എംഎൽഎയെ കണ്ടവർ 
പൊലീസിലറിയിക്കുക

പാലക്കാട്‌

ലൈംഗികാതിക്രമത്തിനും നിർബന്ധിത ഗർഭഛിദ്രത്തിനും പൊലീസ്‌ കേസെടുത്ത്‌ ലുക്ക്‌ഒ‍ൗട്ട്‌ നോട്ടീസ്‌ പുറപ്പെടുവിച്ച രാഹുൽ മാങ്കൂട്ടത്തിലിനെതിരെ പ്രതിഷേധം ശക്തമാക്കി എസ്‌എഫ്‌ഐ. ഹെഡ്‌ പോസ്റ്റ്‌ ഓഫീസിനുമുന്നിൽനിന്ന്‌ സ്റ്റേഡിയം ബസ്‌സ്റ്റാൻഡിലേക്ക്‌ പ്രകടനവുമായെത്തിയ പ്രവർത്തകർ മാങ്കൂട്ടത്തിലിന്റെ ഫോട്ടോയും എഫ്‌ഐആറിലുള്ള കുറ്റകൃത്യങ്ങളും ആലേഖനം ചെയ്ത പ്രതീകാത്മക ലുക്ക്‌ഒ‍ൗട്ട്‌ പോസ്റ്ററുകൾ ചുവരുകളിൽ പതിച്ചു. കൊലയാളിയും ബലാത്സംഗ കുറ്റവാളിയുമായ എംഎൽഎ ഒളിവിലാണെന്നും കണ്ടുകിട്ടുന്നവർ പൊലീസിൽ അറിയിക്കണമെന്നും ആഹ്വാനം ചെയ്ത്‌ യാത്രക്കാർക്കിടയിൽ നോട്ടീസുകൾ വിതരണം ചെയ്‌തു. പെൺകുട്ടികളുൾപ്പെടെ നൂറിലേറെ പ്രവർത്തകർ പ്രതിഷേധത്തിൽ പങ്കെടുത്തു. കടകൾ കയറിയിറങ്ങി ക്യാമ്പയിൻ നടത്തി. പ്രതിഷേധം ജില്ലാ സെക്രട്ടറി എസ്‌ വിപിൻ ഉദ്‌ഘാടനം ചെയ്‌തു. ജോയിന്റ്‌ സെക്രട്ടറി അബിൻ കൃഷ്ണ, ഏരിയ സെക്രട്ടറിമാരായ പി ബി നിഖിൽ, അനിരുദ്ധ്‌, വി എം അഭിജിത്ത്‌, ഉത്തര പ്രകാശ്‌, വി എം അനഘ എന്നിവർ സംസാരിച്ചു. എംഎൽഎ ഓഫീസിൽ റീത്ത്‌ വച്ച്‌ ഡിവൈഎഫ്‌ഐയും പ്രകടനവുമായി മഹിളാ അസോസിയേഷനും കഴിഞ്ഞദിവസം പ്രതിഷേധിച്ചിരുന്നു.