നമ്മളെ സ്വന്തം കുട്ട്യാ

വടക്കഞ്ചേരി

യുവത്വത്തിന്റെ പ്രസരിപ്പാർന്ന പ്രിയപ്പെട്ടവന്‌ വഴികളിൽ പ്രായഭേദമന്യേ ഗംഭീര വരവേൽപ്പ്‌. ജില്ലാ പഞ്ചായത്ത്‌ കിഴക്കഞ്ചേരി ഡിവിഷൻ എൽഡിഎഫ്‌ സ്ഥാനാർഥി ആർ കാർത്തിക് നിറപുഞ്ചിരിയുമായി മനസ്സുകളിലേക്ക്‌ പടരുകയാണ്‌. ​പ്രചാരണത്തിനിടെ, ഇളവംപാടത്തെത്തിയപ്പോൾ അവിടെ കലുങ്കിലും മറ്റും ഇരിക്കുന്നവരോട് വോട്ടഭ്യർഥന. ‘‘അതൊക്കെ ജയിച്ച് കഴിഞ്ഞതല്ലേ’–എന്ന്‌ നാട്ടുകാരുടെ സ്നേഹം നിറഞ്ഞ മറുപടി. എസ്എഫ്ഐ സംസ്ഥാന കമ്മിറ്റി അംഗവും ഡിവൈഎഫ്ഐ അഗളി മേഖലാ കമ്മിറ്റി പ്രസിഡന്റുമാണ്‌ കാർത്തിക്‌. കഴിഞ്ഞതവണ ജില്ലാ പഞ്ചായത്തിലെ മുപ്പത് ഡിവിഷനുകളിൽ ഏറ്റവും ഉയർന്ന ഭൂരിപക്ഷത്തിലാണ് നിലവിലെ അംഗം അനിത പോൾസൺ വിജയിച്ചത് (14,924 വോട്ട്‌). കിഴക്കഞ്ചേരി, വടക്കഞ്ചേരി പഞ്ചായത്തുകൾ പൂർണമായും, കണ്ണമ്പ്ര പഞ്ചായത്തിലെ എട്ട് വാർഡുകളും ചേർന്നതാണ് കിഴക്കഞ്ചേരി ഡിവിഷൻ. രാജ്യത്തുതന്നെ ഒരു തദ്ദേശഭരണ സ്ഥാപനം ഏറ്റെടുത്ത് നടപ്പാക്കിയ പാലക്കുഴി മിനി ജലവൈദ്യുത പദ്ധതിയാണ് അഞ്ചുവർഷത്തെ വലിയ വികസനം (15.9 കോടി രൂപ). അഞ്ചുമൂർത്തി മംഗലത്തെ വഴിയോര വിശ്രമകേന്ദ്രം (ഒരുകോടി), കിഴക്കഞ്ചേരി പനംചക്കര സൊസൈറ്റിക്ക് കെട്ടിടവും യന്ത്രങ്ങളും (50 ലക്ഷം), 23 റോഡുകൾ (4.6 കോടി), കിഴക്കഞ്ചേരിയിൽ വനിതാ ജിംനേഷ്യം (5 ലക്ഷം), മമ്പാട് വാതകശ്മശാനം (ഒരുകോടി), കിഴക്കഞ്ചേരി ഗവ. ഹയർ സെക്കൻഡറി സ്‌കൂളിൽ ശുചിമുറി, ലാബ്, ചുറ്റുമതിൽ (50 ലക്ഷം), ആയക്കാട് തച്ചാംകുന്ന് കുളം നവീകരണം (30 ലക്ഷം) എന്നിവയാണ്‌ മറ്റ്‌ പ്രധാന പദ്ധതികൾ.