പിൽപീടിക ഡിവിഷനുകൾ പഞ്ചായത്ത് ലീഗ് പ്രസിഡന്റും സെക്രട്ടറിയും പങ്കിട്ടെടുത്തത് മുസ്ലിംലീഗ്‌ അണികളിലും പ്രതിഷേധത്തിനിടയാക്കി. മൂന്ന് ടേം വ്യവസ്ഥ ലംഘിച്ചാണ് സ്ഥാനാർഥികളെ നാമനിര്‍ദേശം നൽകിയതെന്നും യൂത്ത് ലീഗിനെ പൂർണമായി അവഗണിച്ചുവെന്നുമാണ് പരാതി. കഴിഞ്ഞ ദിവസം കൺവൻഷൻ കഴിഞ്ഞിറങ്ങിയ നേതാക്കളെ യൂത്ത് ലീഗുകാർ തടഞ്ഞിരുന്നു. ഇത് കൈയാങ്കളിയിലും കൂട്ടയടിയിലും കലാശിച്ചു. പറമ്പിൽപീടിക, കൊല്ലംചിന ബ്ലോക്ക് ഡിവിഷനുകൾക്ക് പുറമെയുള്ള കാടപ്പടി ഡിവിഷൻ വനിതാ സംവരണമാണ്. ജനറൽ സീറ്റിൽ ഒന്നാണ് യൂത്ത് ലീഗ് ആവശ്യപ്പെട്ടിരുന്നത്. ഈ ആവശ്യം തള്ളിയാണ് മുസ്ലിംലീഗ് നേതൃത്വം സ്ഥാനാർഥികളെ പ്രഖ്യാപിച്ചത്. മുസ്ലിംലീഗ് ജില്ലാ ജനറൽ സെക്രട്ടറികൂടിയായ പി അബ്ദുൾ ഹമീദ് എംഎൽഎയുടെ നിയമസഭാ മണ്ഡലമായ വള്ളിക്കുന്നിൽ ഉൾപ്പെട്ട പഞ്ചായത്താണ് പെരുവള്ളൂർ.