ജില്ലാ കലോത്സവത്തിന്‌ ഇന്ന്‌ കൊടിയിറങ്ങും ; കപ്പിനരികെ എറണാകുളം, തൊട്ടുപിന്നാലെ പറവൂർ

കൊച്ചി

അരങ്ങിലെ ആവേശകരമായ പോരാട്ടങ്ങൾക്കൊടുവിൽ ജില്ലാ കലോത്സവ കിരീടം ആരുയർത്തുമെന്ന്‌ ശനിയാഴ്‌ച അറിയാം. മത്സരം അവസാന ലാപ്പിലേക്ക്‌ കടക്കുമ്പോൾ ആതിഥേയരായ എറണാകുളം ഉപജില്ല മികച്ച ലീഡുമായി മുന്നിലാണ്‌. 899 പോയിന്റോടെയാണ് നിലവിലെ ചാമ്പ്യന്‍മാര്‍ നാലാംദിനവും കുതിപ്പു തുടരുന്നത്. തുടർച്ചയായ നാലാം കിരീടത്തിലാണ്‌ എറണാകുളത്തിന്റെ കണ്ണ്‌. പറവൂരാണ്‌ രണ്ടാമത്‌, 850 പോയിന്റ്‌. മൂന്നാമത്‌ ആലുവ (844).

സ്‌കൂള്‍ വിഭാഗത്തില്‍ നിലവിലെ ചാമ്പ്യന്‍മാരായ ആലുവ വിദ്യാധിരാജ വിദ്യാഭവന്‍ ഇഎംഎച്ച്എസ് (266) വെള്ളിയാഴ്‌ചയും ലീഡ് നിലനിര്‍ത്തി. മൂവാറ്റുപുഴ സെന്റ് അഗസ്റ്റിന്‍സ് ഗേള്‍സ് എച്ച്എസ്എസും (247), മുന്‍ ചാമ്പ്യന്‍മാരായ എറണാകുളം സെന്റ് തെരേസാസും (241) തമ്മിലാണ് രണ്ടാംസ്ഥാനത്തിനായുള്ള പോരാട്ടം. അവസാനദിനം ഏഴ്‌ വേദികളില്‍ മാത്രമാണ് മത്സരം. സമാപന സമ്മേളനത്തിന്റെ ഉദ്‌ഘാടനവും സമ്മാനദാനവും വൈകിട്ട്‌ അഞ്ചിന്‌ സെന്റ്‌ ആന്റണീസ്‌ ഗേൾസ്‌ അങ്കണത്തിൽ കൊച്ചി സിറ്റി പൊലീസ്‌ കമീഷണർ പുട്ട വിമലാദിത്യ ഉദ്‌ഘാടനം ചെയ്യും.

മികച്ച ‘നടൻ’... 
മെൽമേരി

"പതാക'യിൽ പൊലീസുകാരനായി അരങ്ങുതകർത്ത്‌ മികച്ച ‘നടനാ’യി മെൽമേരി. എച്ച്‌എസ്‌എസ്‌ വിഭാഗം നാടകത്തിലാണ്‌ എറണാകുളം ഗവ. ഗേൾസ്‌ എച്ച്‌എസ്‌എസിലെ പ്ലസ്‌ വൺ വിദ്യാർഥിനി മെൽമേരി മികച്ച നടനായത്‌. ഒഡിയ സാഹിത്യകാരി ഗായത്രി സരാഹിന്റെ "രാജ്യസ്നേഹം' എന്ന കഥയെ ആസ്പദമാക്കിയുള്ള നാടകമായിരുന്നു "പതാക'. സ്കൂളിലെ മലയാളം അധ്യാപകൻ സി എസ് വിഷ്ണുരാജ് ആയിരുന്നു പരിശീലകൻ. നാടകത്തിന്‌ രണ്ടാംസ്ഥാനമായതിനാൽ സംസ്ഥാനതലത്തിൽ മത്സരിക്കാൻ അപ്പീൽ നൽകിയിരിക്കുകയാണ്‌ ടീം. കോലഞ്ചേരി സെന്റ്‌ പീറ്റേഴ്‌സ്‌ വിഎച്ച്‌എസ്‌എസിലെ ബിയ സാബുവാണ്‌ എച്ച്‌എസ്‌എസ്‌ വിഭാഗത്തിലെ മികച്ച നടി. എച്ച്‌എസ്‌ വിഭാഗത്തിലും മികച്ച ‘നടൻ’ പെൺകുട്ടിയാണ്‌. എറണാകുളം സെന്റ്‌ തെരേസാസ്‌ സിജിഎച്ച്‌എസ്‌എസിലെ എട്ടാംക്ലാസുകാരി എൻ എസ്‌ മേരി ശ്രദ്ധ.

