സ്​പേസ് സ്യൂട്ടിൽ ചാന്ദ്രമനുഷ്യൻ; 
ത്രില്ലടിച്ച്​ ചിൽഡ്രൻ

ചേർത്തല

കേരള ശാസ്​ത്രസാഹിത്യ പരിഷത്ത്​ നേതൃത്വത്തിൽ ചാന്ദ്രദിന വാരാചരണത്തോടനുബന്ധിച്ച് ജില്ലയിൽ ‘ചാന്ദ്രമനുഷ്യൻ' പര്യടനം തുടങ്ങി. ചാരമംഗലം ഗവ. സംസ്​കൃതം ഹൈസ്​കൂളിൽ മുഹമ്മ പഞ്ചായത്ത് പ്രസിഡന്റ്​ സ്വപ്​ന ഷാബു ഉദ്ഘാടനംചെയ്​തു. പിടിഎ പ്രസിഡന്റ്​ കെ എസ് സേതുനാഥ് അധ്യക്ഷനായി. പരിഷത്ത് ജില്ലാ പ്രസിഡന്റ്​ ഡോ. ടി പ്രദീപ്, പഞ്ചായത്ത് സ്ഥിരംസമിതി അധ്യക്ഷ പി എൻ നസീമ, സംസ്​കൃതം സ്​കൂൾ പ്രഥമാധ്യാപിക ജെ ഷീല, പരിഷത്ത് ജില്ലാ കമ്മിറ്റിയംഗം എൻ ആർ ബാലകൃഷ്​ണൻ, മേഖലാ സെക്രട്ടറി കെ ദാസപ്പൻ എന്നിവർ സംസാരിച്ചു. സ്​പേസ് സ്യൂട്ടിൽ എത്തിയ ‘ചാന്ദ്രമനുഷ്യൻ' കുട്ടികളുടെ സംശയങ്ങൾക്ക് മറുപടിനൽകി. കുട്ടികൾ കൗതുകത്തോടെയാണ് ചാന്ദ്രമനുഷ്യനെ വരവേറ്റത്. ചാന്ദ്രമനുഷ്യനും കുട്ടികൾക്കുമിടയിൽ ഡോ. ടി. പ്രദീപ് ദ്വിഭാഷിയായി. കായിപ്പുറം സിഎംഎസ് എൽപിഎസ്, മുഹമ്മ ഗവ. എൽപിഎസ്, എബിവിഎച്ച്എസ്എസ്, സിഎംഎസ് എൽപിഎസ്​ എന്നിവിടങ്ങളിൽ പര്യടനം നടത്തി. പരിഷത്ത്​ മേഖലാ പ്രസിഡന്റ്​ ആർ രഞ്ജിത്ത്, സെക്രട്ടറി കെ ദാസപ്പൻ, ഡി പ്രസന്നൻ, ടി എ ധനഞ്ജയൻ, ഡോ. വി എൻ ജയചന്ദ്രൻ എന്നിവർ സംസാരിച്ചു. തിങ്കളാഴ്​ച വാരനാട് ഗവ. എൽപിഎസ്, വെള്ളിയാകളം ഗവ. യുപിഎസ്, ചേർത്തല ഗവ. ടൗൺ എൽപിഎസ്, അർത്തുങ്കൽ ഫിഷറീസ് ടെക്​നിക്കൽ ഹൈസ്​കൂൾ എന്നിവിടങ്ങളിലാണ്​ പര്യടനം.