ക്ഷീരമേഖലയിൽ സമഗ്ര ഇന്‍ഷുറന്‍സ് പദ്ധതി
ചേര്‍ത്തല
വയലാര്‍ കാവില്‍ സെന്റ്‌ മൈക്കിള്‍സ് പാരിഷ് ഹാളില്‍ മൂന്നുനാൾനീണ്ട ജില്ലാ ക്ഷീരസംഗമം സമാപിച്ചു. പൊതുസമ്മേളനവും ക്ഷീരഗ്രാമം പദ്ധതിയും മന്ത്രി ജെ ചിഞ്ചുറാണി ഉദ്ഘാടനംചെയ്‌തു. സംസ്ഥാനത്തെ ക്ഷീരമേഖലയിലേക്ക് പുതുതലമുറയെ ആകർഷിക്കാനുളള പദ്ധതികള്‍ക്കാണ് പ്രാധാന്യം നല്‍കുന്നതെന്നും മാറ്റം പ്രതിഫലിക്കുന്നുണ്ടെന്നും മന്ത്രി പറഞ്ഞു. ക്ഷീര മേഖലയിൽ സമഗ്ര ഇന്‍ഷുറന്‍സ് പദ്ധതി നടപ്പാക്കും. പദ്ധതിക്ക്‌ ആദ്യഗഡുവായി 50 ലക്ഷം രൂപ ലഭ്യമായിട്ടുണ്ട്. ക്ഷീരകര്ഷകര്ക്ക് ഏറെ പ്രയോജനപ്പെടുന്ന പദ്ധതിയുടെ സംസ്ഥാനതല ഉദ്ഘാടനം ഈമാസം നടത്തും. മന്ത്രി പി പ്രസാദ് അധ്യക്ഷനായി. സമൂഹം ക്ഷീരകര്ഷകര്ക്ക് അര്‍ഹിക്കുന്ന പിന്തുണയും പ്രാധാന്യവും നല്‍കണമെന്ന്‌ അദ്ദേഹം പറഞ്ഞു. ക്ഷീരകര്‍ഷകരുടെ ക്ഷേമത്തിന് പദ്ധതികള്‍ നടപ്പാക്കി വലിയ പരിഗണന സര്‍ക്കാര്‍ നൽകുന്നുണ്ടെന്നും മന്ത്രി പറഞ്ഞു. ക്ഷീരവികസന വകുപ്പ്‌ ഡയറക്ടര്‍ ശാലിനി ഗോപിനാഥ് റിപ്പോര്‍ട്ട്‌ അവതരിപ്പിച്ചു. സംഘങ്ങള്‍ക്ക്‌ ധനസഹായം ടിആര്‍സിഎംപിയു ചെയര്‍മാന്‍ മണി വിശ്വനാഥ് വിതരണംചെയ്‌തു. ജില്ലാ പഞ്ചായത്ത് വൈസ്‌ പ്രസിഡന്റ് എന്‍ എസ് ശിവപ്രസാദ് മികച്ച ക്ഷീരകര്ഷകര്ക്ക് അവാര്‍ഡ്‌ വിതരണംചെയ്‌തു. ജനപ്രതിനിധികളായ മേരി ടെല്‍ഷ്യ, ഓമന ബാനര്‍ജി, ബിനു ഐസക്‌ രാജു, എം ജി നായര്‍, ടി കെ പ്രതുലചന്ദ്രന്‍, ആയാപറമ്പ് രാമചന്ദ്രന്‍ എന്നിവര്‍ ക്ഷീരവികസന യൂണിറ്റുകളെ ആദരിച്ചു. കേരള ക്ഷീരകര്‍ഷക ക്ഷേമനിധിബോര്‍ഡ് അംഗം ബി അന്‍സാരി, മേനാശേരി ക്ഷീരസംഘം പ്രസിഡന്റുമാരായ സി ആര്‍ ബാഹുലേയന്‍, കെ ജി പ്രിയദര്‍ശനന്‍ എന്നിവര്‍ സംസാരിച്ചു.
Related News
Dont Miss it
0 comments