31ന് മുഖ്യമന്ത്രി നാടിന് സമർപ്പിക്കും

ഫറോക്ക് ഫറോക്ക് ഗവ. താലൂക്കാശുപത്രിക്കായി നിർമിച്ച കെട്ടിട സമുച്ചയം 31ന് രാവിലെ 10ന്​ മുഖ്യമന്ത്രി പിണറായി വിജയൻ നാടിന് സമർപ്പിക്കും. അത്യാധുനിക സൗകര്യങ്ങളോടെ 23.5 കോടി രൂപ ചെലവിൽ 47,806 ചതുരശ്ര അടി വിസ്തൃതിയിലാണ് ബഹുനില കെട്ടിട സമുച്ചയം നിർമിച്ചിട്ടുള്ളത്. ​അതിനൂതന സംവിധാനങ്ങളും നിരവധി സ്പെഷ്യാലിറ്റികളുമുള്ള ആശുപത്രിയിൽ ഒരേസമയം 103 രോഗികളെ കിടത്തിച്ചികിത്സിക്കാം. ഓക്സിജൻ പ്ലാന്റ്​, ട്രോമാ കെയർ യൂണിറ്റ്, അത്യാഹിതവിഭാഗം, ഓപറേഷൻ തിയറ്ററുകൾ തുടങ്ങിയവയും പുതിയ ആശുപത്രിയുടെ ഭാഗമായുണ്ടാകും. ​താഴത്തെനിലയിൽ മൈനർ ഒപി, ട്രോമാ കെയർ, ഫാർമസി, നാല്​ ഒപി വിഭാഗങ്ങൾ, ഒന്നാംനിലയിൽ ആധുനിക ലാബ്, നാല്​ ഒപികൾ, സ്റ്റാഫ് ലോബി, സ്നാക്സ് ബാർ, അൾട്രാ സൗണ്ട് സ്കാനിങ് വിഭാഗവും രണ്ടും മൂന്നും നിലകളിൽ 40 കിടക്കകൾവീതമുള്ള സ്ത്രീ–-പുരുഷ വാർഡുകളുമുണ്ട്​. ​ 1.5 ലക്ഷം ലിറ്റർ സംഭരണശേഷിയുള്ള ഒന്നും 25,000 ലിറ്റർ ശേഷിയുള്ള രണ്ടെണ്ണവുമടക്കം മൂന്ന് ഭൂതല ജലസംഭരണികളുമുണ്ട്​. മലിനജല ശുദ്ധീകരണശാല (എസ്ടിപി), ബയോഗ്യാസ് പ്ലാന്റ്​ എന്നിവയും പ്രവർത്തിക്കും. ബേപ്പൂർ മണ്ഡലത്തിലെയും മലപ്പുറം ജില്ലയുടെ അതിർത്തി പ്രദേശങ്ങളിലെയും ജനങ്ങളുടെ ആശ്രയമായ ആശുപത്രിയുടെ പുതിയ കെട്ടിട സമുച്ചയം പ്രവർത്തനക്ഷമമാകുന തോടെ നിലവിലുള്ളത്​ ഉൾപ്പെടെ 140 പേരെ കിടത്തിച്ചികിത്സിക്കാനാവും.