നെഞ്ചുലച്ച്‌ ഗാസയുടെ പേരുകൾ

ആലപ്പുഴ

ഇയദ്‌ മുഹമ്മദ്‌ ഖമിസ്‌ അഷ‍ൗർ, റിമസ്‌ ഖാലിദ്‌ സലഹ്‌ അൽ ഹദാദ്‌, റഫീഖ്‌ യൂസുഫ്‌ അൽ ബ്രീം....ഇസ്രയേൽ വംശഹത്യയിൽ ഗാസയിൽ കൊല്ലപ്പെട്ട കുട്ടികളുടെ പേരുകൾ തിരുവമ്പാടി ഗവ. യുപിഎസിലെ ആറാം ക്ലാസ്‌ വിദ്യാർഥി ഗ‍ൗരി കൃഷ്‌ണ വായിക്കുമ്പോൾ മുഴുവൻ പേരുടെയും നെഞ്ചുലഞ്ഞു. ഇസ്രയേലിനും അവർക്ക്‌ പിന്തുണ നൽകുന്ന അമേരിക്കൻ, ഇന്ത്യൻ ഭരണകേന്ദ്രങ്ങൾക്കുമെതിരെ ചിന്ത രവി ഫ‍ൗണ്ടേഷനും പലസ്‌തീൻ സോളിഡാരിറ്റി ഫോറവും വിവിധ സംഘടനകളും ചേർന്ന്‌ സംഘടിപ്പിച്ച "ഗാസയുടെ പേരുകൾ' മാനവസദസിലാണ്‌ ആറാം ക്ലാസുകാരിമുതൽ വിവിധ സംഘടനകളുടെ പ്രതിനിധികൾ പേര്‌ വായിച്ചത്‌. എഴുത്തുകാരൻ സക്കറിയ ആദ്യ പേരുകൾ വായിച്ചു; മുഖ്യപ്രഭാഷണവും നടത്തി. ചിന്തരവി ഫ‍ൗണ്ടേഷൻ പ്രതിനിധി ശശികുമാർ, സംഘാടകസമിതി ചെയർമാൻ ഡോ. പ്രതീഷ് ജി പണിക്കർ, ജനറൽ കൺവീനർ ഡോ. ബിച്ചു എക്‌സ്‌ മലയിൽ, ഡോ. ടി പ്രദീപ്‌, കുമാരി വിജയ, കെ ജി ജഗദീഷ്‌, അനിൽ ബാബു എന്നിവർ സംസാരിച്ചു. ആർടിസ്‌റ്റുകളായ ബാലമുരളീകൃഷ്‌ണ, സൽമാൻ ഫസൽ, എൻ അജ്‌മൽ, മുഹമ്മദ്‌ യാസിൻ എന്നിവർ ഇസ്രയേൽ വംശഹത്യയും ഗാസയുടെ നിസഹയാവസ്ഥയും വ്യക്‌തമാക്കുന്ന ചിത്രങ്ങൾ കാൻവാസിൽ വരച്ചു.