ഗിത്താറിൽ വിജയം തിരികെപ്പിടിച്ച്‌

ഗിത്താറുമായി വേദിയിലേക്ക്‌ കയറുമ്പോൾ ഒന്നാമതെത്തുക മാത്രമായിരുന്നു മാത്യുവിന്റെ മനസ്സിൽ. സംസ്ഥാന കലോത്സവത്തിൽ പങ്കെടുക്കാനുള്ള അവസാന ഉ‍ൗഴമാണ്‌. ഫലം വന്നപ്പോൾ പ്രതീക്ഷ തെറ്റിയില്ല എച്ച്‌എസ്‌എസ്‌ വിഭാഗം ഗിത്താർ (പാശ്‌ചാത്യം) മത്സരത്തിൽ മാത്യു തന്നെ വിജയി. തേവര എസ്എച്ച് എച്ച്‌എസ്എസിലെ പ്ലസ്ടു വിദ്യർഥിയാണ്‌ മാത്യു ജോർജ്. ഒമ്പതാംക്ലാസിൽ പഠിക്കുമ്പോഴാണ് സംസ്ഥാനതലത്തിൽ മത്സരിച്ചത്. പിന്നീട് രണ്ടു വർഷവും രണ്ടാംസ്ഥാനത്തായി. ഈ വർഷം മികച്ച പ്രകടനത്തിനായി നന്നായി പരിശ്രമിച്ചുവെന്ന്‌ മാത്യു പറഞ്ഞു. കൂടുതൽ സമയം പരിശീലിച്ചു. രവിപുരം നാഷണൽ അക്കാദമിയിലായിരുന്നു ഗിത്താർ പഠനം. 14 വർഷമായി ഗിത്താർ പഠിക്കുന്നുണ്ട്. അരൂർ വലിയവീട്ടിൽ ജോർജ്‌ മാത്യുവിന്റെയും അനുമോളുടെയും മകനാണ്‌.

വാക്കിൽ 
ആവേശം നിറച്ച്‌

ത്രസിപ്പിക്കുന്ന വാക്കുകളാൽ പ്രസംഗവേദിയെ ആവേശത്തിലാക്കി ആബേൽ. അഞ്ചുമിനിറ്റിൽ "യുദ്ധം സമാധാനം കൊണ്ടുവരുമോ' വിഷയത്തിൽ ഏറ്റവും പുതിയ അറിവുകൾവരെ ചേർത്തുവച്ചായിരുന്നു ജില്ലാകലോത്സവ വേദിയിൽ ആബേലിന്റെ വാക്കുകൾ, വേദി വിട്ടത് ഒന്നാംസ്ഥാനവുമായി. ദേശാഭിമാനി അക്ഷരമുറ്റം ടാലന്റ്‌ ഫെസ്റ്റ്‌ സംസ്ഥാനതല പ്രസംഗമത്സരത്തിലും ഒന്നാംസ്ഥാനക്കാരനായിരുന്നു കെ എ ആബേൽ തോമസ്.

തേവര എസ്എച്ച് എച്ച്എസ്എസിലെ പ്ലസ് വൺ വിദ്യാർഥി ആബേൽ മൂന്നാംതവണയാണ് ജില്ലാ കലോത്സവത്തിൽ പ്രസംഗമത്സരത്തിൽ ഒന്നാമതെത്തുന്നത്. കഴിഞ്ഞ രണ്ടു വർഷവും ഹൈസ്കൂൾ വിഭാഗത്തിലും ഇക്കുറി എച്ച്എസ്എസ് വിഭാഗത്തിലും. സ്ഥിരമായുള്ള പത്രവായനയും പുസ്തകവായനയുമാണ് വിവിധ വിഷയങ്ങളെക്കുറിച്ച് അറിയാൻ സഹായിക്കുന്നതെന്ന് ആബേൽ പറഞ്ഞു. ചാറ്റ്‌ ജിപിടിയും യുട്യൂബുമെല്ലാം പുതിയ അറിവുകൾക്കായി പ്രയോജനപ്പെടുത്തുന്നു. ചിറ്റൂർ കുന്നപ്പള്ളി സന്തോഷ് അഗസ്റ്റിന്റെയും നിക്സിയുടെയും മകനാണ്.

