ദിത്വ തമിഴ്നാട് തീരത്തോട് അടുക്കുന്നു: ശക്തി കുറയാൻ സാധ്യത; തീരദേശ ജില്ലകളിൽ കനത്ത മഴ

ചെന്നൈ: ദിത്വ ചുഴലിക്കാറ്റ് കിഴക്കൻ തീരത്തോട് അടുക്കുന്നതിനാൽ തമിഴ്‌നാട്ടിലെയും പുതുച്ചേരിയിലെയും നിരവധി ജില്ലകളിൽ അതിശക്തമായ മഴ പ്രതീക്ഷിക്കുന്നതായി കാലാവസ്ഥാ വകുപ്പ്. ചുഴലിക്കാറ്റ് തീരം തൊടുമെന്ന് പ്രതീക്ഷിക്കുന്നില്ലെന്നും പകരം, അടുത്ത കുറച്ച് മണിക്കൂറുകളിൽ ഇത് ദുർബലമാവുകയും തമിഴ്‌നാട്-പുതച്ചേരി തീരങ്ങൾക്ക് സമാന്തരമായി വടക്കോട്ട് നീങ്ങുകയും ചെയ്യുമെന്നുമാണ് നിരീക്ഷണം. ചുഴലിക്കാറ്റിന്റെ പ്രഭാവത്തില്‍ തമിഴ്നാട്ടിലെ വടക്കൻ ജില്ലകളിൽ കനത്ത മഴ തുടരുകയാണ്.

നാഗപട്ടണത്ത് 30 സെന്റിമീറ്റര്‍ മഴ രേഖപ്പെടുത്തിയിട്ടുണ്ട്. ഉച്ചവരെ മഴ തുടരുമെന്ന് കാലാവസ്ഥ നിരീക്ഷണ കേന്ദ്രം അറിയിച്ചു. പുതുച്ചേരിയിലും കനത്തമഴയുള്ളതായാണ് റിപ്പോർട്ട്. 10 എന്‍ഡിആര്‍എഫ് യൂണിറ്റുകൾ കൂടി തമിഴ്നാട്ടിൽ വിന്യസിച്ചു. തെക്കൻ തീരദേശ ആന്ധ്രാപ്രദേശിലും, റായലസീമ ജില്ലയിലെ ഒറ്റപ്പെട്ട സ്ഥലങ്ങളിലും കനത്തതോ വളരെ ശക്തമായതോ ആയ മഴ പ്രതീക്ഷിക്കാം. തമിഴ്‌നാട്, പുതുച്ചേരി, ആന്ധ്രാപ്രദേശ് എന്നിവിടങ്ങളിൽ ഇപ്പോൾ റെഡ് അലേർട്ട് ആണ്.

തമിഴ്‌നാട് തീരത്ത് നിന്ന് ഏകദേശം 50 കിലോമീറ്റർ അകലെ തെക്കുപടിഞ്ഞാറൻ ബംഗാൾ ഉൾക്കടലിലാണ് നിലവിൽ ചുഴലിക്കാറ്റ് കേന്ദ്രീകരിച്ചിരിക്കുന്നത്. വൈകുന്നേരത്തോടെ അത് തീരത്തിന് അടുത്തേക്ക് നീങ്ങും. എന്നാ. കാറ്റിന്റെ വേഗത രാവിലെ 90 കിലോമീറ്ററിൽ നിന്ന് വൈകുന്നേരം 55-65 കിലോമീറ്ററായി കുറയാൻ സാധ്യതയുണ്ട്. ഇതിന്റെ ഫലമായി തമിഴ്നാട്ടിലെ കടലൂർ, നാഗപട്ടണം, മയിലാടുംതുറൈ, വില്ലുപുരം, ചെങ്കൽപേട്ട് ജില്ലകളിലും പുതുച്ചേരി, കാരക്കൽ എന്നിവിടങ്ങളിലും അതിശക്തമായ മഴയ്ക്ക് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.

ചെന്നൈ, പുതുക്കോട്ട, അരിയല്ലൂർ, തഞ്ചാവൂർ, തിരുവാരൂർ, പെരമ്പല്ലൂർ, തിരുച്ചിറപ്പള്ളി, സേലം, കള്ളക്കുറിച്ചി, തിരുവണ്ണാമലൈ, കാഞ്ചീപുരം, തിരുവള്ളൂർ, റാണിപ്പേട്ട് ജില്ലകളിലും കനത്ത മഴയ്ക്ക് സാധ്യതയുണ്ട്. ചുഴലിക്കാറ്റ് മൂലം പുല്ല് മേഞ്ഞ വീടുകൾക്കും വൈദ്യുതി, ആശയവിനിമയ ലൈനുകൾക്കും നാശനഷ്ടങ്ങൾ സംഭവിക്കുമെന്നും, മരങ്ങൾ കടപുഴകി വീഴുമെന്നും അധികൃതർ മുന്നറിയിപ്പ് നൽകി. കൃഷിയിടങ്ങളിലും താഴ്ന്ന പ്രദേശങ്ങളിലും വെള്ളപ്പൊക്കമുണ്ടാകാനും സാധ്യതയുണ്ട്. ചെന്നൈയില്‍ നിന്നുള്ള 47 വിമാനങ്ങള്‍ റദ്ദാക്കി.

ശ്രീലങ്കയ്ക്കുള്ള ഇന്ത്യന്‍ സഹായം തുടരുകയാണ്. ഇതുവരെ 4.5 ടൺ ഡ്രൈ റേഷൻ അടക്കമുള്ള ആവശ്യ വസ്തുക്കളുമായി ഐഎൻഎസ് വിക്രാന്ത്, ഐഎൻഎസ് ഉദയഗിരി എന്നീ കപ്പലുകൾ കൊളംബോയിൽ എത്തി. 2 ചേതക് ഹെലികോപ്റ്ററുകൾ പ്രളയ മേഖലകളിൽ തിരച്ചിലിൽ നടത്തുന്നുണ്ട്. ഐഎൻഎസ് സുകന്യ വിശാഖപട്ടണത്ത് നിന്ന് ശ്രീലങ്കയിലേക്ക് തിരിച്ചു. വ്യോമസേന വിമാനങ്ങൾ, ചേതക് ഹെലികോപ്റ്റർ എന്നിവ ഉപയോഗിച്ചും ആവശ്യ സാധനങ്ങളും തിരച്ചിൽ നടത്താനുള്ള ഉപകരണങ്ങളും എത്തിച്ചു.