മാങ്കൂട്ടത്തിൽ കേസിൽ ശബ്ദരേഖ പരിശോധന തുടങ്ങി; ശബ്ദ സാമ്പിൾ കേസിൽ നിർണായകമാകുമെന്ന് അന്വേഷണ സംഘം

തിരുവനന്തപുരം: രാഹുൽ മാങ്കൂട്ടത്തിൽ യുവതിയെ ക്രൂരമായി പീഡിപ്പിക്കുകയും അശാസ്‌ത്രീയ ഗർഭഛിദ്രത്തിന് നിർബന്ധിക്കുകയും ചെയ്‌തെന്ന കേസിൽ ശബ്ദരേഖ പരിശോധന തുടങ്ങി. ചിത്രാഞ്ജലി സ്റ്റുഡിയോയിൽ വെച്ചാണ് ശബ്ദരേഖയുടെ ആധികാരികമായ പരിശോധന നടക്കുന്നത്. യുവതിയുടെ ശബ്ദസാമ്പിൾ ശേഖരിച്ചാണ് പരിശോധന പുരോഗമിക്കുന്നത്.

അതേസമയം, കലാപം സൃഷ്ടിച്ച്‌ പദവികളിലെത്തിയത്‌ ക്രിമിനൽ സംഘമാണെന്നും അതിന്റെ ദുരന്തമാണ്‌ പാർട്ടി അനുഭവിക്കുന്നതെന്നുമുള്ള ചർച്ച കോൺഗ്രസിൽ സജീവം. മുതിർന്നവർ സ്ഥാനങ്ങളിൽ കടിച്ചുതൂങ്ങുന്നതിനെതിരെ കോലാഹലം സൃഷ്ടിച്ച്‌ പദവിയിലെത്തിയവർ അർഹരെ അവഗണിച്ച്‌, സ്വന്തം ‘ ടീം ’ ഉണ്ടാക്കി. ഇത്‌ നിയന്ത്രിക്കാൻ പ്രതിപക്ഷ നേതാവിനോ കെപിസിസി ക്കോ കഴിഞ്ഞില്ലെന്നുമാണ്‌ വിമർശം.

രാഹുൽ മാങ്കൂട്ടത്തിലിനായി പൊലീസ്‌ അന്വേഷണം ഊർജിതമാണ് . വ്യാഴാഴ്‌ച യുവതി തെളിവ് സഹിതം പരാതി നൽകിയതിന് പിന്നാലെ ഒളിവിൽപ്പോയ രാഹുലിന്‌ കോൺഗ്രസ്‌ നേതാക്കൾ തന്നെ സംരക്ഷണമൊരുക്കുന്നതായാണ്‌ സൂചന. ഫോൺ സ്വിച്ച് ഓഫാണ്‌. പാലക്കാട്ട്‌ യുഡിഎഫ്‌ തെരഞ്ഞെടുപ്പ്‌ പ്രചാരണത്തിനിടെയാണ്‌ രാഹുൽ മുങ്ങിയത്‌. കുറച്ചുനേരം ഫോൺ ഓൺ ആയപ്പോൾ പാലക്കാട് ടവർ ലൊക്കേഷനാണ് കാണിച്ചത്.

രാഹുൽ മാങ്കൂട്ടത്തിലിന്റെ മുൻകൂർ ജാമ്യാപേക്ഷ ബുധനാഴ്‌ച പരിഗണിക്കും. അന്വേഷണ ഉദ്യോഗസ്ഥൻ എസിപി ദിനരാജിന്റെ നേതൃത്വത്തിലുള്ള പ്രത്യേക സംഘം യുവതിയെ പരിശോധിച്ച വനിതാ ഡോക്‌ടറുടെ മൊഴിയെടുത്തു. യുവതിയുടെ സുഹൃത്തുക്കളുടെ മൊഴിയും ഉടൻ രേഖപ്പെടുത്തും. രാഹുൽ മാങ്കൂട്ടത്തിൽ കേസിൽ ഒന്നാംപ്രതിയും ഗർഭഛിദ്രത്തിന് മരുന്നെത്തിച്ച മാങ്കൂട്ടത്തിലിന്റെ സുഹൃത്ത് പത്തനംതിട്ട അടൂർ സ്വദേശി ജോബി ജോസഫ് രണ്ടാം പ്രതിയുമാണ്.