യക്ഷഗാനത്തിന്‌ 
ജില്ലയ്ക്ക് ടീമില്ല

യക്ഷഗാനത്തില്‍ ഇക്കുറി സംസ്ഥാന കലോത്സവത്തിൽ ജില്ലയ്‌ക്കായി മത്സരിക്കാൻ ടീമില്ല. ബുധനാഴ്‌ച നടക്കേണ്ടിയിരുന്ന മത്സരം മുന്നറിയിപ്പില്ലാതെ വെള്ളിയാഴ്‌ചത്തേക്ക് മാറ്റിയതില്‍ പ്രതിഷേധിച്ച്‌ ചേന്ദമംഗലം കരിമ്പാടം ഡിഡി സഭ ഹൈസ്‌കൂള്‍ പിന്മാറിയിരുന്നു. സംഘാടകരുടെ നടപടിയില്‍ പ്രതിഷേധിച്ച് സ്‌കൂള്‍ ടീം വേദിക്കരികില്‍ യക്ഷഗാനം കളിച്ച് പ്രതിഷേധിച്ചു. മംഗളൂരുവിൽനിന്നെത്തിയ പിന്നണിസംഘവും ടീമിനൊപ്പമുണ്ടായി.

മറ്റൊരു ടീമായ ആനിക്കാട് സെന്റ് സെബാസ്റ്റ്യന്‍സ്‌ എച്ച്എസ് മാത്രമാണ് വെള്ളിയാഴ്‌ച വേദിയിലെത്തിയത്‌. പിന്നണിയില്ലാതെ സിഡി ഉപയോഗിച്ചായിരുന്നു ടീം മത്സരിച്ചത്‌. കലോത്സവ മാന്വല്‍ പാലിച്ചില്ലെന്ന് ചൂണ്ടിക്കാട്ടി വിധികർത്താക്കൾ ഗ്രേഡ്‌ അനുവദിച്ചില്ല.

കഴിഞ്ഞ 10 വര്‍ഷമായി ജില്ലയെ പ്രതിനിധാനംചെയ്‌ത സഭ സ്‌കൂളിലെ ടീമാണ് സംസ്ഥാന കലോത്സവത്തില്‍ യക്ഷഗാനത്തില്‍ പങ്കെടുത്തിരുന്നത്. സംഭവത്തില്‍ സ്‌കൂള്‍ ടീം മുഖ്യമന്ത്രിക്കും വിദ്യാഭ്യാസമന്ത്രിക്കും പരാതി നല്‍കി.

കലവറയുടെ കരുത്തായി 
കെഎസ്‌ടിഎ

രാവിലെ ഇഡ്ഡലി-സാമ്പാർ, അപ്പം-കടല, ഉപ്പുമാവ്.. ഉച്ചയ്ക്ക് പായസമുൾപ്പെടെ വിഭവസമൃദ്ധമായ ഊണ്.. രണ്ടുനേരം ചായയും ലഘുഭക്ഷണവും.. രാത്രി ഭക്ഷണം വേറെ.... ‘ഇറ്റ്‌സ്‌ ടൂ ഗുഡ്‌, ഡെലീഷ്യസ്‌..!’ കലോത്സവത്തിനെത്തുന്നവരുടെ വയറും മനസ്സും നിറയ്ക്കാൻ കെഎസ്ടിഎ അധ്യാപകർ ചങ്കുതന്ന്‌ കൂടെയുണ്ട്. ‘രുചിരം’ ഭക്ഷണശാലയിൽ തിരക്കോടുതിരക്ക്‌. ദിവസവും 3000–4000 പേർക്ക്‌ ഇവിടെ ഭക്ഷണം നൽകുന്നുണ്ട്‌. വിളമ്പിത്തരാൻ എൻഎസ്എസ്, എൻസിസി, എസ്‌പിസി, റെഡ്ക്രോസ്‌, ടിടിഐ വളന്റിയര്‍മാരും.

പി എ നിഷാദ് ബാബു കൺവീനറും ഏലിയാസ് മാത്യു ചെയർമാനും ഡാൽമിയ തങ്കപ്പൻ വൈസ് ചെയർമാനുമായ കമ്മിറ്റിയാണ് ഭക്ഷണമൊരുക്കുന്നത്‌. മരട് പൂണിത്തുറ സ്വദേശി ജി സുബ്ബരാജാണ് കലവറയുടെ കപ്പിത്താൻ. അധ്യാപകരായ എസ് ജിതേഷ്, ഗ്രേസി ജൂഡി, എ എൻ ബിജു, ജോസ്‌പെറ്റ് ജേക്കബ്, സുജിലാറാണി, എസ് കിരൺ, സീന വർഗീസ്‌ എന്നിവരുടെ കണ്ണും കരളുമാണ്‌ കലവറയുടെ കരുത്ത്‌.