"ദിശ' പ്രദർശനത്തിൽ കലിക്കറ്റും

തേഞ്ഞിപ്പലം

പൊതുവിദ്യാഭ്യാസ വകുപ്പിനുകീഴിലെ ഹയർ സെക്കൻഡറി വിഭാഗം കരിയർ ഗൈഡൻസ് ആൻഡ്‌ അഡോളസെന്റ്‌ കൗൺസിൽ സംഘടിപ്പിച്ച ഉന്നത വിദ്യാഭ്യാസ തൊഴിൽ മാർഗനിർദേശക പ്രദർശനമായ ദിശയിൽ പങ്കാളിയായി കലിക്കറ്റ് സർവകലാശാലയും. 20മുതൽ 24വരെ കോട്ടയം നെഹ്റു സ്റ്റേഡിയത്തിലാണ് പ്രദർശനം.

വിവിധ സർവകലാശാലകൾ, സാങ്കേതിക വിദ്യാഭ്യാസ സ്ഥാപനങ്ങൾ തുടങ്ങിയവയുടേതായി 90 സ്റ്റാളുകൾ പ്രവർത്തിക്കുന്നു. സംസ്ഥാനത്തിന്റെ പല ഭാഗങ്ങളിൽനിന്നായി പ്രതിദിനം പതിനായിരത്തോളം പേരാണ് പ്രദർശനത്തിനെത്തുന്നത്. വിദ്യാർഥികൾക്ക് പുറമെ അധ്യാപകരും രക്ഷിതാക്കളും പഠന- തൊഴിൽ അവസരങ്ങൾ അറിയാനെത്തുന്നുണ്ട്‌. അഞ്ഞൂറോളം അധ്യാപകരാണ് മേളയുടെ മേൽനോട്ടം വഹിക്കുന്നത്. പൊതുവിദ്യാഭ്യാസ വകുപ്പ് സെക്രട്ടറി ഡോ. കെ വാസുകി ഉദ്ഘാടനം ചെയ്തു. പൊതുവിദ്യാഭ്യാസ വകുപ്പ് ഡയറക്ടര്‍ എന്‍ എസ്‌ കെ ഉമേഷ് അധ്യക്ഷനായി.